1 Hotu, Yesus no Niakaan maktuir sia toꞌo debu Galilea balu baa, iha fatin ida naran Gerasa. 2-6 Iha nia, noo mane ida mak diabu tekar toꞌo bula. Nia nein iha rate sia. Loron-kalan nia nakwalan dei, saꞌe-tuun foho nodi nahii nahutan karin. Nia nitak aan nodi fatuk, toꞌo isin lolon kanek mohu. Nia biit tebes, toꞌo ema la bele kesi nola nia. Ema kesi rua-ruan niakaan ain-liman nodi besi talik, mais nia nasiit nosi liman, no natohar nosi ain. Nia biit resik, toꞌo la noo ema ida mak bele namaus nola.

Baa oras Yesus no Niakaan maktuir sia tuun nosi bero, sama ain baa rai maran, ema bulak nia naree sia nosi dook. Hotu, nia nalai sai nosi rate baa Yesus. Toꞌo baa, nia nakniꞌa iha Yesus oin. 7-8 Naree nola nunia, Yesus naruka naꞌak, “Hoi! Diabu aat! Sai mela ema neꞌe ona!”

Hotu, ema nia nahii makaꞌas naꞌak, “Hoi! Ita Boot atu halo saa baa haꞌu?! Haꞌu katene Ita Boot neꞌe Yesus, mak Naꞌi Maromak Boot Kaliuk Oan. Haꞌu kaloon nebee Ita Boot keta hasusar haꞌu.”

9 Hotu, Yesus nakusuk nia naꞌak, “O naran see?”

Ema nia nataa naꞌak, “Haꞌu naran Legion, tan ami neꞌe waꞌin lear, hanesan sondadu klibur boot ida!”

10 Hotu, diabu nodi ema nia atu nakroꞌan nebee Yesus keta naruka sia sai nosi rai nia.

11 Kreꞌis baa nia, ema naꞌin hira noꞌi daka fahi lear mak buka haan iha foho leten. Sura fahi nia sia hotu-hotu, bele tama matan rihun rua. 12 Diabu sia nakroꞌan baa Yesus naꞌak, “Ita Boot haruka ami tama baa fahi nia sia dei.”

13 Rona nola nunia, Yesus moos noꞌuk. Hotu, diabu sia nalai sai nela ema nia, tama kedan baa fahi nia sia. Fahi nia sia hotu-hotu bula karin, nalai lakon tuun nosi foho nia, tama baa debu boot laran. Hotu, mate mout.

14 Titu-naree nunia, ema makdaka fahi nia sia nataꞌuk tebes. Sia nalai baa katak ema sura leo. Rona sia dale nunia, ema lear nalai sai mai atu naree saa mak dadi nia. 15 Sia baa nasoru Yesus, hotu naree ema mak diabu tekar nia noꞌi tuur iha nia. Nia diꞌak nikar no tau tais tiꞌan. Naree nunia, sia nataꞌuk hotu, tan sia natene nanis, see mak bele teꞌur sai diabu nosi ema nia, makaꞌas tebes. 16 Hotu, sia baa katak lema rai naꞌak, sia naree duꞌuk ema bulak nia diꞌak tiꞌan, no fahi nia sia moos mate mout tiꞌan. 17 Sia moos nakroꞌan, nebee Yesus sai nela rai nia.

18 Oras Yesus saꞌe baa bero, ema bulak ohin nia nakroꞌan atu tuir no Yesus.

19 Mais, Yesus la noꞌuk. Nia katak naꞌak, “Diꞌak liu o fila mikar, baa masara okaan familin sia nosi lia mak Naꞌi Maromak nalo tiꞌan baa o. O moos katak maꞌak, Naꞌi Maromak nadomi tebes o.”

20 Hotu, ema nia baa laꞌo lema rai ida mak noo leo sanulu, mak ema nanaran naꞌak, ‘Dekapolis’. Nia katak saa mak Yesus nalo tiꞌan baa nia. Rona nola nunia, ema hotu-hotu blaar nodi naꞌak, “Makaꞌas tebes!”

