1 Pjãy Sbö wapga, ga pjãy woyde ara. E kjĩshko ga pjãy opshäryos baĩya dik. 2 Shji woydara Cristorë ara, ga optwono wol̈ono bi kjĩshko, öng wl̈ẽp ushko so zrökoba, sho sukoba Sbö poshrëkkl̈o l̈i l̈õ pjl̈ëbl̈ë ba kong wl̈eni. Woyde ga pjãy ëng woydos ara kar kar eni bakoe.

3-5 Shji orkwosmono ë tjok l̇l̇ëm ga shji pë ba tjok l̇l̇ëm, l̇l̇ëbo shäryako l̇l̇ëm l̈i shäryëy l̇l̇ëm bakoe. Shji wotjl̈ĩk dbur töng bi kong erö l̇l̇ëm, e l̇l̇ëbo jyãgl̈o poshrëy l̈öng wl̈eni. Pjãy Sbö nopga kjĩshko ga l̇l̇ëbo eniyo shäryëmi sira ëmdë l̇l̇ëme. L̇l̇ëbo l̈ako l̇l̇ëm l̈ëy ë kong l̇l̇ëm, l̇l̇ëbo tjwl̈õ l̇l̇ëm l̈ëy ë kong l̇l̇ëm, shji tjör ëng tjok tjl̈õkwo owa go l̇l̇ëm bakoe. Pjãy l̈öng wopjl̈ú Sbö tjok l̈i l̈anyotkomirë obl̈ë kong dey. L̇l̇ono ga Cristo, Sbö, epga ber l̈öng no pjl̈uyoga ĩyado. Eshko ga l̇l̇ëbo twe Sbörë ba nopga kong. Gueniyo ëye opshäryë owa eni ga äär eshko l̇l̇ëme.

6 Pjãy jyãpgwëba tjl̈õkwo tjwl̈õ l̇l̇ëm go l̇l̇ëme. L̇l̇ono ga nopga l̇l̇ëbo owa shäryono eni l̈i shdũya Sbörë, kol̈ara l̈ok l̇l̇ëm kjĩshko. 7 E kjĩshko ga pjãy tön nopga eniyo tjok l̇l̇ëme.

8 Dënashko ga pjãy jëk l̈öng kjok ro sĩ roy*Jëk l̈öng kjok ro sĩ roy l̈e l̈i, e tjl̈õkwo pjl̈ú miyde l̈öng l̇l̇ëm l̈i l̈okl̈o. wl̈eni. Gueniyo eerishko ga pjãy mär l̈öng Tjl̈apga Jesús go kuzong ga pjãy jëk l̈öng kjok shjiy roy†Jëk l̈öng kjok shjiy roy l̈e l̈i, e tjl̈õkwo pjl̈ú miyde l̈öng l̈i l̈okl̈o. wl̈eni shara. E kjĩshko ga pjãy jëk l̈öng, woyde Sbörë sorë l̈i eni. 9 Ëye iök shjiy ëre tjok ga jëk pjl̈ú obl̈ë tjok, jëk pjl̈o bek, ga tjl̈ẽshko ga tjl̈õkwo bek l̈i l̈ayde. 10 Ga pjãy opping l̇l̇ëye woyde Tjl̈apgarë shäryëmi wl̈o l̈i go. 11 Shji jëk oba jëk l̈öng kjok ro sĩ roy wl̈eni l̇l̇ëme. L̇l̇ëye shärye l̈ok l̈i, e l̇l̇ëno l̇l̇ëme. Eni ga l̇l̇ëbo shärye l̈öng l̈i owa l̈ozĩ ba kong dey, miyde l̈ok wl̈o. 12 Sbö kol̈e l̈ok l̇l̇ëme. L̇l̇ëbo owa shärye l̈öng l̈ũtshko l̈i l̈anyotkëy ëmdë ga l̈ökyo ara. 13 Gueniyo iök pĩy l̇l̇ëbo owa l̈i go ga e ber wẽl̈ëe. 14 Eshko ga ĩgöy wẽl̈ë, iök shjiy l̈i kjĩshko. E kjĩshko ga oba tjl̈ẽ ga

