1 'Na ‑dɩayuo ‑a, 'n nye wɛn 'nɩ ‑hʋa, 'ke ba yrii dɛ ꞊nʋ 'mʋ lɛ, ‑ɛ mue la 'lu ‑wɔn, 'ke 'o ‑a nɩ bunʋ ‑wɔn, ti ꞊nʋ ‑kɔ 'yri ʋ 'de la 'tiilɛ a kʋɛ, ʋʋ la Moise ‑wɔn kʋɛ, 'ke 'le 'pʋhʋɔnblʋgba 'mʋ. ‑Tɛ ʋ nɩ la 'hru wlɔn, Nyɩsʋa nue la nɩ, 'nugba 'ɔ ꞊jri la ʋ 'bii 'lu gbo, ʋ 'bii 'ʋ ꞊ta la 'Yru ‑Jɔhʋn. 2 Ɛ 'we ꞊nɔ ye, ʋ 'bii, Nyɩsʋa pu la 'lu lɛ 'nie, 'ke 'le 'nugba kɔ 'Yru ‑Jɔhʋn a ‑gbɛ 'kwli 'mʋ, ‑ɛ die nu, ʋ kɔ Moise 'hɛɛn, ʋ 'mʋ ‑mʋɛ; 3 ʋ 'bii, 'ʋʋ la dididɛ ꞊nʋ di, ‑ɛɛ la 'le Nyɩsʋa ‑wɔn 'mʋ ‑hɔn, 4 ʋ 'bii, 'ʋʋ la ‑wɛ 'nie ꞊nʋ 'na, ‑ɛɛ la 'le Nyɩsʋa ‑wɔn 'mʋ ‑hɔn. 'Ɛ mɔ ‑tɛɛ, 'nie a ‑gbɛ, 'ke ɛɛ la 'le 'hɩɔ ꞊de 'kwli 'mʋ ‑hɔn. 'Hɩɔ a ‑gbɛ, Nyɩsʋa, nɔ‑ ‑nyo la ꞊nʋ. Nɔ‑ mɔ ‑Yusu 'Klɩsʋ. Ɔ kɔ ꞊nʋ 'hɛɛn, nʋ‑ʋ la ‑wɔn nɩna. 5 ꞊Hapʋkɔ, 'ʋ 'ye la 'ŋmilɛka‑tɔplɩ a ‑gbɛ, kɛɛ, 'waa 'plɔplɔ a nunuŋmli 'kukui 'nɩ blee ꞊le la Nyɩsʋa a plɔ. Nɛ‑ nue, 'ʋʋ la 'hru wlɔn lɛ 'kʋkʋ.

