Hakerek nosi
Yudas
1
Tabe
1 Tabe nosi haꞌu, Yudas. Haꞌu neꞌe, itakaan Naꞌin Yesus Kristus ain-liman. Haꞌu moos, Yakobus alin.
Haꞌu kakerek neꞌe bodik ema hotu-hotu mak Ama Maromak boi tiꞌan. Nia nadomi emi. No Yesus Kristus moos babilan emi nohuun.✡Mateus 13:55; Markus 6:3 2 Haꞌu kakroꞌan nebee Nia natudu dodan, nodi fakar Niakaan dadomin waꞌin baa emi, nebee emi bele moris manek no dame.
Yudas nalore nosi ema mak nanorin kaleꞌuk
3 Mamaluk sia mak haꞌu kadomi! Uluk, haꞌu kbeer kakerek bodik emi lia nosi Naꞌi Maromak sori ita. Mais oras neꞌe, noo lia mak seten haꞌu atu kakerek lia ida seluk. Naꞌi Maromak foo hanorin loos baa ita nebee ita bele dadi Niakaan ema moon. Hanorin nia nafati toꞌo nima-nimak. Haꞌu kusu nebee emi hakaꞌas aan kaer metin hanorin nia.
4 Mais haꞌu krona noo ema naꞌin hira mak tama no-nook iha emikaan klaran tiꞌan. Sia la moris tuir Naꞌi Maromak hanorin loos, mais moris tuir siakaan nawan aat dei. Sia katak naꞌak, tan Naꞌi Maromak laran diꞌak, sia la netan kastikar. Mais lia nia, lia kaleꞌuk! Sia dale seluk, sia nalo seluk! Sia nakara nebee ita lalika rona tenik baa itakaan Naꞌin no itakaan Ulun Yesus Kristus. Mais hanoin, tan Hakerek Moon naꞌak, Naꞌi Maromak nakotu kedan hori uluk lia nosi siakaan kastikar.
Naꞌi Maromak nanis kastikar ema mak nanorin kaleꞌuk, hanesan Nia kastikar makbukar laleꞌan mak nalo aat no ema raiklaran mak nalo aat
5 Lia mak haꞌu atu katak neꞌe, emi hatene tiꞌan. Mais haꞌu kakara katak tenik baa emi, nebee sintidu.
Hanoin lia uluk baa oras ema Israꞌel sia sai nosi Mesir. Naꞌi Maromak sori siakaan klubun boot nia, mais baa loron ikus, Nia nadodok sia hotu-hotu mak la noꞌuk fiar baa Nia.✡Ema Israꞌel Sai Nosi Mesir 12:51; Sura Renu Israꞌel 14:29-30
6 Knaninuk seluk nosi lia Naꞌi Maromak Niakaan makbukar laleꞌan. Naꞌi Maromak latan beran baa sia, mais noo kladik. Sia balu noran la toꞌo, hotu nakur liu siakaan beran nia. Tan baa nia, Naꞌi Maromak kesi sia no neti natoos sia iha fatin makukun, nebee sia nein iha nia toꞌo oras Naꞌi Maromak tetu ema hotu-hotu moris.
7 Keta haluꞌa tenik kota Sodom no kota Gomora, no leo seluk sia mak kreꞌis iha nia. Ema iha nia sia nalo lia kfoꞌer no aat oi-oik mak la makonak. Tan lia nia, Naꞌi Maromak nabeꞌo dodok sia nodi haꞌi. Lia neꞌe nalore baa ita naꞌak, Naꞌi Maromak atu nodi haꞌi naraka mak laka bei-beik atu kastikar aꞌaat hotu-hotu.✡Lia Uluk Fohon 19:1-24
8 Ema mak tama iha emikaan klaran nia, sia hanorin kaleꞌuk nohuun. Sia nodi meꞌi dadi baa krarain atu nalo isin lolon sasobo. Sia sakar karin ema mak kaer beran, no nahaat beran diꞌak sia iha laleꞌan. 9 Mais Naꞌi Maromak Niakaan makbukar laleꞌan ulun naran Mikael la nalo nuꞌu sia. Baa oras Musa foin mate, Mikael toe no diabu ulun nosi Musa maten. Mais Mikael la nasalak nia, lale nahaat nia. Nia katak loos naꞌak, “Naꞌi Maromak nasee o, foin o matene!”✡Daniel 10:13,21, 12:1; Lia Raiklaran Falu Fila 12:7; Hanoin Hikar Dalan Moris 34:6; Sakarias 3:2 10 Mais ema mak tama iha emikaan klaran nia, sia la nuꞌu Mikael. Sia nahaat no naleuk lia hotu-hotu mak sia la natene. Sia momok nuꞌu karau, toꞌo nadodok siakaan isin lolon duꞌuk. 11 Sia nanis netan kastikar, tan sia nuꞌu Kain mak noꞌo alin duꞌuk. Sia moos nalo hanesan Bileam mak nakara nalo saa dei, surak netan osan. Sia moos nalo hanesan Kora mak dodok tan sakar Naꞌi Maromak. Tan siakaan aꞌaat nia, sia atu kona lelen nosi Naꞌi Maromak.✡Lia Uluk Fohon 4:3-8; Sura Renu Israꞌel 22:1-35, 16:1-35
12 Kalo ema aat nia sia namutuk no emi oras emi hanoin Naꞌi Maromak dadomin hodi haa-hemu hamutuk, sia rotus teen, la moe aan. Emi musti daka aan diꞌa-diꞌak, tan sia hanesan fatuk moris iha tasi, mak bele nadodok roo.*Lia fuan Yunani iha neꞌe bele naꞌak “fatuk moris”. Moos bele naꞌak “kadoor mak nalo sasobo”. Sia moos hanesan kaloꞌan metan iha rai maran leten, mak la natuun udan fuan ida kois. Sia dale waꞌin, mais la nalo nola lia diꞌak ida kois. Sia nuꞌu ai horis mak la folin. Oras nafua, la noo fuan ida kois, tan ema nuꞌan no fokit sai toꞌo abut tiꞌan. 13 Siakaan hahalok nia namoe ita. Sia hanesan laloran boot mak soe nela furin kadoor tuir tasi tehen. Sia hanesan fitun mak mosu no lori nahutan iha laleꞌan. Nosi ikus, Naꞌi Maromak soe sia baa fatin makukun ida, nebee lakon mohu iha nebaa.