15 Pjãy drön jëk l̈öng nopga kjok miydë ara wl̈eniyo dik, nopga kjok miydë l̇l̇ëm wl̈eniyo dik l̇l̇ëme. 16 Shji l̈öng dbar owa. E kjĩshko ga l̇l̇ëye wen tjwe bomi kong shäryëmi pjl̈ú wl̈oshko ga shäryozĩa. 17 Shji l̇l̇ëbo shäryë nopga kjok miydë l̇l̇ëm wl̈eniyo dik l̇l̇ëme. Pjãy oppĩs l̇l̇ëye woyde Tjl̈apgarë l̈i shäryë. 18 Shji nel̈õtkë l̇l̇ëme. Shji nel̈õtkë ga shji iche l̇l̇ëbo owa shäryë. Pjãy ichaga ber Sbö Sëya pjang bomi go l̈irë dey. 19 Pjãy tos ëng tjok Sbö kong tëkwo obl̈ë obl̈ë go. Ga Tjl̈apga poshrëzĩ bomi tëkwo l̈i go. 20 Pjãy ber l̈öng wopjl̈ú Data Sbö tjok l̇l̇ëbo uunkong kjĩshko. L̈ozĩ ba kong ĩyado, Tjl̈apga Jesucristo ko go.

21 Cristo bangkjrëmi kjĩshko ga pjãy ëng kol̈ozong.

22-23 Cristo beno ba tjl̈õkwo kjragaga uunkong kägäyo, ba döga bakoe. Domergara beno ba boyga kägäyo eni bakoe. E kjĩshko ga wal̈ëga orkwosmok l̈öng pjir, bomi l̈anmaga kol̈ozĩ, Tjl̈apga Jesús kol̈ëmi l̈öng wl̈eni. 24 Cristo kol̈e ba tjl̈õkwo kjragagarë sorë ga bomi l̈anmaga kol̈ozĩ ĩyado eni bakoe.

25 Domerga orkwosmok l̈öng pjir, bomi boyga woydozĩ ara, ba tjl̈õkwo kjragaga woyde Cristorë sorë ga eni. Ba tjl̈õkwo kjragaga woydara ara, ga optwono wol̈ono ba kjĩshko, 26 ie ber l̈öng dboy ba kong wl̈o. Ba tjl̈õkwo l̈i go ga epga iara beno pjl̈o bek Sbö bokso wl̈o, 27 ber l̈öng ba nopga kãl̈ã shjiy wl̈eni wl̈o, ber tjeng baĩya wl̈o, pogo l̇l̇ëye dret ba bokso wl̈o bakoe. 28 Eni wl̈eni ga domerga, bomi boyga woydozĩ ara, pjãy opwoydë sorë ga eni. Ëye ba boy woydë ara ga e opwoydë om go wl̈eni. 29-30 Ëye ba doyo om go l̈i ĩywõ shjiktëng l̇l̇ëme. Opsëng, opdë. Shji Cristo tjl̈õkwo kjragaga, shji ba doyo wl̈eni. E kjĩshko ga shji de Cristorë eni bakoe. 31 E kjĩshko ga domer ba data, ba mekë rayë, ga orkwosmok wal̈ë tjok, ga ber l̈öng kjl̈araso wl̈eni.‡Génesis 2.24. 32 Ëre l̇l̇ë l̈okl̈o miydëy wẽl̈ë l̇l̇ëme. L̈ër eni l̈i, Cristo, ba tjl̈õkwo kjragaga, e l̈otë. 33 Eni ga domerga orkwosmok l̈öng pjir, bomi boyga woydozĩ ara, pjãy opwoydë sorë ga eni. Wal̈ëga orkwosmok l̈öng pjir, bomi l̈anmaga bangkjrozĩa.