6 ‑Tɔplɩ a ‑gbɛ, ‑ɩ mue la 'lu ‑wɔn, ɩɩ ‑a mʋ tɔɔ dɛ ‑ye, ‑ɛ die nu, ‑a nɩ ꞊wlɩ 'nɩ ꞊han 'yilɛnyre‑tɔplɩ ‑hʋa, ‑ɛ 'we ꞊nɔ ye, ‑tɛ ʋʋ la 'a ‑hʋhʋa nu. 7 ꞊Ʋ ‑ye 'ke 'le ꞊nʋ ‑gbahlɔn, ʋʋ la da 'kuo. Kɛ'ɛ nɩ, ʋ nu la 'a 'crɩɩlɛ, 'ke 'le Nyɩsʋacrɩɩnɩɛ 'kwli 'mʋ, ‑ɛ mɔ: «Nahuin, ʋ ‑tʋa lɛ'mimre gbo, 'ʋʋ dɛ di, 'ʋʋ nɔ 'na, 'ʋ ‑tʋa ‑wla a yiyie gbo, 'ke 'o 'kuo a dɩda a ‑ta 'mʋ.» A ‑mɛ ‑ye, a nɩ da 'le 'kuo, ‑ɛ 'we ꞊nɔ ꞊nʋ ye. 8 ꞊Ʋ ‑ye 'ke 'le ꞊nʋ ‑hɛyri, ʋʋ la nu 'lalu. Nɛ‑ nue, Nyɩsʋa 'ɔ nue, 'waa 'milowɩ a (23'000) ‑wlʋ ꞊tu 'o ta, 'ʋ 'kʋkʋ lɛ, 'ke 'le ‑nyrɔwɔɔ ‑do 'kwli 'mʋ. Kɛɛ, ‑a ‑mɛ ‑ye, ‑a 'nɩ nu 'le 'lalu, ‑ɛ 'we ꞊nɔ ꞊nʋ ye. 9 Nahuin ‑ye, 'ke 'le ꞊nʋ ‑hɛyri, ʋ ꞊tɔ la Kʋkɔnyɔ Nyɩsʋa 'mʋ lɛ, ‑ɛ die nu, ʋ 'mʋ dɛ ꞊nʋ 'ye, ɔ di nu. Dɛ a ‑gbɛ a ‑tɩ, hrei 'ɩɩ la ꞊nʋ lɛ nine, 'ʋʋ la lɛ 'kʋkʋ. Kɛɛ, ‑a ‑mɛ ‑ye, ‑a 'nɩ ꞊tɔ 'le Nyɩsʋa 'mʋ lɛ, ‑ɛ 'we ꞊nɔ ꞊nʋ ye. 10 ꞊Ʋ ‑ye 'ke 'le ꞊nʋ ‑hɛyri, ʋʋ la 'mʋ lɛ 'pʋprɛ wlɔn, 'ke 'o Nyɩsʋa ke. Dɛ a ‑gbɛ a ‑tɩ, Nyɩsʋa a lɛleenyɔ ꞊nʋ, ‑ɔɔ la ꞊ke nahuin lɛ 'lɩla, 'ɔ di la 'le, 'ɔ 'lʋlʋ la lɛ. A ‑mɛ ‑ye, a nɩ 'pʋprɛ 'le 'mʋ lɛ, ‑ɛ 'we ꞊nɔ ꞊nʋ ye.

11 ‑Tɔplɩ 'bii a ‑gbɛ, ɩ mue la ‑wɔn 'lu, 'ke 'o ꞊nʋ ‑wɔn, ‑ɛ die nu, Nyɩsʋa 'mue nahuin tɔɔ, ‑ɛ mɔ, ʋ nɩ nu 'le dɛ 'kuku. ‑Tɔplɩ a ‑gbɛ, ʋ 'crɩɩ la nɩ, 'ke 'le Nyɩsʋacrɩɩnɩɛ 'kwli 'mʋ, ‑ɛ die nu, ‑a 'mʋ ꞊tɔ kɔ, ‑ɛ nue, ti ‑gbo, ‑a nɩ ke, ɩ mɔ 'lelɛ'bɔɔti'i nɩ. 12 Nɛ‑ nue, 'nɩɩ lɛ po, nahuon 'bɔ plɛ, dɛ 'kuku ꞊nʋ, Yisraɛkʋɛɛ la nu, ɔ 'die 'le ‑wɛ bɔ nue gbe, ‑ye nahuon a ‑gbɛ bɔ ꞊tu 'a dɩɔnʋ 'yie, ‑ɛ die nu, ɔ 'nɩ ꞊han Nyɩsʋa a 'hru bʋ wlɔn ‑ha, 'bɩa dɛ 'bɛɛ ꞊nɔ 'mʋ lɛ ꞊tɔ. 13 'Mʋlɛ꞊tɔ‑tɔplɩ ꞊nʋ, ‑ɩɩ 'o nyre, 'ke 'o 'a mʋ ‑wɔn, ɩ ‑do a ‑gbɛ, nɩ‑ɩ 'o nyre, 'ke 'o nahuin 'bii ‑wɔn. Nyɩsʋa ‑mɛ ‑ye, ɔ di 'a mʋ 'mʋ 'nɩ ‑hɛ, ‑ɛ 'we ꞊nɔ ye, ‑tɛ ɔ nu 'a ꞊tutue. Ɔ 'deɛ bɔ wɛɛn ke, 'ke dɛ ꞊de bɛ nyre 'o 'a mʋ ‑wɔn, ‑ɛ ‑hi 'a nɩ 'klɩ wlɔn. Kɛɛ, dɛ 'bɛɛ 'a mʋ 'mʋ lɛ ꞊tɔ, 'ke ba ‑ha Nyɩsʋa a 'hru bʋ wlɔn, ‑ye Nyɩsʋa di 'a mʋ ‑nyi 'klɩ, ‑ɛ die nu, a 'nɩ ꞊han 'a 'hru bʋ wlɔn ‑ha.

