18
Babilonia kjokyo pjitonge
1 E irgo ga ĩn ga Sbö parkaga kjok dogo so ter shäng kjl̈ara obi, kjok dogo dwayo. E dbo ara, ga kjok ëre kjing iara ba kãl̈ã ara l̈irë beno buk shjiye. 2-3 Eshko ga tjl̈ẽno dbo go. Tjl̈ẽ ga
«¡E pjitonge!
¡Babilonia kjokyo tjwl̈õ ara l̈i pjitonge!
Tjëyoga obl̈ë obl̈ë, l̇l̇ëbo owa obl̈ë obl̈ë pina ba kong l̈i,
e shäryara l̈ok pjir,
Sbö rayara l̈ok bakoe.
Pjl̈upga l̈öng kjok ëre kjing go kjl̈obi l̈i,
e pono ba tjok wl̈eni.
L̇l̇ëbo soynega kjok ëre so l̈i,
e dbur shano ara,
kjok eshko sopga dbur zano ara kjĩshko.
E kjĩshko ga kjok eshko l̈i kworkwono beno buk Ä sëyaga shtoyo shara,
sëyaga owa obl̈ë obl̈ë l̈öng eshko.
Sënwa owa, woydëy l̇l̇ëm wl̈eniyo,
e usho shäryë l̈ok eshko bakoe»*Tek dënashko ga kjibokwo ëre jyã shiraba obl̈ë obl̈ë ara. Ga kjone kjone tjl̈ẽ ga «... e usho shäryë l̈ok eshko, ga äya owa, woydëy l̇l̇ëm wl̈eniyo, e l̈öng eshko bakoe.» l̈e.
4 Eshko ga kur ga ybö ter kjok dogo dwayo pjl̈ara, tjl̈ẽ ga
«Bor nopga, pjãy opshis kjok kjweshko dwayo,
l̇l̇ëbo owa shärye nopga l̈öng kjweshkorë l̈i shäryëmi l̇l̇ëm wl̈o,
kjwepga shdũya Sbörëshko ga pjãy shdũya eni l̇l̇ëm bako wl̈o.
5 Nopga l̈öng kjweshko l̈i go owa ara,
kjl̈ay kjok dogo.
Kjwepga shdũya Sbörë ara,
l̇l̇ëbo owa shäryara kës l̈i kjĩshko» l̈e.
6 Eshko ga ybö l̈i tjl̈ẽno nopga shdunggaga l̈i kong. Tjl̈ẽ ga
«Nopga kjwe l̇l̇ëbo shäryono obl̈ë kong owa sorë ga
shäryozĩ ba kong eni pjl̈ogl̈o pjök.
Obl̈ë shduna sorë ga
nopga kjwe shdũzĩ eni pjl̈ogl̈o pjök bakoe.
7 L̇l̇ëbo shäryara ba kong om go ara, dbur zano ara,
ber l̈öng wopjl̈ú wl̈o.
Eni ga l̇l̇ëbo shäryozĩ ba kong owa bayo eni,
ber l̈öng woydë ara wl̈o.
Eerishko ga to l̈öng krë ara. Tjl̈ẽ ga
“Tjawa pjl̈u boy wl̈eni, tjawa äär ber syã wl̈eni l̇l̇ëm,
l̇l̇ëye wen borwa kong owa wl̈o drete” l̈e.
8 Eni kuzong ga dbar kjwara ga l̇l̇ëbo wen ba kong owa obl̈ë obl̈ë,
kjone kjone wol̈on,
kjone kjone sl̈ar ara,
kjone kjone pjl̈i kuk ara bakoe.
Epga shdũya Tjl̈apga Sbörë, ba dbo ara go,
ga ba kjok buk kës l̈i suya iök go, ber dret wl̈o» l̈e.
