1 'Bɩa 'nɩɩ wɛn 'klɔ ‑gbo a nahuin 'bii a 'briwiin po, kɔ Nyɩsʋa a lɛleenyʋ a wiin 'bii 'hɛɛn, kɛɛ, 'bɩa 'nɩ 'de 'n 'bienʋ ‑tʋnahuin 'mʋ nʋɛ, ‑ye 'n 'we ꞊nɔ toku ye, kɔ gbegbe 'hɛɛn, ‑ɩ kɔ win nahuin a nʋɩ 'mʋ 'craa. 2 'Bɩa 'nɩ kɔ wɛn 'klɩ, 'ke ꞊bo ꞊tu ‑tɩ ꞊nʋ, Nyɩsʋa ꞊tu 'mʋ wlɔn, kɔ, 'bɩa 'nɩ yi wɛn ‑tɔplɩ 'bii, kɔ, 'bɩa 'nɩɩ wɛn Nyɩsʋa a ‑huhli‑tɔplɩ 'bii 'mʋ lɛ yrii, kɔ, 'bɩa 'nɩ kuo Nyɩsʋa ꞊wlʋ ye, 'na Nyɩsʋa a ꞊wlʋ a yekuolɛ a ‑gbɛ, 'bɛ nye wɛn nu, 'nɩɩ dʋgba le, bɔ ‑hɔn 'o ‑tɛgbi ‑gbo 'mʋ, bɔ mu 'le ‑tɛgbi ꞊nʋ, 'plɩɩ 'bɔ mu, kɛɛ, 'nɩ 'de 'n 'bienʋ ‑tʋnahuin 'mʋ nʋɛ, ‑ye 'na nunu‑tɔplɩ a ‑gbɛ, ɩ 'die 'le ‑wɛ bɩ da dɛ ꞊de. 3 ꞊Betɩ ꞊bo ‑ha wɛn 'le 'na kʋkɔ‑tɔplɩ 'bii, ꞊bo ‑nyi wɛn ꞊sʋɛnyʋ lɛ, kɔ ꞊bo ‑ha wɛn 'n dɩɔnʋ, 'ke ʋ 'mʋ 'mʋ 'tɔ po a ‑tɩ, kɛɛ, 'nɩ 'de 'n 'bienʋ ‑tʋnahuin 'mʋ nʋɛ, 'na nunu‑tɔplɩ a ‑gbɛ, ɩ 'nɩ ‑hɛ ꞊le 'mʋ 'mʋ.

4 Nahuon 'bɔ nʋɛ 'a 'bienʋ ‑tʋnahuin 'mʋ, ‑ye ɔ kɔ ꞊wlʋ a 'lɩla, kɔ, 'ɔ nyu ꞊hapʋdɛ 'yi ꞊hlɔn lɛ nu. Ɔ 'nɩ ꞊tu ꞊le ca. Ɔ 'nɩ po ꞊le 'a dɩɔnʋ a ‑pli, kɔ, ɔ 'nɩ 'yaa ꞊le ‑wɛ 'le 'a dɩɔnʋ. 5 Nahuon 'bɔ nʋɛ 'a 'bienʋ ‑tʋnahuin 'mʋ, ɔ 'nɩ ‑haa ꞊le 'waa ‑tɩ lɛ. Ɔ 'nɩ ‑hie ꞊le ‑tɔplɩɩ ‑do ꞊nʋ 'lu ‑wɔn lɛ, ‑ɩɩ ɔ ‑do 'mʋ ‑hɛ, kɛɛ, ɔɔ ‑wɛ ‑tɔplɩ ꞊nʋ 'lu ‑wɔn lɛ ‑hie, ‑ɩɩ 'a 'bienʋ ‑tʋnahuin 'mʋ ‑hɛ. Ɔ 'nɩ bi ꞊le yrʋ 'mʋ lɛ 'tata. 'Bɩa nahuon 'bɔ nuo dɛ 'klan 'mʋ, ɔ 'nɩ ꞊tue ꞊le 'le 'kwli 'mʋ gbo. 6 Nahuon 'bɔ nʋɛ 'a 'bienʋ ‑tʋnahuin 'mʋ, ‑tɔplɩ ‑hʋɩn ꞊nʋ, ʋʋ nu, ɩ 'nɩ nue ꞊le ꞊nɔ 'manʋ, kɛɛ, dɛ ‑kɔ 'manʋ ɔɔ nu, nɛ‑ mɔ ꞊hapʋdɛ ꞊nʋ, ʋʋ nu. 7 Nahuon 'bɔ nʋɛ 'a 'bienʋ ‑tʋnahuin 'mʋ, 'yilɛnyre‑tɔplɩ 'bii ꞊nʋ, ʋ nu, ɔɔ 'a ‑tɩ ‑wɔn 'nɩ ‑hri, 'plɩɩ 'ke 'o 'ɛ nɩ dɛ ꞊de ‑wɔn, ɔ 'cipi 'o ꞊o, 'ɔ kuo Nyɩsʋa ꞊wlʋ ye, kɔ, 'ɔ yie, 'ɔ nye ‑pre, ‑ɛ mɔ, Nyɩsʋa di ‑tɔplɩ 'bii 'nɩ ‑hlɛntie, kɔ, 'ɔ kɔ ꞊wlʋ a 'lɩla.