14 'Na 'mʋnʋɛ‑dɩayuo ‑a, ‑tɛ ɛ nɩ lɛ 'mʋ, ba hie 'o 'kuo a dɩda gbo 'bii. 15 'N yie nɩ, ‑ɛ mɔ, 'a mʋ ‑gbo, 'nɩɩ ‑wɔn 'crɩɩ, a kɔ 'lu a lɛ‑hielɛ. 'A ‑tɩ, ‑tɩ ꞊nʋ, 'n di 'a mʋ ye ꞊tu, 'a nɩ ‑gbɛ, ba ‑hii 'lu ‑wɔn lɛ. 16 'Bɩa ꞊baa Kʋkɔnyɔ a 'lelɛ'bɔɔdididɛ ꞊nʋ mu di, 'bɩa ꞊baa Nyɩsʋa 'wio ‑nyi, 'ke 'o ‑wiin‑gaʋwɔ a ‑ta 'mʋ, kɔ, ꞊ba nyo 'na, ‑ye ‑a kɔ ‑Yusu 'Klɩsʋ 'hɛɛn, ‑a ‑mʋɛ nɩ, 'a dablo a ‑tɩ. 'Plɩɩ 'bɩa ꞊baa 'flɔɔ ꞊nʋ ꞊tɩɔ lɛ 'bɛ, kɔ, ꞊ba nyo di, ‑ye ‑a kɔ ‑Yusu 'Klɩsʋ 'hɛɛn, ‑a ‑mʋɛ nɩ, 'a 'kʋkʋɛ a ‑tɩ. 17 'Flɔɔkuo 'ya ‑do. ‑A ‑mɛ ‑ye, ‑a ‑huo nɩ, kɛɛ, 'flɔɔkuoo ‑do a ‑gbɛ, nɔ‑ ‑aa di. Dɛ a ‑gbɛ, ɛ ꞊hɛn 'nyrɛ, ‑a 'we ꞊nɔ ‑tʋnahuoon ‑do ye.

18 Ba ‑hie Nyɩsʋa a dakʋ ꞊nʋ, ‑ʋ mɔ Yisraɛkʋɛ a dɛ 'lu ‑wɔn lɛ. Ʋʋ pi 'wlugba‑tɔplɩ a ‑cɔhlʋn, 'ke 'o Nyɩsʋa ye. Nahuin 'bʋʋ 'wlugba‑tɔplɩ a ‑gbɛ di, ‑ye ɛ ꞊hɛn 'nyrɛ, ʋ kɔ Nyɩsʋa 'hɛɛn, ʋ ‑mʋɛ nɩ. 19-20 'A ‑tɩ, nahuin 'bʋʋ 'wlugba‑tɔplɩ 'kuo pie, dɛ tio‑ ɛ ꞊hɛn 'nyrɛ? 'Ɛ mɔ ‑tɛɛ, 'n ꞊tui nɩ, ‑ɛ mɔ, 'kuo, ɔ 'de Nyɩsʋa. Kɛɛ, 'wlugbadɛ ꞊nʋ, ʋʋ 'kuo pie, sɛyɩ‑sɛyɩ 'kuo ‑hʋɩn, nɔ‑ ʋ nye pie. 'Plɩɩ 'bʋʋ 'kuo ‑hʋɩn pie, ‑ye ʋ kɔ 'kuo ‑hʋɩn a ‑gbɛ 'hɛɛn, ʋ ‑mʋɛ nɩ. A ‑mɛ ‑ye, 'nɩ ‑hʋɛ ꞊le, a kɔ 'kuo ‑hʋɩn 'hɛɛn, ba ‑mʋɛ. 21 A 'die 'le ‑wɛ ba 'naa 'le ‑a nɩ Kʋkɔnyɔ ‑Yusu a ‑wiin‑gaʋ wlɔn, 'plɩɩ ba mu, ba 'naa ‑wɛ 'le 'kuo ‑hʋɩn a ‑gaʋ wlɔn. Mɔ, a 'die 'le ‑wɛ, ba di Kʋkɔnyɔ ‑Yusu a dididɛ, 'plɩɩ ba mu, ba di ‑wɛ 'kuo ‑hʋɩn a dididɛ. 22 'Bɩa ꞊baa lɛ nu, ‑ye Kʋkɔnyɔ, ɔɔ ‑a mʋ lɛ poo yrʋ. ‑A 'nɩ ‑hie 'le 'lu ‑wɔn lɛ, ‑ɛ mɔ, ‑a kɔ 'klɩ, ꞊a ‑hi 'o ‑a nɩ Kʋkɔnyɔ 'mʋ.