14 Hanoin baa Henok, mak husar-binan dala hitu nosi Adam. Nia katak kedan hori uluk nosi ema oin nuneꞌe sia naꞌak,
“Haree kokon!
Naꞌi Maromak namaan aan mai no Niakaan makbukar moon sia.
Sia waꞌin basuk, toꞌo la bele sura hola.✡Lia Uluk Fohon 5:18,21-24
15 Nia namaan aan mai atu nakotu ema hotu-hotu lian.
Nosi ikus, Nia atu natudu ema ida-idak salan,
nodi loke walan lia la loos sia.
Hotu, Nia atu natuun kastikar baa ema aat sia,
tan sia dale nahaat Nia.”
16 Ema mak tama iha emikaan klaran nia, sia natene loos nakmuuk. Sia tula sala bei-beik baa ema. Sia moris tuir siakaan nawan aat dei. Sia dale loko aan. Sia dale namina aan nola ema neon, nebee ema tuir sia.
Hariik emikaan fiar hodi moris moos
17-18 Mamaluk sia mak haꞌu kadomi! Keta haluꞌa lia mamenon mak itakaan Naꞌin Yesus Kristus klosan sia katak kedan baa emi naꞌak, kreꞌis rai falu fila, ema maleuk teen sia atu mosu mai. Sia nahaat itakaan fiar no moris tuir siakaan nawan aat.✡2 Petrus 3:3 19 Oras neꞌe, ema nia sia iha tiꞌan. Sia sasuku baa-mai, nalo ita faꞌe karin malu. Sia natene moris tuir raiklaran beer dei, tan Kmalar Lulik la noo iha siakaan neon laran.
20 Mais lia nuneꞌe mamaluk sia! Emi musti hariik emikaan fiar hodi moris moon. Hamulak tuir saa mak Kmalar Lulik natudu baa emi. 21 Hanoin! Naꞌi Maromak nadomi emi liu resik. Dadi, daka aan hodi hanoin Niakaan dadomin nia. Haloon biit nebee itakaan Naꞌin Yesus Kristus natudu dodan nodi foo moris nima-nimak baa emi.
22 Kalo noo ema mak sei la fiar biit, emi musti hatudu dodan baa sia. 23 Sori hola ema mak naksees nosi dalan moris loos, hanesan emi dada sai sia hosi haꞌi laran. Dodan ema seluk sia mak nalo sala. Mais sintidu, tan keta toꞌo siakaan aꞌaat nahaat nola emi. Hakribi siakaan sasobo, hanesan ema nakribi faru kadoor.†Hakerek Moon lia Yunani naꞌak “Hakribi siakaan faru kadoor.” Neꞌe naꞌak “Hakribi siakaan aꞌaat.”
Yudas latan ema makfiar baa Naꞌi Maromak liman nebee Nia lituk sia
24 Tonu-haboot Naꞌi Maromak!
Tan Nia mak noo beran atu lituk ita,
nebee ita la hakloti.
Nia mak noo beran atu nalaꞌo ita,
nebee ita hariik iha Niakaan oin,
la hoo sala ona,
la sasobo ona.
Ita neon boot lo-loos hariik iha Niakaan oin,
hodi haree Niakaan ahar maksinak.
25 Nia mesan,
Maromak mak loos.
Nia mesan
mak sori ita
nodi itakaan Naꞌin Yesus Kristus.
Ita foo kneter hotu-hotu baa Nia.
Nia makaꞌas kaliuk.
Niakaan beran boot kaliuk.
Nia kaer ukun hotu-hotu,
hori uluk,
baa oras neꞌe,
toꞌo nima-nimak.
Tebes!
Nosi haꞌu,
Yudas
✡1:5 Ema Israꞌel Sai Nosi Mesir 12:51; Sura Renu Israꞌel 14:29-30
✡1:9 Daniel 10:13,21, 12:1; Lia Raiklaran Falu Fila 12:7; Hanoin Hikar Dalan Moris 34:6; Sakarias 3:2
✡1:11 Lia Uluk Fohon 4:3-8; Sura Renu Israꞌel 22:1-35, 16:1-35
*1:12 Lia fuan Yunani iha neꞌe bele naꞌak “fatuk moris”. Moos bele naꞌak “kadoor mak nalo sasobo”.
✡1:14 Lia Uluk Fohon 5:18,21-24
†1:23 Hakerek Moon lia Yunani naꞌak “Hakribi siakaan faru kadoor.” Neꞌe naꞌak “Hakribi siakaan aꞌaat.”