13
Oras sei noo leet, emi musti halo neon aat baa sala
1 Baa oras nia, noo ema katak baa Yesus naꞌak, Gubernur Pilatus noꞌo ema Yahudi naꞌin hira nosi Galilea, oras sia nodi sera baa Naꞌi Maromak iha Uma Hamulak Huun iha Yerusalem. 2 Rona nola nunia, Yesus nusu naꞌak, “Nuꞌunabee? Ema Galilea mak kona hoꞌo nia sia, siakaan salan, boot liu nosi ema Galilea seluk ka? 3 Lale! Mais kalo emi la halo neon aat baa emikaan salan, hodi fila baa Naꞌi Maromak, emi moos atu dodok nuꞌu sia. 4 Uluk, noo ema naꞌin sanulu resin walu mak mate tan tetu aas nakroꞌon kona sia iha Siloam. Siakaan salan boot liu nosi ema Yerusalem seluk sia ka? 5 Lale! Mais kalo emi la halo neon aat baa emikaan salan, hodi fila baa Naꞌi Maromak, emi moos atu dodok nuꞌu sia.”
Lia hatetek nosi ai huun mak la nafua
6 Hotu Yesus katak lia hatetek ida naꞌak, “Noo ema ida mak noo ai huun mafuak iha toꞌos.*Hakerek Moon lia Indonesia tau lia fuan ‘pohon ara’ nosi lia fuan Yunani sukein. Mais sukein natudu ai huun ida iha nebaa, mak ema naa fuan. Iha Timor, noo ai huun ‘ara’ mais ema la naa fuan. Dadi, ‘ai huun ara’ iha Hakerek Moon, la manesak no itakaan ai huun ara iha Timor neꞌe. Nia mai bei-beik tanaat atu natene ai huun nia nafua tiꞌan ka, sei. Mais mana baa mai, sei dauk. 7 Naree nunia, ema nia naruka mafaho toꞌos naꞌak, ‘Tinan tolu tiꞌan, haꞌu kmai bei-beik buka ai huun neꞌe fuan, mais la ketan. Diꞌak liu, muꞌan ona, tan naa fatik dei.’
8 Mais mafaho toꞌos nataa naꞌak, ‘Ama keta kanarak. Foo leet baa ai huun neꞌe tinan ida tenik. Mabusik haꞌu kafaho kodi babilan. 9 Kalo tinan oin neꞌe sei la nafua, foin huꞌan.’ ”
Yesus nadiꞌak nola feto kotuk fuꞌur baa loron hamulak
10 Ema Yahudi loron hamulak toꞌo mai tiꞌan, Yesus baa nanorin iha uma hamulak. 11 Iha nia, noo feto ida mak kotuk fuꞌur tinan sanulu resin walu tiꞌan, tan diabu hahalok. Feto nia la bele nalolo aan. 12 Titu-naree feto nia, Yesus dale naꞌak, “Ina! Ina diꞌak ona.” 13 Yesus moos rai liman baa feto nia. Teki-tekis, niakaan kotuk fuꞌur naklolok kedas. Nia moos tonu-naboot Naꞌi Maromak.
14 Mais uma hamulak ulun krakat, tan Yesus nadiꞌak nola ema baa loron hamulak. Nia katak baa ema nia sia naꞌak, “Domiku ida, serwisu loron neen. Diꞌak liu, hadiꞌak hola ema moras baa loron serwisu dei, keta baa loron hamulak!”✡Ema Israꞌel Sai Nosi Mesir 20:9-10; Hanoin Hikar Dalan Moris 5:13-14
15 Mais Yesus nataa naꞌak, “Hoi! Tolek teen! Baa loron hamulak, emi moos serwisu. Emi habusik karau baka no kuda keledai atu haroo. 16 Ina neꞌe, Bei Abraham husar-binan, hanesan emi. Diabu ulun kesi nia tinan sanulu resin walu tiꞌan. Kalo Haꞌu kabusik nia baa loron hamulak, lia nia sala ka?”
17 Rona nola nunia, Yesus funun sia moe. Mais ema lear neon diꞌak tan Niakaan serwisu kabaas.
Lia hatetek nosi ai fuan musan kiꞌik basuk
(Mateus 13:31-32; Markus 4:30-32)
18 Hotu Yesus dale natutan tenik naꞌak, “Haꞌu atu kanesa Naꞌi Maromak hutun-renu nuꞌu saa? 19 Nuneꞌe: uluk fohon, sia naꞌin hira dei. Mais kleu-leur sia hetak waꞌin. Sia nahuu hanesan ai fuan musan kiꞌik basuk mak ema furi iha toꞌos.†Hakerek Moon lia Yunani naꞌak, “masik emi fiar hanesan ai musan σίναπι (sinapi).” Sinapi nia, ai musan mak kiꞌik oan, mais nia tubu boot toꞌo aas roꞌa tolu. Ai oik nia la noo iha rai Timor. Kleu-leur moris mai, dadi ai huun boot. Toꞌo manu ai leten sia mai, nalo knuuk iha sorun.”
Lia hatetek nosi tua teen
(Mateus 13:33)
20 Hotu Yesus dale tenik naꞌak, “Haꞌu atu kanesa Naꞌi Maromak hutun-renu nuꞌu saa tenik? 21 Nuneꞌe: sia hanesan tua teen mak feto sia kahur baa tubi rahun‡Hakerek Moon lia Yunani naꞌak tubi rahun sata tolu. Sata ida, takseer liter sanulu resin rua. Dadi, sata tolu, tubi rahun liter tolu nulu resin neen. atu nalo tubi. Tubi nia saꞌe toꞌo boot, tan tua teen oan nia. Naꞌi Maromak hutun-renu moos keke lema nunia.”
