1 Le Nyɩsʋa a nahuin, ‑ɛ mɔ, ʋ kɔ bʋ ꞊tuu 'o 'blʋgba a ye'mʋnaanyʋ 'bii 'o. Bʋ nu dɛ ꞊nʋ, 'blʋgba a ye'mʋnaanyʋ a ‑gbɛ, ʋʋ ꞊tu. Bʋ nʋɛ 'mʋ 'ɛ nɩ ti, bʋ nu ꞊hapʋdɛ. 2 Le ꞊nʋ, ʋ nɩ ꞊tu 'le nahuin ‑tɩ ‑hʋɩn yrɛ, kɔ, ʋ nɩ po 'le ꞊yʋɛ. Kɛɛ, 'waa ꞊wlɩ bɩ nɔ 'yi lɛ, bʋ ꞊tuu 'o nahuin 'bii 'o.

3 Kɛ'ɛ nɩ, ‑bo nu 'waa leelɛ, ‑ɛ nue, ‑a nɩ ‑gbɛ, ti ‑hi la a ti 'yri, ‑a 'de la 'lu a lɛ‑hielɛ kɔ. ‑A 'nɩ ꞊tuu ꞊le la 'o nahuin. ‑A 'waan la ꞊hapʋ'hru nɩ. 'Yilɛnyre‑tɔplɩ a gblegblei, nɩ‑ ‑aa la nu. Ɩ ‑do a ‑gbɛ, nɩ‑ ‑aa la 'lu ‑wɔn lɛ ‑hie, ꞊aa la ca ꞊tu. Nahuin yraa la ‑a mʋ nɩ, ‑a nɩ ‑gbɛ, ꞊a yrʋʋ la ‑wɛ. 4 ꞊Hapʋkɔ, ꞊aa la lɛ nu, kɛɛ, Nyɩsʋa ꞊nʋ, ‑ɔ mɔ ‑a nɩ Waanyɔ, ɔ tʋɛ ‑a mʋ nɩ, ‑ɛ mɔ, ɔɔ nahuin 'bii 'mʋ nu ꞊hapʋdɛ, kɔ, ɔ nʋʋ 'mʋ nɩ 'dɔ. 5 Ɛ ꞊hɛn 'nyrɛ, ɔ waa ‑a mʋ nɩ, 'ke 'le ‑gbʋgbɛkɔ 'kwli 'mʋ. Ɛ 'de ‑baa ꞊hapʋ‑tɔplɩ nu a ‑tɩ, ɔ 'de ‑a mʋ waa. Kɛɛ, ɔ waa ‑a mʋ nɩ, ‑ɛ nue, ɔ 'ye ‑a nɩ wɔlɩ. Dɛ 'kuku ꞊nʋ, ‑ɛ nɩ la 'o ‑a mʋ 'lu, ɔ ‑hɩɛ 'o ꞊o. Ɔ nue nɩ, 'ke 'le 'a ‑Hihiu a 'klɩ 'kwli 'mʋ, ‑ɛ die nu, ‑a 'mʋ kʋɛwɩɩ 'hɔn nu, kɔ, ‑a 'mʋ 'klɔ yrayrʋ kɔ. 6 Nyɩsʋa nue nɩ, 'a ‑Hihiu 'ʋ kɔɔ ‑a mʋ win ke 'bii, dɛ ꞊nʋ, ‑a nɩ Waanyɔ ‑Yusu 'Klɩsʋ nu a ‑tɩ. 7 Kɛ'ɛ nɩ, ɔ nu 'a nunue, ‑ɛ die nu, ‑a 'mʋ 'klɔ yrayrʋ ꞊nʋ kɔ, ‑ɔ 'nɩnɩ ‑wɛ 'le, ‑ɔ kɔ ‑tɩ ‑a yi, ɔ di ‑a mʋ ‑nyi, ꞊a nyo ‑pre. Kɛ'ɛ nɩ, ɛ nɩ 'mʋ, ‑ɛ nue, ɔ nu ‑a mʋ 'mʋ ꞊hapʋdɛ, 'ke 'le ‑gbʋgbɛkɔ 'kwli 'mʋ, kɔ, 'ɔ 'sii 'o ‑a mʋ ye, 'ke 'o 'a dɩɔnʋ ye.

