1 Ie haleñe an-tihiko atoy,

nipaiako i kokoam’ piaikoy,

nisalala aze iraho fa tsy tendreke;

2 Hitroatse henaneo

hikariokariok’ an-drova ao,

amo lala’eo naho an-kiririsa’e eo;

ho tsoeheko i kokoan’ aikoy.

Pinaiko fa tsy nitrea.

3 Nizoe’ o mpañambeñeo iraho,

ie nañariofa’ iereo fisamba i rovay.

Nioni’ areo hao i kokoam-piaikoy?

4 Ie vaho nihelañako,

le nitendrek’ amy kokoam-piaikoy;

nivihineko le tsy navotsoko ampara’ t’ie naseseko mb’añ’anjomban-dreneko mb’eo, mb’añ’efe’ i nampiareñ’ ahikoy.

5 Afantoko ama’ areo

ry anak’ampela’ Ierosalaimeo,

ty amo farasio ndra o fanaloke

an-kivokeo:

ko tsekafe’ areo ndra barakakaofe’ areo

o fikokoañeo ampara’ te irie’e.

6 Iam-bao o mionjo’ mb’etoa

hirik’am-patrambeio,

hoe hatoeñe mihorondemboke,

nembohe’ ty tsotse naho mañidè

vaho ze hene hamañim-bom-pibalibalike?

7 Hehe t’ie i horantsa’ i Selomoy,

iaoloa’ ty fanalolahy enem-polo

amo lahitsiai’ Israeleo.

8 Songa mpitam-pibara, vañoñ’añ’aly,

fonga ama-mesolava am-pe’e eo

ty amo fangebahebahan-kàleñeo.

9 Nitsenè’ i Selomò ho aze

ty horantsa’e an-katae’ i Libanone.

10 Nanoe’e volafoty o anakore’eo,

volamena i voho’ey,

malo-mavo i fiambesa’ey,

fikokoañe ty nihamina’ o anak’ ampela’ Ierosalaimeo ty añ’ate’e ao.

11 Mionjona, ry anak’ ampela’ i Tsioneo, sambao i Selomò mpanjaka misabaka

i nampisabakaen-drene’e

amy androm-pañengam-bali’eiy,

amy andro nahafale i arofo’eiy.