23 Nahuin ‑ye 'ke 'le 'a mʋ ‑hɛyri, ʋ nɔ 'nɩ, ʋ kɔ 'hru, 'ke bʋ nu 'ɛ nɩ dɛ ꞊de, ʋʋ ‑hʋa. Iin, ꞊hapʋkɔɔ nɩ, kɛɛ, nunu‑tɔplɩ ‑ye nɩ 'o, 'ɩ 'nɩnɩ ‑hɛ ‑a nɩ 'bienʋ ‑tʋnahuin 'mʋ. 'Ɛ mɔ ‑tɛɛ, nahuindʋ a ‑gbɛ, ʋ kɔ 'hru, 'ke bʋ nu 'ɛ nɩ dɛ ꞊de, ʋʋ ‑hʋa. Kɛɛ, nunu‑tɔplɩ ‑ye nɩ 'o, 'ɩ 'nɩnɩ ‑hɛ nahuin 'mʋ, 'ke bʋ mu ye 'mʋ, 'ke 'o Nyɩsʋa a 'hru wlɔn. 24 'Ɛ nɩ nahuon 'bɔ nɩ 'o, bɔ nu dɛ ꞊nʋ, ‑ɛ di 'a 'be ‑tʋnahuon 'mʋ ‑hɛ. Ɔ nɩ ‑hie 'le 'a dɩɔnʋʋ ‑do a dɛ 'lu ‑wɔn lɛ.

25 'Ɛ nɩ 'wlugbadɛ ꞊de, ʋʋ plo, 'ke 'le 'maɩ ye, ba ‑tʋɛ, a 'mue di. A nɩ ‑hie 'le dɛ ꞊de 'lu ‑wɔn lɛ. A nɩ ꞊gba 'le wlɔn, 'bɩa 'bʋ pie 'kuo. 26 Ba kɔ 'a yiyie, ‑ɛ mɔ, ʋ 'crɩɩ la nɩ, 'ke 'le Nyɩsʋacrɩɩnɩɛɛ 'kwli 'mʋ, ‑ɛ mɔ: «Nyɩsʋa, nɔ‑ kɔ ‑tɔplɩ 'bii ꞊nʋ, ‑ɩ nɩ nɔ ‑tʋtʋ ke.»

