3
Ema la noꞌuk rona Maromak
1 Nosi osa no lotuk fuik hotu-hotu mak MAROMAK naseꞌi tiꞌan iha raiklaran, samea mak matenek beꞌur. Baa dala ida, samea ida nusu feto nia naꞌak, “Tebes ka? Naꞌi Maromak badu naꞌak, la bele haa ai fuan nosi toꞌos neꞌe ka?”
2-3 Feto nia nataa naꞌak, “Lale! Ami bele haa! Ai huun ida dei iha toꞌos klaran mak Naꞌi Maromak badu. Ami la bele haa ai huun nia fuan. Kaer dei moos, la bele, tan ami nanis mate!”
4 Mais samea nataa naꞌak, “Lahoos nunia! Emi la mate! 5 Naꞌi Maromak badu nunia, tan Nia natene kalo emi haa ai fuan nia, emi dadi matenek manesak no Nia! Emi moos bele hatene saa mak diꞌak no saa mak aat.”
6 Rona nola nunia, feto nia naree ai huun nia kabaas lo-loos. Fuan moos arumak midar tebes. Nia naneo naꞌak, “Kalo haꞌu kaa ai fuan neꞌe, haꞌu nanis matenek ona.” Hotu, nia kuꞌu nola, naa kedan. Nia moos nodi foo baa laꞌen. Laꞌen moos naa. 7 Sia rua naa notu, sarebak natene baa, sia nakwalan. Hotu, sia noman ai tahan nodi taka isin lolon, tan sia moe.
8 Loro malirin, sia rona MAROMAK laꞌo iha toꞌos laran. Mais sia nakfunin iha ai huun kotuk, nebee MAROMAK la naree sia. 9 Hotu, MAROMAK bolu mane nia naꞌak, “Hei Adam! O iha nabee?”
10 Mane nia nataa naꞌak, “Haꞌu koꞌi rona Naꞌi Maromak lian iha neꞌe. Mais haꞌu kmoe aan, tan kakwalan. Foin, haꞌu kalai baa kakfunin.”
11 Rona nola nunia, Maromak nusu naꞌak, “See mak katak naꞌak o makwalan? Keta arumak o maa tiꞌan ai fuan mak Haꞌu kbadu nia!”
12 Nia moos nataa naꞌak, “Feto mak Naꞌi Maromak latan namalu haꞌu nia, mak foo haꞌu kaa ai fuan nia!”
13 Rona nola nunia, MAROMAK nusu feto nia naꞌak, “Tan saa o malo nunia?”
Feto nia nataa naꞌak, “Tan samea mak beꞌur haꞌu, foin haꞌu kaa ai fuan nia.”
Naꞌi Maromak natuun kastikar
14 Hotu, MAROMAK natuun kastikar baa samea naꞌak,
“Tan okaan hahalok neꞌe, haꞌu ktaa ukun baa o. Osa no lotuk seluk sia la kona ukun neꞌe. Nahuu baa oras neꞌe toꞌo o mate, o maneꞌe loos modi o kabun no o maa iha rai dei. 15 O mo feto neꞌe, funu malu nima-nimak. Emikaan husar-binan moos nunia. Okaan husar-binan atu nadodok ema ain nuban. Mais feto neꞌe niakaan husar-binan ida atu nadodok okaan ulun.”
16 Nunia hotu, Maromak katak baa feto nia naꞌak,
“Haꞌu atu tuꞌan okaan susar baa oras koꞌus, no tuꞌan moras baa oras mahoris. Masik nunia moos, o sei beer okaan laꞌen bei-beik! Nia moos ukun o!”
17 Nunia hotu, Maromak katak tenik baa mane naꞌak,
“O la tuir Haꞌukaan ukun, mais tuir okaan feen hakaran, toꞌo o maa ai fuan mak Haꞌu kbadu nia. Tan lia nia, o moos kona kastikar. Rai moos kona kastikar. Nahuu baa oras neꞌe toꞌo o mate, o musti serwisu susi ruin fila rai, nebee bele metan haan. Modi serwisu nunia, foin o bele moris. 18 Masik o furi oi-oik moos, rai natubu ai tarak no meik. 19 O musti serwisu susi ruin, foin rai foo haan baa o. O musti serwisu masai kosar nunia, toꞌo mate. Haꞌu kaseꞌi o kosi rai. Oras o mate, o fila mikar baa rai.”
20 Nunia hotu, Adam nanaran feen naꞌak Efa, tan nia mak ema horis hotu-hotu inan. (Iha lia Ibrani, efa lia isin naꞌak ‘mak moris’.)*Iha lia Ibrani, lia fuan adam, lia isin naꞌak ‘ema’.
21 Hotu, MAROMAK nola kulit, nalo baa tais, foo baa sia rua natais.
Maromak teꞌur sai Adam no Efa
22 Hotu, MAROMAK katak naꞌak, “Oras neꞌe, ema natene tiꞌan saa mak diꞌak no saa mak aat, hanesan Ita. Keta toꞌo, sia naa tenik ai fuan nosi ai huun mak foo moris nima-nimak.” 23 Hotu, MAROMAK teꞌur sai Adam no Efa nosi toꞌos Eden, baa fatin seluk atu moris nosi fila rai. Tan ema huun nosi rai, sia musti moris nosi rai. 24 Teꞌur sai tiꞌan, Maromak naruka Niakaan makbukar laleꞌan mahoo liras sia,†Makbukar laleꞌan mahoo liras, hodi lia Ibrani naꞌak, kerubim. baa daka toꞌos nia iha lorosaꞌe. Sia kaer surik lakan nuꞌu haꞌi, bakut baa-mai. Naruka sia taka dalan tataman, tan la noꞌuk ema kuꞌu nola ai fuan mak foo moris nima-nimak.