9 Pjl̈upga l̈öng kjok ëre kjing go pono wal̈ë l̈i tjok wl̈eni l̈i, l̇l̇ëbo shäryara ba kong om go ara, dbur zano l̈ok ara bakoe. Shäryara l̈ok eni, ber l̈öng wopjl̈ú baĩya dik wl̈o. Eni ga kjok l̈i pjë jong ri rishko ga ba yõ sho jem l̈i ĩya l̈ok ga sl̈ar ara, kjl̈oshtë ara ba kjĩshko. 10 Eshko ga wal̈ë l̈i shdũya Sbörë ara eni l̈i ĩya ga bangkjre l̈ok ara. Ber l̈öng kjl̈oshtë ara pjolae. Tjl̈ẽ l̈ok ga
«¡Babilonia sopga, pjãy tjwl̈õ ara, dbo ara,
gueniyo pjãy shduna ara, ga pjãy pjitong mal̈inge!
¡Pjãy song jl̈õe!
¡Pjãy song jl̈õe!» l̈e l̈ok eni.
11 Eshko ga l̇l̇ëbo soynegaga kjok ëre so l̈i sl̈ar ara, kjl̈oshtë ara, l̇l̇ëbo tjwl̈ẽkoba eshko ame kjĩshko. 12 Dbur sho shõyl̈ṍr, dbur sho pjl̈ubl̈ún, akkwo wol̈ësowa tjwl̈õ ara wl̈eniyo obl̈ë obl̈ë, e tjwl̈ẽkoba eshko ame. Shwong ko pjl̈ubl̈ún, pjl̈ú tjwl̈õ ara wl̈eniyo, shwong ko dingding shwëshwë, shwong pjl̈ú wl̈eniyo ko seda, shwong ko srëzrë́n, e tjwl̈ẽkoba eshko ame. Kjorkwang l̈õ pjl̈ëbl̈ë wl̈eniyo obl̈ë obl̈ë, l̇l̇ëbo wol̈ësowa obl̈ë obl̈ë shäryak l̇l̇ëbo ko marfil go, shäryak kjorkwang tjwl̈õ ara wl̈eniyo go, shäryak dröng sho so kl̈ung sho kjoyo go, shäryak dröng sho go, shäryak ak ko mármol go, e tjwl̈ẽkoba eshko ame. 13 Dl̈i mokyo obl̈ë obl̈ë, l̇l̇ëbo l̈õ pjl̈ëbl̈ë suy wl̈o, dwl̈o poshtikkl̈o l̈õ pjl̈ëbl̈ë obl̈ë obl̈ë, poshtikkl̈o l̈õ pjl̈ëbl̈ë wl̈eniyo obl̈ë obl̈ë, kjil̇l̇gwo bo dyo dbo ara, kjyo pjl̈ú wl̈eniyo, pjl̈ung shosho pjl̈ú wl̈eniyo, e tjwl̈ẽkoba eshko ame. Sögl̈a, öng wl̈ẽp ushko so, kwomgl̈a, jëkkl̈o dopshiga kwomgl̈arë wl̈eniyo, parkagaga tjwl̈ẽk l̈öng pjir wl̈eniyo, nopga obl̈ë obl̈ë, e tjwl̈ẽkoba eshko ame.
14 Eshko ga l̇l̇ëbo soynegaga l̈i tjl̈ẽ l̈ok ga
«¡Babilonia sopga,
l̇l̇ëbo woydoromi ara l̈i,
e pjitong drete.
L̇l̇ëbo obl̈ë obl̈ë tjwl̈õ ara bomi kong l̈i,
e pjitong dret bakoe.
¡Pjãy song jl̈õe!
¡Pjãy song jl̈õe!» l̈e l̈ok eni.