8 ‑Tɩ ꞊nʋ, 'nɩɩ ꞊tu, ɩ mɔ ‑tɩ a ‑tɛɛ nɩ. 'N nye 'nɩ ‑hʋa, 'ke ‑bo 'nɩɩ ke, ‑ɛ die nu, nahuin ꞊nʋ, ‑ʋ kuo Nyɩsʋa ꞊wlʋ ye, ʋ 'mʋ 'o 'cipi, ʋ 'mʋ ꞊hapʋdɛ nu. Wintɛ ‑gbo, ‑aa tɔɔ, nɛ‑ nɔ 'yi lɛ, 'ɛɛ nahuin 'mʋ ‑hɛ. 9 Gblɛ ꞊nʋ, ‑ɛ 'nɩnɩ da dɛ ꞊de, ꞊nɩ po 'le 'le ‑na wuntɔ. 'Bɩa nahuin 'bʋʋ gblɛ po, 'ke 'o ‑a nɩ bunʋ a ꞊hrɩn a ꞊hrɩn a dɛ ke, ꞊nɩ po 'le 'le wuntɔ. Ʋ kɔ ‑mʋ 'hɛɛn, a nɩ po 'le ꞊yʋɛ. Kɔ, a nɩ po 'le gblɛ, 'ke 'o Moise a tetei ke. ‑Tɔplɩ a ‑gbɛ, ɩ 'nɩ da ꞊le dɛ ꞊de, kɔ, ɩ 'nɩ ‑hɛ ꞊le nahuin 'mʋ. 10 Nahuon 'bɔɔ ‑Yusu a nahuin yrɛ ‑gbʋgba, ye‑hɛdɛ, tio. 'Bɔ 'kɩɛ gbɛɛ 'lu ‑wɔn, tio lele. 'Bɔ 'kɩɛ 'dee wɛn ‑mʋ nʋa ye gbo a pue, ‑ye ‑bo hron ‑wɔn. 11 'Be ‑n yie nɩ, ‑ɛ mɔ, nahuindʋ a ‑gbɛ, ‑ʋʋ lɛ nu, ʋ 'waan ꞊hapʋ'hru nɩ. Ʋ mɔ dɛ'kukununyʋ'ʋ nɩ. 'Waa dɛ 'kuku a ‑gbɛ, ʋʋ nu, ɛ nye nahuin 'nɩ tɔɔ, ‑ɛ mɔ, 'ke ʋ nɩ 'le kɩka ‑hɛyri.

12 'N di le nahuon, 'ke 'le ‑mʋ ‑wɔn. 'Bɛ 'de Atimasɩ, ‑ye Tisikɩɩ nɩ. 'Bɔ di 'le, ‑ye ‑bo ꞊tu 'o 'klɩ, ‑bo mu 'le Nikopolidɩɔ 'mʋ, ꞊mʋ 'le 'mʋ gbo yɛ, ‑ɛ nue, 'n pue 'le ꞊le, cɛ a ti 'yri, 'ke 'n di 'le gbo mu nɩ. 13 Nahuin ꞊nʋ, ‑ʋ mɔ Sɩnasɩ, ‑ɔ yi tetei, ɔ kɔ Apɔlɔsɩ 'hɛɛn, 'bʋʋ 'le 'a mʋ ‑wɔn 'mʋ ‑hɔn, ‑hɩʋ 'mʋ, 'ke 'o 'dagba a ‑ta 'mʋ, ‑ɛ die nu, 'waa ‑tɔplɩ 'mʋ ꞊cɛ. 14 Nahuin ꞊nʋ, ‑ʋ kuo ‑Yusu 'Klɩsʋ ꞊wlʋ ye, ‑ɛ 'we ꞊nɔ ‑a mʋ ye, bʋ 'nyɩ ‑wɛ ‑tɛ ʋ di nu, ʋ 'mʋ ꞊hapʋdɛ nu 'ɛ nɩ ti, ‑ɛ die nu, ʋ 'mʋ nahuin ꞊nʋ 'mʋ ‑hɛ, ‑ʋʋ ꞊sʋɛ 'ye. 'Bɩa 'bʋʋ lɛ nu, ‑ye 'waa nunuklɔ 'deɛ bɔ 'ya ‑gbʋgbɛ 'mʋ.

15 Nahuin 'bii, ‑ʋ kɔ 'mʋ 'hɛɛn, ‑ʋ nɩ nɔ, ʋ ꞊gba ‑mʋ wlɔn lɛ ‑tɛɛ. ‑A ꞊gba ‑wɛ Nyɩsʋa a nahuin 'bii wlɔn lɛ, ‑ʋ nʋɛ ‑a mʋ 'mʋ. Nyɩsʋa bɔ nu a 'bii ꞊hapʋdɛ 'mʋ.