7
Naꞌi Maromak tau marak baa Niakaan ema naꞌin rihun atus ida haat nulu resin haat, nebee sia keta kona dinu
1 Hotu, haꞌu ktitu-karee makbukar laleꞌan naꞌin haat nariik baa raiklaran lidun haat. Sia saseni anin, nebee anin lalika nuu iha tasi, iha rai maran, no iha alas.✡Yeremia 49:36; Daniel 7:2; Sakarias 6:5 2 Naꞌi Maromak latan beran baa sia atu nadodok rai maran no tasi. Hotu, haꞌu ktitu-karee makbukar laleꞌan ida tenik mai nosi lorosaꞌe. Nia nodi marak nosi Naꞌi Maromak mak moris nima-nimak. Nia nahii baa makbukar naꞌin haat nia naꞌak, 3 “Hein lai toꞌo ami tau marak baa Naꞌi Maromak eman sia baboton, nebee sia keta kona dinu. Hotu tiꞌan, foin emi bele hahaat rai maran, no tasi, no alas sia.”✡Yeskiel 9:4, 6
4 Hotu, haꞌu krona kaꞌak, makbukar nia sia marak nola ema naꞌin rihun atus haat haat nulu resin haat. Sia nia, husar-binan Israꞌel, mak neꞌe:
5 nosi uma huun Yahuda, ema naꞌin rihun sanulu resin rua;
nosi uma huun Ruben, ema naꞌin rihun sanulu resin rua;
nosi uma huun Gad, ema naꞌin rihun sanulu resin rua;
6 nosi uma huun Aser, ema naꞌin rihun sanulu resin rua;
nosi uma huun Naftali, ema naꞌin rihun sanulu resin rua;
nosi uma huun Manase, ema naꞌin rihun sanulu resin rua;
7 nosi uma huun Simeon, ema naꞌin rihun sanulu resin rua;
nosi uma huun Lewi, ema naꞌin rihun sanulu resin rua;
nosi uma huun Isakar, ema naꞌin rihun sanulu resin rua;
8 nosi uma huun Sebulon, ema naꞌin rihun sanulu resin rua;
nosi uma huun Yusuf, ema naꞌin rihun sanulu resin rua;
no nosi uma huun Benyamin, ema naꞌin rihun sanulu resin rua.
Ema moon sia tonu-naboot Naꞌi Maromak no Bibi Malae Oan
9 Hotu, sarebak haꞌu ktitu-karee ema lear. Sia waꞌin basuk, toꞌo la bele sura hola. Sia mai nosi klubun hotu-hotu, nosi hunun hotu-hotu, no nosi ema mak dale nodi lia hotu-hotu nosi rai hotu-hotu. Sia libur malu seꞌi oin baa habesi aan fatin nia no Bibi Malae Oan nia. Sia tau faru mutin, no kaer beet tahan. 10 Sia foti tonun bele-bele naꞌak,
“Ami tonu-haboot amikaan Maromak
mak nabesi aan iha habesi aan fatin neꞌe.
Ami moos foti-hahaas
Bibi Malae Oan neꞌe.
Sia neꞌe, mak sori ami.
Sia neꞌe, mak loke dalan moris bodik ami.”
11 Dale hotu nunia, Maromak Niakaan makbukar laleꞌan mak nariik satan nola sia, nakniꞌa nodi sudur seꞌi oin baa habesi aan fatin nia. Fukun nia sia no buat horis kasalak matan haat nia moos, nalo nunia. Sia hotu-hotu loꞌu-sudur baa Naꞌi Maromak 12 nodi naꞌak,
“Tebes! Nunia, tebes!
Ami moos tonu-haboot Naꞌi Maromak!
Ami moos foti-hahaas Niakaan naran!
Naꞌi Maromak hanoin, matenek kaliuk.
Naꞌi Maromak beran, boot kaliuk.
Naꞌi Maromak makaꞌas, biit kaliuk.
Ami sera dodan baa Naꞌi Maromak nohuun.
Ami sera kneter baa Ama Maromak nima-nimak.”
13 Sia tonun hotu nunia, ida nosi fukun nia sia nusu haꞌu naꞌak, “O matene ema lear mak tau faru mutin neꞌe sia ka lale? Sia nosi nabee?”
14 Mais haꞌu kataa kaꞌak, “Lale, Ama. Haꞌu la katene sia.”
Nia moos katak baa haꞌu naꞌak, “Sia nia, ema mak sasin tiꞌan nosi dinu boot.
Sia nia, ema mak nodi Bibi Malae Oan raan,
atu fasi siakaan tais,
nodi namutin siakaan faru.✡Daniel 12:1; Mateus 24:21; Markus 13:19
15 Tan baa nia, sia bele nariik iha Naꞌi Maromak habesi aan fatin oin.
Loron-kalan sia naliku Nia iha Niakaan Uma Hamulak.
Nia namutuk no sia nohuun.
Nia daka sia bei-beik.
16 Sia la noran salaen ona.
Sia la noran hanroo ona.
Sia la namotuk ona, tan loro manas.
Siakaan isin kulit la nakfolu ona, tan kona manas.✡Yesaya 49:10
17 Bibi Malae Oan mak kreꞌis habesi aan fatin nia,
atu dadi siakaan makbalin.
Nia atu nalaꞌo nodi sia,
baa nemu iha wee matan mak nalo ema moris nohuun.
Naꞌi Maromak moos atu kasu mohu siakaan susar,
nebee sia la tanis ona.”✡Kananuk Sia 23:1-2; Yeskiel 34:23; Yesaya 49:10; Yesaya 25:8
✡7:1 Yeremia 49:36; Daniel 7:2; Sakarias 6:5
✡7:3 Yeskiel 9:4, 6
✡7:14 Daniel 12:1; Mateus 24:21; Markus 13:19
✡7:16 Yesaya 49:10
✡7:17 Kananuk Sia 23:1-2; Yeskiel 34:23; Yesaya 49:10; Yesaya 25:8