27 'A ‑tɩ o, 'bɩa nahuon, ‑ɔ 'de ‑Yusu yi, 'bɔ da ‑mʋ dɛ di wɔn, 'ke 'le 'a kayu gbo, 'bɩa ꞊nɩ mu 'le, ‑ye 'ɛ nɩ dididɛ, ɔ di ‑mʋ ‑nyi, die, ꞊nɩ naa 'le ꞊wlʋ lɛ, kɔ, ꞊nɩ ꞊gba 'le wlɔn, 'bɩa 'bʋ pue 'kuo 'mʋ, mɔ, 'bʋ pie ‑wɛ 'kuo. 28 Kɛɛ, 'bɩa nahuon ꞊de 'bɔ di 'le, 'bɔ le ‑mʋ, ‑ɛ mɔ: «'Wlugbadɛ ꞊nʋ, ‑nɩɩ di, ʋ pie 'kuo,» ꞊nɩ die 'le 'klɛɛ lele, ‑ɛ die nu, ꞊nɩ ꞊han dɛ ꞊nʋ nu, nahuon a ‑gbɛ, ɔ plɛ, ɛ mɔ dɛ 'kuku, 'a ꞊wlʋ 'nɩ ꞊hion ‑tɩ yɛɛ. 29 'Bɩa 'nɩɩ ‑tɩ a ‑gbɛ ꞊tu, ɛ 'we ꞊nɔ ye, nahuon a ‑gbɛ a ꞊wlʋ a ‑tɩɩ nɩ, ɛ 'de ‑na ‑gbɛ a ꞊wlʋ a ‑tɩ.

‑Tado, kɛ ‑n di po, ‑ɛ mɔ: «'Mɛ ‑ye, 'n kɔ 'hru, 'ke ꞊bo nu 'ɛ nɩ dɛ, 'nɩɩ ‑hʋa. Dɛ‑ nue 'klɛɛ, 'ʋʋ 'mʋ le, ‑ɛ mɔ, 'nɩ nu 'le dɛ ꞊nʋ, ‑ɛ nue, 'na 'be ‑ye a ꞊wlʋ dio yɛɛ ‑tɩ. 30 'Bɩa 'nɩ ‑nyi Nyɩsʋa 'wio, 'ke 'o dididɛ ꞊nʋ, 'nɩɩ di a ‑ta 'mʋ, dɛ‑ nue, ꞊ɔ ‑ye 'ɔɔ 'mʋ 'klɛɛ crɛkɛ 'le?»

31 ‑Tɩ 'n ‑hʋa ꞊bo ꞊tu ‑mʋ ye, nɩ‑ ‑gbo: 'Ɛ nɩ dɛ, ‑nɩɩ di, kɔ, 'ɛ nɩ dɛ, ‑nɩɩ ‑wɛ 'na, kɔ, 'ɛ nɩ dɛ ꞊de, ‑nɩɩ nu, nue, ‑tɛ ʋ di nu, ʋ 'mʋ Nyɩsʋa a ‑tɩ 'yi 'bʋaa. 32 ꞊Nɩ nu 'le dɛ ꞊de, ‑ɛ die nu, nahuon ꞊de a ꞊wlʋ 'nɩ ꞊han ꞊hlɔn bi, ɔ 'nɩ ꞊han Nyɩsʋa a ‑tɩ lɛ ‑haa, ꞊betɩ nahuin ꞊nʋ, ‑ʋ mɔ ‑Juukʋɛ, kɔ nahuin ꞊nʋ, ‑ʋ 'de ‑Juukʋɛ, kɔ 'ɛ nɩ ‑Yusu a nahuin ꞊de. 33 ‑Tɛ 'nɩɩ nu, kɛ'ɛ nɩ, ba nu ‑wɛ. 'Ɛ nɩ dɛ, 'nɩɩ nu, 'n nye 'nɩ ‑hʋa, 'ke bɛ blee nahuin 'bii a plɔ. 'Nɩ ‑hie ꞊le dɛɛ ‑do ꞊nʋ 'lu ‑wɔn lɛ, ‑ɛ di 'mʋ 'mʋ ‑hɛ, kɛɛ, dɛ ꞊nʋ, ‑ɛ di 'n 'bienʋ 'mʋ ‑hɛ, 'ke Nyɩsʋa bɔ waa ꞊nʋ, nɛ‑ 'nɩɩ 'lu ‑wɔn lɛ ‑hie.