Primera Carta a los Tesalonicenses
Kjibokwo ëre tara Pablorë Tesalónica sopga kong
Kjibokwo ëre sorë
Domer shäng kjl̈ara ko Pablo. E Sbö tjl̈õkwo l̈aga Jesús ãska wl̈eniyo. Dënashko ga öör Jesús roy pjl̈ú l̈ë Tesalónica kjokyo. E irgo ga jek öör eshko pjl̈ara obi. Eshko ga Silvano, Timoteo, e söra jek ba tjok. Gueniyo nopga Sbö miydë l̇l̇ëm wl̈eniyo iirkono ara ba kong, ga Pablo töktong ey dwayo.
Jesús tjl̈õkwo kjragaga l̈öng Tesalónica kjokyo l̈i shdunaba ara. E kjĩshko ga Pablo jek woydë ba ĩk obi, gueniyo to jek ame. Eni ga kjibokwo ëre tara, twara Timoteo kong, ga ichara jek ba sök epga kong, epga dbokjrë e go wl̈o.
L̇l̇ëbo shäryara Sbörë epga kong pjl̈ú, ga Pablo beno wopjl̈ú e kjĩshko l̈i tara ba kong. Epga shdungoba ara ëmdë ga Sbö shäng ba tjok l̈i tara ba kong. Dënashko ga Pablo jëktong shäng ba tjok sorë l̈i tara ba kong. Epga ichara mär Jesús go jek këgong këgong. Epga ichara Jesús tjwe iröng obi dbaryo l̈i koshë wopjl̈ú bakoe.
1
1 Kjibokwo ëre taga tja Pablorë, Silvano,*Silvano, e kowëba Silas bakoe. Timoteo tjok.
Jesús tjl̈õkwo kjragaga l̈öng Tesalónica kjokyo, kjibokwo ëre ichërwa jek bomi kong. Pjãy Data Sbö nopga, pjãy Tjl̈apga Jesucristo nopga bakoe.
Rokër Data Sbö kong ga ba wopjl̈ú l̈i kjĩshko ga pjãy kjimte ara, pjãy ie ber l̈öng wl̈ẽp bakoe.
L̇l̇ëbo shäryara Tesalónica sopgarë pjl̈ú Sbö kong ara
2-3 Pjãy mär Tjl̈apga Jesucristo go kjĩshko ga pjãy parkë pjl̈ú Sbö kong. Obl̈ë woydëmi ara kjĩshko ga l̇l̇ëbo pjl̈ú shäryëmi ba kong. Bi Tjl̈apga Jesucristo, e koshëmi l̈öng wopjl̈ú ĩyado kjĩshko ga l̇l̇ëbo wen tjwe bomi kong owashko ga pjãy wosonkë l̇l̇ëm, pjãy pak shäryë pjl̈ú ĩyado. E kjĩshko ga tjawa wopjl̈ú Sbö tjok ĩyado. Tjawa syõshtëshko ga tjawa syõshtë bomi kjĩshko, ga l̇l̇ëye pjl̈ú shäryëmi l̈öng l̈i, e l̈ërwa Data Sbö kong.
4-5 Pjeyoga, pjãy woyde Sbörë ara. Jesucristo tjl̈õkwo roy pjl̈ú l̈ororwa bomi kongshko ga kuromi dö l̇l̇ëm, Sbö dbo ara l̈i ĩnomi bako, ga pjãy kjimtara Sbö Sëyarë tjl̈õkwo l̈i kjrë jl̈õkoyo. Miydërwa e go ga pjãy kjraga Sbörë om go. Tjawa l̈öng bomi tjokshko ga tjawa opshäryono bomi kong sorë l̈i, e miydëmi l̈öng pjl̈úe. 6 E irgo ga l̇l̇ëbo weno bomi kong owashko ga pjãy kjimtara Sbö Sëyarë beno l̈öng wopjl̈úe. Eni ga tjawa opshäryono sorë l̈i, Tjl̈apga Jesús opshäryono sorë l̈i, pjãy omshäryono eni bakoe.
7 Eni ga l̇l̇ëye shäryoromi pjl̈ú l̈i, e beno pjl̈ú Jesús tjl̈õkwo kjragaga l̈öng Macedonia kjokyo l̈i kong, l̈öng Acaya kjokyo l̈i kong, omshäryë l̈ok eni bako wl̈o. 8 Bomi kjĩshko ga Tjl̈apga Jesús tjl̈õkwo roy shdöktong Macedonia kjokyo, Acaya kjokyo, gueniyo eshko dö l̇l̇ëme. Pjãy mär Sbö go sorë l̈i roy shdöktong kjok kjwang jĩkong. E kjĩshko ga pjãy roy l̈ërwa ë kong ame ga pjl̈ú, kura l̈ok tjän kjĩshko. 9-10 L̈anyotkëba l̈öng om go ara. Tjawa öötong l̈öng bomi shwoyshko ga tjawa wl̈okjroromi l̈öng wopjl̈úe. Eshko ga bomi sböpga jyãgl̈o tjeng l̈i rayoromi pjir, ga pjãy optwono Sbö sök së jl̈õkoyo l̈i kong, pjãy parkë ber l̈öng ba kong shara wl̈o. Jesús, e Sbö Wa woshrara Sbörë iröng obi. E bi döga, no shdũzl̈ong dbaryoshko ga shji shdũya Sbörë l̇l̇ëm wl̈o. Ga Jesús ter tjwe kjok dogo dwayo iröng obi l̈i, e koshomirë l̈öng. Pjãy roy l̈ëba l̈öng eni.