21 Hotu, Yesus no maktuir sia saꞌe bero, fila nikar debu boot balu baa. Oras sia tuun, ema waꞌin mai baa Yesus. 22 Iha nia noo ema ida naran Yairus. Nia, mak ema uma hamulak ulun iha leo nia. Oras naree Yesus, nia mai nakniꞌa iha Yesus oin, 23 nodi nakroꞌan naꞌak, “Ama, tulun lai! Haꞌukaan oan feto moras todan atu mate. Niakaan otas foin tinan sanulu resin rua. Kalo bele, Ama tulun haꞌu. Mai iha haꞌukaan uma, madiꞌak mola nia lai.”*Hakerek Moon lia Yunani naꞌak, “Ama tulun rai liman baa nia, nebee nia diꞌak nikar, no nia moris.” Lia fuan “tulun rai liman baa” neꞌe naꞌak, “tulun nadiꞌak nola.” Oa feto niakaan otas, iha Hakerek Moon tuir lia Yunani, iha lia tohar 42.

24 Rona nola nunia, Yesus tuir kedas baa Yairus uman.

Mais oras sia atu laꞌo, ema waꞌin moos tuir, toꞌo sia sesu malu oin-kotuk no karuk-kwana.

25 Iha ema waꞌin nia klaran, noo feto ida. Tinan sanulu resin rua tiꞌan, nia netan fulan mak la nanawa tuir loos. 26 Nia namohu niakaan osan no sasoin hotu-hotu, nodi selu makdook sia, nebee nadiꞌak nola nia. Mais, la noo makdook ida mak bele nadiꞌak nola nia. Niakaan moras nia, hetak kleur, hetak tuꞌan. 27-29 Nia rona tiꞌan lia waꞌin nosi Yesus. Tan lia nia, nia nakaꞌas aan iha ema waꞌin klaran, atu bele toꞌo baa Yesus nosi kotuk. Nia naneo naꞌak, “Surak haꞌu koko Niakaan faru dei, nanis haꞌu diꞌak!”

Oras nia koko lerek Yesus farun, laku matan dei, niakaan moras nanawa kedas. Nia noran diꞌak tebes. 30 Oras nia moos, Yesus noran beran sai. Tan baa nia, Nia titu fila baa ema waꞌin nia nodi nusu naꞌak, “See mak koko Haꞌukaan faru?”

31 Mais Niakaan maktuir sia nataa naꞌak, “Ama! Ama maree duꞌuk baa. Ema lear sesu malu nuneꞌe. Oin nunabee, ita bele hatene see?”

32 Mais Yesus titu baa-mai atu nodi natene see mak koko farun. 33 Rona nola Yesus nusu nunia, feto nia nataꞌuk tebe-tebes. Hotu, nia nakniꞌa iha Yesus oin nodi naberan aan katak naꞌak, “Ama! Haꞌu mak koko Ita Boot farun!”

34 Yesus moos nataa naꞌak, “Tan ina fiar tebe-tebes baa Haꞌu, ina diꞌak tiꞌan. Oras neꞌe, ina fila baa uma ona modi neon diꞌak.”

35 Yesus sei dale nunia, ema ida mai nosi Yairus uman nodi katak naꞌak, “Aikee! Ama oan mate tiꞌan. Lalika makole Ama Boot ona.”

36 Mais Yesus la titu dalen nia. Nia katak baa Yairus naꞌak, “Keta mataꞌuk! Fiar baa dei.” 37 Hotu, Yesus laꞌo nela Niakaan maktuir rumak sia, nodi mesan Petrus, Yakobus, no Yohanis liu baa. 38 Oras toꞌo Yairus uman baa, sia naree ema nalai baa-mai, no rona ema tanis nakrake. 39 Hotu, Yesus tama liu baa uma laran, nusu baa ema nia sia naꞌak, “Tan saa emi hasusar aan hodi tanis nunia? Oa neꞌe la mate. Nia toba dei.”

40 Rona nola Yesus dale nunia, sia nanasa Nia.

Mais Yesus naruka sia sai hotu. Nia bolu nola maktuir naꞌin tolu nia, no oa nia inan-aman, tama baa keꞌan laran. 41 Yesus kaer oa nia liman, hotu katak nodi siakaan lian naꞌak, “Talita kum!” Neꞌe naꞌak, “Bete! Madeer ona!”

42-43 Laku matan dei, oa nia nadeer nodi laꞌo kedas. Hotu, Yesus naruka oa nia inan naꞌak, “Mahaan nia lai!”

Ema hotu-hotu mak naree, blaar karin. Mais Yesus nakahik sia naꞌak, “Keta hasara baa ema, haꞌak Haꞌu mak kalo nia moris nikar!”