1 Mibaliha, mibaliha, ry nte-Solàme; mimpolia, mimpolia, hisamba’ay azo.

Inom-bao ty angarefa’ areo

i nte-Solamey

hoe te itsinjaha’e i *Mahanaime: toben-dahindefoñe, he mpitsinjakeMahanaime?

2 Fanjaka o fandia’o mihànao,

ry anak’ ampelan-droandria!

hoe hange nitoloñem-pitàm-pitsene mahimbañe

ty hahomozohozom-pe’o.

3 Fitovy bontoly ty foe’o,

ie le lia’e tsy po-divay milaro;

fitoboron’ ampemba iarikatoham-binda

o araña’oo.

4 Fanaloke tora’e o fatroa’oo,

ana-kambam-panalon-drene’e.

5 Hoe fitilik’abo aman-tsifan-drimo

ty fititia’o.

O antara’ i Kesbone marine’ i lalam-bei’

i Bate-Rabimeio o fihaino’oo.

I fitilik’abo’ i Libanoney mitolike

mbe Damesèke ty fiantsona’o.

6 Misabaka azo manahake

i vohi-Karmeley ty añambone’o,

le mahasinda i mpanjakay o firandra’eo.

7 Akore ty hatsomerentsere’o

naho ty hatrenotreno’o ry kokoako,

toe mahafale!

8 Mitroatse hoe voanio ty sandri’o,

le mitoboro hoe o voa’eo o fatroa’oo.

9 Aa hoe iraho: Hanganiheko i voanioy,

naho ho rambeseko o voa’eo;

fa hanahake ty voam-bahe o fatroa’oo,

naho minday ty harifondrifom-boasare

ty sehaseha’o,

10 Hoe divay fanjaka ty lañilañi’o;

malama ty fisorogoda’e ho a i kokoakoy,

hoe mitsiritsioke mora

am-pivimbim-pirotse.

11 A i kokoakoy raho

naho amako ty fañiria’e.

12 Antao, kokoako, homb’ an-kaloke

mb’eo, hialeñe amo kialoo.

13 Antao hañaleñaleñe

mb’an-tanem-bahe mb’eo

handrèndreke ty fibotibotia’ o vaheo,

ke te miborake o voñe’eo,

hera mamolera o raketao;

ao ty hanjotsoako ama’o ty hateako,

ry kokoako.

14 Mañakatse ty hañi’e o vahenamaloo,

hene raha mafiry ty an-tsariran-tikañe eo,

ty vao naho ty haehae,

songa nahajako ho azo, ry kokoako.