8 'Mʋnʋɛlɛ ꞊nʋ, nahuon kɔ, 'ke 'o 'a 'bienʋ ‑tʋnahuin ‑wɔn, ɛ 'nɩ ‑wɛ ꞊le 'le gbe. Nahuon bɔɔ ‑tɩ ꞊nʋ ꞊tu, Nyɩsʋa ꞊tuo wlɔn, ɛ di kɔ ti, ɛ 'mʋ 'le ‑wɛ, kɔ, nahuon bɔɔ win ꞊nʋ po, ɔ 'de yi, ɛ di ‑wɛ kɔ ti, ɔ 'mʋ 'a pupue 'kee, kɔ, nahuon bɔ yi ‑tɔplɩ, ɔ 'mʋ ‑wɛ 'a yiyie 'kee. 9 'Ɛ mɔ ‑tɛɛ, ‑tɔplɩ ꞊nʋ, ‑a yi, ɩ 'de ꞊cɛ. 'Bɩa ꞊baa ‑tɩ ꞊nʋ ꞊tu, Nyɩsʋa ꞊tu ‑a mʋ wlɔn, ɩ 'de ‑wɛ ꞊cɛ. 10 Kɛɛ, ti ꞊nʋ ‑kɔ 'yri Nyɩsʋa di 'o ‑a mʋ dɛ ꞊nʋ tɔɔ, ‑ɛ ꞊cɛɛ 'o ye, ‑ye dɛ ‑gbo, ‑aa 'klɛɛ 'mʋ lɛ yrii, ɛ di gbo 'nɩ ‑wɛ.

11 Ba 'ye kɛ, ‑tɛ 'n 'ya la 'yu 'mʋ, ‑tɛ 'yuu 'pʋprɛ nu, kɛ 'nɩɩ la 'pʋprɛ nu, kɔ, ‑tɛ 'yuu 'lu a lɛ‑hielɛ nu, kɛ 'nɩɩ la 'lu a lɛ‑hielɛ nu, kɔ, ‑tɛ 'yuu ‑tɔplɩ a 'wʋnwɔn nu, kɛ 'nɩɩ la 'a 'wʋnwɔn nu. Kɛɛ, ‑tɛ 'n ku 'klɛɛ, ‑ye 'n hie 'o 'yuo꞊pli a nunuklɔ gbo. 12 ‑Tɛ ti nɩ lɛ 'mʋ ‑gbo, 'bɩa ꞊baa ‑tɔplɩ 'ye, ‑ye ɛ 'we ꞊nɔ ye, ‑a nyi 'nɩ 'ye, 'ke 'le 'yɩla ꞊nʋ, ‑ɔ 'pupuo 'kwli 'mʋ. ‑Nyrɔwɔ ꞊de 'mʋ, ‑a nɩ 'yie di ‑tado ‑tɔplɩ 'bii lɛ 'nɩ yrii ‑tɛɛ. ‑Tɛ ti nɩ lɛ 'mʋ ‑gbo, ‑tɔplɩ ‑ye nɩ 'o, 'n 'de wɛn 'mʋ lɛ a yrie ‑tɛɛ. Kɛɛ, ‑nyrɔwɔ ꞊de di 'o 'nɩ nyre, 'mui 'mʋ lɛ yrii ‑tɛɛ, ‑ɛ 'we ꞊nɔ ye, ‑tɛ Nyɩsʋa nu 'na yiyie 'bii.

13 ‑Ye 'klɛɛ, ‑tɔplɩɩ ta nɩ 'o, ‑ɩ 'nɩnɩ ‑wɛ gbo gbe. ‑Tɔplɩ a ‑gbɛ, ɩ nɩ‑ ‑gbo: ‑Ba kuo Nyɩsʋa ꞊wlʋ ye, kɔ, ‑ba yie, ‑ɛ mɔ, Nyɩsʋa di ‑tɔplɩ 'bii 'nɩ ‑hlɛntie, kɔ, ‑ba nʋɛ ‑a nɩ 'bienʋ ‑tʋnahuin 'mʋ. Kɛɛ, ɩ 'bii ꞊nʋ, dɛ ‑hi 'o, nɛ‑ mɔ 'mʋnʋɛlɛ ꞊nʋ, ‑a kɔ, 'ke 'o ‑a nɩ 'bienʋ ‑tʋnahuin ‑wɔn.