1 Sabo Fibangoañe. A i Davide

Honjoneko irehe,

ry Andrianañahareko, ry Mpanjaka,

hibango ty tahina’o mb’an-jafe’afe’e.

2 Handriañeko boak’ andro,

le hibango ty tahina’o nainai’e donia.

3 Hinakinake t’Iehovà, rengèñe añ’abo,

tsy taka-tsikaraheñe ty hajabahina’e.

4 Ho bangoe’ ty tariratse raik’ ami’ty ila’e o tolon-draha’oo;

naho hitaroñe o fitoloña’o jabajabao.

5 Ty ha’raelahim-bolonahe’ ty enge’o vaho o tolon-draha’o mahalatsao

ro fitsakoreako.

6 Ho talilie’ ondatio ty haozaram-panoe’o mampañeveñe,

vaho ho taroñeko ty hajabahina’o.

7 Ho talilie’ iereo ty fitiahiañe o havokaran-kasoa’o;

hirebeha’ iereo ty havantaña’o.

8 Matarike t’Iehovà, naho lifo-tretrè,

malaon-kaviñerañe

vaho lifo-piferenaiñañe.

9 Kila hasoà’ Iehovà;

ambone’ ze hene anoe’e o fitretreza’eo.

10 Fonga handrenge Azo o tolon-draha’oo, ry Iehovà;

vaho hañonjoñe Azo o noro’oo.

11 Ho saontsie’ iereo

ty volonahem-pifehea’o,

vaho hitalily o haozara’oo,

12 hampandrendreke o ana’ ondatio

o fitoloña’e ra’elahio,

naho ty hafanjàka’ ty enge’ i fifehea’ey.

13 Fifeheañe tsy modo ty fifehea’o,

naho manitsike o tariratse iabio

ty fameleha’o.

14 Songa tohaña’ Iehovà o mikorovokeo,

sindre atroa’e o mibokok’ ambaneo.

15 Kila fihaino miandrandra ama’o,

vaho anjotsoa’o mahakama an-tsa’e.

16 Manoka-pitàn-drehe mañeneke

ty fañiria’ ze hene raha veloñe.

17 Vantañe amo lala’e iabio t’Iehovà

naho matarik’ amy ze hene fitoloña’e.

18 Marine’ ze mikanjy aze iaby t’Iehovà;

ze hene mikanjy aze an-katò.

19 Ho henefa’e ty fisalalà’

o mañeveñe ama’eo;

ho janjiñe’e ka ty toreo’ iareo

vaho ho rombahe’e.

20 Ambena’ Iehovà ze hene mikoko aze,

fe fonga ho rotsahe’e o lo-tserekeo.

21 Hivolam-pandrengeañe am’ Iehovà ty vavako,

le kila nofotse ro hibango ty tahina’e

masiñe nainai’e donia.