2
Domer dre kuga l̇l̇ëm wl̈eniyo poptara Jesúsdë kjl̈ara
1 Dbar kjwöbö irgo ga Jesús shrono sök Capernaúm kjokyo iröng obi ba ushko. Miydaraba ga shrono sök iröng ga 2 oba shrono l̈öng träk l̇l̇ëm ba shwoy, ga u l̈i dl̈ino tjung no eröe. Oba ara ba u bongkjako bakoe. Ëye äär u bäng zl̈ong ga äe.
Jesús sök Sbö tjl̈õkwo roy l̈ë oba kong kjër roshkoshko ga 3 domerga tjwe l̈öng dogl̈o pkëng (4), swl̈o söno kjl̈ara. Swl̈o l̈i buk töshko, dre kuga l̇l̇ëm wl̈eniyo. 4 Eshko ga söra l̈ok shrono u bongkjako ga söya kjër roshko, Jesús sökshko l̈ara, gueniyo to öötong ey l̇l̇ëm, oba ara kjĩy. Eni kuzong ga jem tyono l̈ok u dbo kjing sdok l̈i kjing go, kjing döra sira, swl̈o l̈i l̈ona ter pjang ba pogl̈o roshko öötong buk dew, Jesús sök l̈ishko.
5 Ĩya Jesúsdë ga swl̈o sögaga l̈i mär ba go ga tjl̈ẽ swl̈o buk töshko l̈i kong ga «Domer, owa pjang bop go l̈i l̈önor beno drete» l̈e.
6 No pinggaga kjok l̇l̇gwekkl̈o tara Moisésdë l̈i go l̈öng eshko kjl̈öbö. Wotjl̈ĩk l̈ok ga 7 «¿Kjwe ëro? ¡Domer kjwe shäng Sbö l̈ãywë owa, ber tjwl̈õ l̇l̇ëm wl̈o l̈e! Owa l̈öngga nopga kong l̈i Sbö eröe» l̈e.
8 Wotjl̈ĩk l̈öng l̇l̇ë l̈i miydara Jesúsdë pjir kuzong ga tjl̈ẽ ba kong ga «¿Pjãy wotjl̈ĩk owa eni ega? 9 “Owa pjang bop go l̈i l̈önor beno drete” l̈oror ba kong. Gueniyo l̈önorde, de l̈önor l̇l̇ëm, e ĩgömi l̇l̇ëme. Gueniyo ga “Pja kojõzong. Bop bukkl̈o kjwe kjrozong. Pja jëkzong” l̈oror ba kong ga poptororde, de poptoror l̇l̇ëm, era ĩgömi wẽl̈ëe. 10 Kjok ëre kjing go ga no to ter kjok dogo dwayo ëre dbo ara, owa pjang nopga go l̈i l̈ön ber dret wl̈o ga pjl̈úe. Miydëmi wl̈o ga l̇l̇ëbo shäryër e» l̈e. Eni ga tjl̈ẽ swl̈o buk töshko l̈i kong ga 11 «L̈ër bop kong ga pja kojõzong. Bop bukkl̈o kjwe kjros, ga pja nom bop ushko» l̈e. 12 Kuya ga kojono, ba bukkl̈o kjrara, ga to jek ba ushko.
Ĩya l̈öng eshko l̈irë ga beno l̈öng yëy l̈e erä, ga Sbö poshrëra, ga tjl̈ẽ l̈ok ëng kong ga «L̇l̇onoshko ga l̇l̇ëbo ĩydë kjweni l̇l̇ëme» l̈e.
Leví rokara Jesúsdë
13 E irgo ga Jesús jek öötong shäng di bäng buk kësbang l̈i kjako obi. E irgo ga nopga öötong l̈öng ara ba zl̈ong, ga epga pĩya Jesúsdë shäng. 14 Jek jëk shängshko ga domer sök kjl̈ara eshko ko Leví, e dbur töngga Roma so kong. E Alfeo wa. E sök ba pak l̈ishko. Ĩya Jesúsdë ga tjl̈ẽ ba kong ga «Pja tek bor tjok, pja pin wl̈o» l̈e. Kuya ga kojono, ga to jek ba tjok.
