JON
gv Siti Jichonam
Mintamchonam
Jon gv lvkchola lvkdam jenam siti si aba baanyi go doodu: Pwknvyarnv gvla okv ninyigv Kuunyilo Jisu Kristo gvlo lvkin gobv ribam la singmu dubv vla sum purinv vdwa mintvmiru la lvkto okv ribam nama miyakriyak dubv rinv oogv tamsar sarmurnv vdwa bunua gamrwto. Svbv tamsarnamv nyiamooku adwnamar so ridula alvmabv rinam lo mvngjwngla riku lokv minto, okv vkvlvgabv Pwknvyarnv gv Kuunyilo Jisu Kristo adwnamar lo jvjvbv rila mabv rito. Oogv tamsarnv vdwv vbv minto ringlinsunam lvgabv nyiamooku sokv alvmanv singnam am kayu lvjv tvlaka vto; okv bunu vdwv vbvka tamsar dvto ringnambanam lvgabv alvbv gwngnamv rikirilak bv rinam lokv vbvmajvka pakmisinam lokv oguguka kvvbi lvgabv minsvgo kaama dunv.
Svbv tamsar sarkurnam sum tvvkurtvrwk sidula lvknv ngv rvbwng alvbv Jisu Kristo jvjvrungnv nyi gobv rito kunyikv vla minto okv hv daadwvrw yabv minjito yvvdw Jisu Kristonyi mvngjwng dunv okv Pwknvyarnvnyi pakdunv hv ajin anying ngaka pakrungre.
Arwng lokv darlinnam
Mintamchonam (1:1-4)
Kanv okv loung (1:5-2:29)
Pwknvyarnv gv umvuu vdw okv Uyudvbv gv umvuu vdw (3:1-24)
Jvjv okv rigakpanam (4:1-6)
Paknam gv kudungkua (4:7-21)
Rigumnvnv mvngjwng (5:1-21)
1
Singdung gv Gamchar
1 Jn 1:1 Klugv gv doodung sunv singdung gv Gamchar lvkwnglo, ngonu nonua lvkdunv. Ngonu um tvvpaato, okv ngonu nyik lokvka kaato; um, ngonu kaapv kunv, okv ngonugv laak lokvka mvsit laka rito. 2 Jn 1:14 Vdwlo turnam si kaapa dubv rikubvdw, um ngonu kaatoku; vkvlvgabv Abu gv lvkobv doonv oogv turbwngjinv singdung okv ngonua chimu kunam lvkwng lo oogv mintv dunv um, ngonu nonua minji dunv. 3 Ngonu ogugo tvvbvdw okv kaabvdw ngonu nonua minji dunv, vkvlgavbolo nonu ngonugv lvkobv akingobv ridu kula Abu gvla okv ninyigv Kuunyilo Jisu Kristo gv lvkobv ribam reku. 4 Ngonugv*Ngonugv Kvvgonv kitap lo Nonugv. mvngpuv paapwngpanya dukubv vla sum ngonu lvkdunv.
Pwknvyarnv Loung ngv
5 Ninyigv Kuunyilo gvlo tvvnam ngonugv vjvgv nonu gvlo minggo karjinam doin minam si: Pwknvyarnv ngv loung ngv, okv ninyi gvlo ogu kanv nam goka kaama dunv. 6 Vbvrikunamv, ngonu mindu ngonu ninyigv lvkobv ribam donv vtola ngonu kanv lo ridubolo, ngonugv gaam mingkulo okv gwngkuriku lo ngonu mvvji rijidu. 7 Vbvritola ngonu loung lo ridubolo—nw gv loung lo rinam aingbv—vbvrikubolo ngonu ajin a lvkin gobv ribam duku, okv ninyigv Kuunyilo, Jisu gv oyi lokv ngonua rimur mvnwng lokv kakpung dukunv.
8 Ngonu gvlo rimur kaama vla ngonu mindu bolo, ngonuv atubonga kupsu dunv, okv ngonugv arwng lo jvjv ngv kaamado. 9 Vbvritola ngonugv rimur am ngonu Pwknvyarnvnyi mingkukla minji yabolo, Hv ninyigv milvpvvji nama vvpvjire okv tarwkbak nvngv ogudw um ribvjire: Hv ngonugv rimur vdwa mvngnga jire okv ngonugv rimur kunam mvnwng lokv harkak jireku. 10 Ngonu rimur mapvnv vla ngonu mindu bolo, ngonu Pwknvyarnvnyi mvvjidu, okv ninyigv gamchar vv ngonugv aralo doomadu.