15 Eshko ga epga shdũya Sbörë ara eni l̈i ĩya l̇l̇ëbo ëre soynegaga l̈öng l̈irë ga bangkjre l̈ok ara. Ber l̈öng sl̈ar ara, kjl̈oshtë ara pjolae. 16-17 Tjl̈ẽ l̈ok ga
«¡Babilonia sopga,
pjãy doyono l̈öng shwong ko pjl̈ubl̈ún, pjl̈ú tjwl̈õ ara wl̈eniyo go,
shwong ko dingding shwëshwë go
shwong ko srëzrë́n go bakoe!
¡Pjãy obrikkwo wol̈ësowa obl̈ë obl̈ë
shäryak dbur sho shõyl̈ṍr go,
shäryak akkwo wol̈ësowa tjwl̈õ ara wl̈eniyo obl̈ë obl̈ë go bakoe!
Gueniyo l̇l̇ëbo tjwl̈õ ara tjeng kës l̈i pjitong mal̈inge!
¡Pjãy song jl̈õe!
¡Pjãy song jl̈õe!» l̈e l̈ok eni.
Eshko ga kjyong këskës sögaga, ba kägäyoga, nopga jëk l̈öng kjyong këskës go, e ber l̈öng pjola bakoe. 18 Ga kjok l̈i pjë jong ri rishko ga ba yõ sho jem l̈i ĩya l̈ok ga sl̈ar ara ba kjĩshko. Tjl̈ẽ l̈ok ga «Kjok obl̈ë äär tjwl̈õ ara, kjok kjweni dik l̇l̇ëme» l̈e l̈ok eni. 19 Eshko ga kl̈ung sho iara ba kä kjing go, l̈öng woydë ara l̈i l̈okl̈o, ga sl̈ar ara, kjl̈oshtë ara. Tjl̈ẽ l̈ok ga
«Babilonia sopga,
pjãy dbur ara kjĩshko ga
kjyong këskës sogoga kës l̈i dbur shano ara.
¡Gueniyo pjãy pjitong mal̈inge!
¡Pjãy song jl̈õe!
¡Pjãy song jl̈õe!
20 ¡Gueniyo kjok dogo so,
Sbö nopga,
Sbö tjl̈õkwo roy l̈agaga Jesús ãska,
Sbö tjl̈õkwo l̈agaga,
pjãy shduna l̈ok ara kuzong ga
epga shduna Sbörë ara bakoe!
¡Pjãy l̈öng wopjl̈ú e kjĩshko!» l̈e.
21 Eshko ga Sbö parkaga kjok dogo so dbo ara wl̈eniyo kjl̈ara apkwo kjrono kjwara kësbang, bayo dwl̈a kjwokäkkl̈o apkwoyo wl̈eni, ga dbura jer dl̈ung roy, ga tjl̈ẽ ga
«Apkwo dburor l̈i piktong dret,
beno ĩgöy ame.
Babilonia kjokyo l̈i pjir dret,
ber ĩgöy ame eni bakoe.
22 Kjorkwang shäryak jong kjiyo tjok tëy or go wl̈eniyo, dbonmo, wl̈i,
e tëba eshko ame,
ga ëye të eshko ame bakoe.
Ëye parkë eshko ame,
ga oba parkë l̈öng l̈i pjl̈ukyo kuy eshko ame bakoe.
23 Iök shjiy eshko ame,
ëye orkwosmok eshko ame bakoe.
Dënashko ga l̇l̇ëbo soynegaga kjok eshko so l̈i tjwl̈õ ara.
Ga tjëyoga obl̈ë obl̈ë jyãpgwara ba nopgarë ba ybi sho l̈i go.
24 Sbö tjl̈õkwo l̈agaga, Sbö nopga, nopga obl̈ë,
e zröraba ara kjok eshko» l̈e.
*18:2-3 Tek dënashko ga kjibokwo ëre jyã shiraba obl̈ë obl̈ë ara. Ga kjone kjone tjl̈ẽ ga «... e usho shäryë l̈ok eshko, ga äya owa, woydëy l̇l̇ëm wl̈eniyo, e l̈öng eshko bakoe.»