15 E irgo ga Jesús jek öötong sök ië Leví ushko,*Grecia so tjl̈õkwo ëre l̇l̇ë l̈okl̈o miydëy yõtso l̇l̇ëme. E Jesús jek öötong sök ië Leví ushko l̈okl̈o, l̇l̇ëm ga Jesús jek öötong sök ië Jesús ushko l̈okl̈o. Ë ushko miydëy yõtso l̇l̇ëme. ba oppinggaga tjok. Ga nopga dbur töngga Roma so kong öötong l̈öng ië ba tjok eshko, nopga owa wl̈eniyo obl̈ë öötong l̈öng ië ba tjok eshko bakoe. Nopga eniyo jëk l̈öng Jesús tjok ara.
16 Eshko ga nopga l̈öng kjl̈öbö no pinggaga kjok l̇l̇gwekkl̈o tara Moisésdë l̈i go, epga fariseoga bakoe. Ĩya l̈ok ga Jesús sök ië nopga eniyo tjok ga tjl̈ẽ ba oppinggaga l̈öng l̈i kong ga «¿Bomi pingga kjwe ië nopga owa wl̈eniyo tjok kjweni ega?» l̈e.
17 Kuya Jesúsdë ga tjl̈ẽ ba kong l̈ok ga «Nopga l̈öng pjl̈ú, swl̈o l̇l̇ëm ga e dwl̈omnega woydë l̇l̇ëme. Swl̈opgara dwl̈omnega woydë. Eni ga tja shrono shäng kjok ëreshko, nopga pjl̈o bek l̈i rokaga l̇l̇ëm, nopga owa l̈i rokaga eröe» l̈e.
Jesús l̈ano shji ië l̇l̇ëm kjĩshko
18 Ol̈ö ga Juan oppinggaga, fariseoga, e ië l̇l̇ëm Sbö kong. Pjl̈ara ga l̈öng ië l̇l̇ëm enishko ga nopga tek shrono l̈öng Jesús shwoy ga tjl̈ẽ ba kong ga «Juan oppinggaga ië l̇l̇ëm Sbö kong dbar kop ara. Fariseo oppinggaga omshäryë eni bakoe. ¿Bop oppinggagara omshäryë eni l̇l̇ëm ega?»
19 «Orkwosmozl̈ong dbaryoshko ga domer orkwosmok wl̈o l̈i†Domer orkwosmok wl̈o l̈e l̈i, e Jesús l̈okl̈o. shäng ba tjok obishko ga nopga mak l̈öng eshko l̈i‡Nopga mak l̈öng eshko l̈e l̈i, e Jesús oppinggaga l̈okl̈o. ië l̇l̇ëm ga äe. 20 Gueniyo domer l̈i söraba ba shjiryoshko ga epga ië l̇l̇ëm eshko jã.
21 »Shwong këguë§Shwong këguë l̈e l̈i, e tjl̈õkwo twara Sbörë Israel tjëyoga kong jl̈õkoyo dënashko l̈i l̈okl̈o. bängyëy shwong l̈ikyo tjagl̈ën*Shwong l̈ikyo tjagl̈ën l̈e l̈i, e tjl̈õkwo twara Sbörë jl̈õkoyo tjagl̈ën Jesús kjĩshko l̈i l̈okl̈o. go l̇l̇ëme. Shäryoroy eni kjwe ga shwong l̈ikyo tjagl̈ën l̈i, shwong këguë l̈i, e sreya, dwl̈er jek këgong.