Laleꞌan odamatan loot basuk
(Mateus 7:13-14,21-23)
22 Nunia hotu, Yesus sia nahuu laꞌo baa kota Yerusalem. Iha dalan sia tuur tuli iha kota no leo nodi nanorin ema. 23 Iha fatin ida, noo ema ida nusu baa Yesus naꞌak, “Ama Boot! Tuir Ama hanorin, ema uit dei mak bele netan moris ka?”
24 Yesus nataa naꞌak, “Laleꞌan odamatan tataman nia, loot basuk. Harui aan diꞌa-diꞌak, nebee bele tama. Oras rai falu fila, ema waꞌin nakara tama, mais la bele ona, tan la noo leet tiꞌan. 25 Keta toꞌo uma naꞌin kusa odamatan tiꞌan, hotu emi hariik deku-deku odamatan, hodi husu tulun haꞌak, ‘Ama boot! Loke lai!’
Masik emi husu tulun nunia moos, uma naꞌin nia atu nataa naꞌak, ‘Emi neꞌe see? Haꞌu la katene emi!’
26 Hotu emi hataa haꞌak, ‘Oin nuꞌu saa, ama boot la matene ami? Ami mak loron-loron haa-hemu ho ama boot. Ama boot moos nanorin ami iha amikaan leo.’
27 Mais uma naꞌin nia nataa tenik naꞌak, ‘Haꞌu katak tiꞌan! Haꞌu la katene emi! Emi neꞌe, mahalok aat. Sees hosi neꞌe!’✡Kananuk Sia 6:9
28 Hotu emi atu tanis hadeꞌun aan hodi ruun neꞌan, tan titu-haree Bei Abraham, Bei Isak, Bei Yakob no makoꞌan hotu-hotu tuur bele-bele iha Naꞌi Maromak tofatik tiꞌan. Mais emi kona teꞌur baa luan.✡Mateus 22:13, 25:30 29 Ema seluk sia moos tuur naa bele-bele iha nia. Sia mai nosi rai ikun toꞌo rai ulun, nosi lorosaꞌe toꞌo loromonu, nosi lorokaras toꞌo lorokbelan.✡Mateus 8:11-12 30 Hatadan lia neꞌe diꞌa-diꞌak: Baa oras rai falu fila, ema mak uluk ema kiꞌik, Naꞌi Maromak nafoli naꞌak, ema boot. Mais ema mak uluk ema boot, Naꞌi Maromak nafoli naꞌak, ema kiꞌik.”✡Mateus 19:30, 20:16; Markus 10:31
Yesus neon monu baa ema Yerusalem
(Mateus 23:37-39)
31 Baa oras nia, ema Farisi naꞌin hira mai nasoru Yesus nodi katak naꞌak, “Diꞌak liu Ama Boot hakiduk baa fatin seluk, tan Naꞌi Herodes buka Ama atu noꞌo.”
32-33 Mais Yesus nataa naꞌak, “Hoi! Ama katuas nia nuꞌu meda karonak! Baa katak nia haꞌak, ‘Haꞌu ksei teꞌur diabu no kadiꞌak kola ema moras baa ohin loron no awan. Wainrua, foin Haꞌu kserwisu mohu.’ Haꞌu la kakiduk baa fatin seluk, mais atu laꞌo liu baa Yerusalem, tan ema nakara noꞌo Maromak makoꞌan sia iha nebaa.
34 Adeei! Ema Yerusalem sia! Emi neꞌe mak hoꞌo Maromak makoꞌan sia. Emi moos mak tuda hoꞌo klosan mak mai natudu Niakaan dalan baa emi. Dala waꞌin tiꞌan Haꞌu kbeer klibur kodi lituk emi kosi aꞌaat, hanesan manu inan lituk oan nodi liras. Mais emi la hoꞌuk. 35 Oras neꞌe, Naꞌi Maromak seꞌi kotuk tiꞌan baa emikaan uma hamulak. Tan baa nia, awan-wainrua uma nia mamuk ona. Rona! Emi la haree tenik Haꞌu ona, toꞌo oras emi katak sain haꞌak:
‘Naꞌi Maromak natuun matak-malirin baa ema mak mai nodi Niakaan naran.’ ”✡Kananuk Sia 118:26
*13:6 Hakerek Moon lia Indonesia tau lia fuan ‘pohon ara’ nosi lia fuan Yunani sukein. Mais sukein natudu ai huun ida iha nebaa, mak ema naa fuan. Iha Timor, noo ai huun ‘ara’ mais ema la naa fuan. Dadi, ‘ai huun ara’ iha Hakerek Moon, la manesak no itakaan ai huun ara iha Timor neꞌe.
✡13:14 Ema Israꞌel Sai Nosi Mesir 20:9-10; Hanoin Hikar Dalan Moris 5:13-14
†13:19 Hakerek Moon lia Yunani naꞌak, “masik emi fiar hanesan ai musan σίναπι (sinapi).” Sinapi nia, ai musan mak kiꞌik oan, mais nia tubu boot toꞌo aas roꞌa tolu. Ai oik nia la noo iha rai Timor.
‡13:21 Hakerek Moon lia Yunani naꞌak tubi rahun sata tolu. Sata ida, takseer liter sanulu resin rua. Dadi, sata tolu, tubi rahun liter tolu nulu resin neen.
✡13:27 Kananuk Sia 6:9
✡13:30 Mateus 19:30, 20:16; Markus 10:31
✡13:35 Kananuk Sia 118:26