13
Lia dadomin
1 Masik ita simu babelen atu dale hodi ema raiklaran lian hotu-hotu no makbukar laleꞌan lian moos, mais ita la hadomi ema seluk, itakaan babelen nia la noo folin. Itakaan dale nia mamuk, hanesan tala lian no ton lian mak la noo isin. 2 Masik ita simu babelen atu dadi Maromak makoꞌan hodi hatoꞌo Niakaan mamenon, mais ita la hadomi ema seluk, itakaan babelen nia la noo folin. Masik ita simu matenek toꞌo hatene lia subar hotu-hotu no lia seluk hotu-hotu moos, mais ita la hadomi ema seluk, itakaan matenek nia la noo folin. Masik ita fiar biit baa Naꞌi Maromak toꞌo bele lori foho sia moos, mais ita la hadomi ema seluk, itakaan fiar nia la noo folin.✡Mateus 17:20, 21:21; Markus 11:23 3 Masik ita faꞌan mohu itakaan sasoin, hotu faꞌe osan hotu-hotu hodi hahaan ema mukit sia moos, mais ita la hadomi ema seluk, itakaan hahalok nia la noo folin. Masik ita latan itakaan isin lolon dadi baa sera toꞌo mate moos,*Hakerek Moon lia Yunani balu nakerek tuꞌan iha neꞌe naꞌak, “latan isin lolon dadi baa sera tunun”. mais ita la hadomi ema seluk, itakaan moris nia la noo folin. Ita la bele foti aan kedan, tan butan dei.
4 Ita hadomi ema seluk, neꞌe naꞌak, ita halo lia kabaas bodik sia.
Ita hetu aan.
Ita la tinu.
Ita la haksaꞌek aan.
Ita la loko aan.
5 Ita foo kneter.
Ita la buka tuir itakaan beer duꞌuk.
Ita la nawan aat.
Ita la rai hirus.
6 Ita la simu hahalok kliꞌis,
mais ita neon diꞌak baa hahalok moon.
7 Masik ema nalo ita nunabee moos, ita simu hodi hadomi sia.
Ita fiar sia nohuun.
Ita haloon bodik sia nohuun.
Ita hadomi sia nohuun.
8 Tan lia dadomin mak nafati nohuun.
Mais kalo ita simu babelen atu hatoꞌo Naꞌi Maromak mamenon, kleu-leur babelen nia la noo folin ona. Kalo ita simu babelen atu dale hodi lia oi-oik, kleu-leur babelen nia la noo folin ona. Kalo ita simu matenek, kleu-leur lia nia la noo folin ona. 9 Oras neꞌe, itakaan matenek oan ida dei. Itakaan babelen atu hatoꞌo Naꞌi Maromak mamenon moos oan ida dei. 10 Nosi ikus, oras Naꞌi Maromak natetu hotu-hotu, lia mak kiꞌik oan nunia, la noo folin ona.
11 Haꞌu katete nuneꞌe: oras haꞌu ksei lawarik oan, haꞌu kaneo ahan lawarik oan. Haꞌu moos dale ahan lawarik oan. Mais oras neꞌe, haꞌu kdadi matas tiꞌan. Etuk, haꞌu la kalo aan ahan lawarik oan tenik.
12 Haꞌu katete seluk tenik nuneꞌe: oras neꞌe, ita ahan ema mak haree hodi lalenok kadoor, tan saa mak ita haree sei la malorek dauk. Mais kleu-leur, hotu-hotu atu dadi malorek, toꞌo ita haree hanesan haree besik oin. Oras neꞌe, saa mak haꞌu katene, oan ida dei. Mais kleu-leur, haꞌu kbele katene mohu, hanesan Naꞌi Maromak moos natene mohu haꞌu.
13 Oras neꞌe, noo lia oik tolu mak nafati nohuun. Lia nia sia mak neꞌe:
Ita musti fiar nohuun.
Ita musti haloon nohuun.
Ita musti hadomi malu nohuun.
Nosi lia oik tolu neꞌe, lia dadomin mak folin kaliuk.
✡13:2 Mateus 17:20, 21:21; Markus 11:23
*13:3 Hakerek Moon lia Yunani balu nakerek tuꞌan iha neꞌe naꞌak, “latan isin lolon dadi baa sera tunun”.