22 »Kjil̇l̇gwo bo dyo dbo ara tjagl̈ën†Kjil̇l̇gwo bo dyo dbo ara tjagl̈ën l̈e l̈i, e tjl̈õkwo twara Sbörë jl̈õkoyo tjagl̈ën Jesús kjĩshko l̈i l̈okl̈o. tyëy ba bapkwo këguë shäryak öng kwota go‡Kjil̇l̇gwo bo dyo dbo ara bapkwo këguë shäryak öng kwota go l̈e l̈i, e tjl̈õkwo twara Sbörë Israel tjëyoga kong jl̈õkoyo dënashko l̈i l̈okl̈o. roshko l̇l̇ëme. Shäryoroy eni kjwe ga ba bapkwo l̈i böptur. Eni ga kjil̇l̇gwo bo dyo l̈i, e ber l̇l̇ëno ame, ba bapkwo l̈i ber eni bakoe. Eni kuzong ga kjil̇l̇gwo bo dyo dbo ara tjagl̈ën tyëy wl̈o ga woyde bapkwo tjagl̈ën» l̈e ba kong.
Woshtozl̈ong dbaryo ga Jesús oppinggaga dwl̈a bo kjrono
23 Woshtozl̈ong dbaryo kjwara ga Jesús jëk shäng dwl̈a dgak buk l̈i tjrëko ba oppinggaga tjok. Eshko ga ba oppinggaga l̈öng dwl̈a bo kjrë, ue l̈ok wl̈o. 24 Ĩya fariseogarë ga tjl̈ẽ Jesús kong ga «¡Bop oppinggaga kjwe ĩzong! ¿L̈öng l̇l̇ëbo shäryako woshtozl̈ong dbaryoshko l̇l̇ëm l̈i shäryë ega?»
25 «¿Dënashko ga David, ba yorkagaga pjl̈i l̈ok arashko ga l̇l̇ëye shäryara tak pjang Sbö tjl̈õkwo go l̈i, e l̈omirë l̇l̇ëmdo? 26 Abiatar sök syõshtaga Sbö kong ba pjeyoga kjĩshko kësbangyo dbaryoshko ga David opzrëno jek shäng Sbö u roshko, ga pjl̈ung shosho suk pjir iak beno tjeng dboy Sbö kong l̈i uara, ga twara ba nopga jëk l̈öng ba tjok l̈i kong, ue wl̈o bako, e uaga syõshtagagarë erö gueniyo» l̈e ba kong.
27 E irgo ga tjl̈ẽ ba kong obi ga «Woshtozl̈ong dbaryo, e shäryak beno nopga kjimtokl̈o. Nopga, e shäryak beno woshtozl̈ong dbaryo kjimtokl̈o l̇l̇ëme. 28 E kjĩshko ga woshtozl̈ong dbaryo kägäyo l̈i, no to ter kjok dogo dwayo ëre l̈i e» l̈e.
*2:15 Grecia so tjl̈õkwo ëre l̇l̇ë l̈okl̈o miydëy yõtso l̇l̇ëme. E Jesús jek öötong sök ië Leví ushko l̈okl̈o, l̇l̇ëm ga Jesús jek öötong sök ië Jesús ushko l̈okl̈o. Ë ushko miydëy yõtso l̇l̇ëme.
†2:19 Domer orkwosmok wl̈o l̈e l̈i, e Jesús l̈okl̈o.
‡2:19 Nopga mak l̈öng eshko l̈e l̈i, e Jesús oppinggaga l̈okl̈o.
§2:21 Shwong këguë l̈e l̈i, e tjl̈õkwo twara Sbörë Israel tjëyoga kong jl̈õkoyo dënashko l̈i l̈okl̈o.
*2:21 Shwong l̈ikyo tjagl̈ën l̈e l̈i, e tjl̈õkwo twara Sbörë jl̈õkoyo tjagl̈ën Jesús kjĩshko l̈i l̈okl̈o.
†2:22 Kjil̇l̇gwo bo dyo dbo ara tjagl̈ën l̈e l̈i, e tjl̈õkwo twara Sbörë jl̈õkoyo tjagl̈ën Jesús kjĩshko l̈i l̈okl̈o.
‡2:22 Kjil̇l̇gwo bo dyo dbo ara bapkwo këguë shäryak öng kwota go l̈e l̈i, e tjl̈õkwo twara Sbörë Israel tjëyoga kong jl̈õkoyo dënashko l̈i l̈okl̈o.