PITAR
lokv Siti Jichonam
Mintamchonam
Pitar gv lvkchonam siti si yordampeelv gv Asia mooku mvnwng lo dookadoya karnv “Pwknvyarnv gv nyi darkunam vdwv,” vla minam kristan vdw sum lvkdumlvjvla lvktoku. Soogv siti gv lvkdung jvngv si purila rinv vdw sum oogv bunugv mvngjwng nam lvgabv hirukaya am hila okv mvdwkmvkunam am paala rinv um mintvmiru jila mintoku. Lvknv vdwsi Jisu Kristo gv alvnv yunying lvkwng lo ninyigv purinv vdwa mimpa jila mintoku, oogv sila rikunam, turkur kunam okv aakur kujinam gaam am bunua mvngtin dukubv milvpvvkunam um jito. Soogv lvyingbv bunu vdwka hirukaya am laarwk sila saktv rungdubv rirungdo, vbvrinam si bunugv mvngtin sinam sum adwng gvnv bv rika rungdunv vla chirung dubv ridu okv “vdwlo Jisu Kristo gv kaatam rikunyi bunugv amin paadw Alu bv rireku.”
Hirukaya hindw am ninyigv mintvmiru la rinam lo, oogv bunugv siti sum purinv vdw sum Jisu Kristo gvbv rinv nyi bv rirungdubv ridu vla lvknv ngv lvktoku.
Arwng lokv darlinnam
Mintamchonam (1:1-2)
Pwknvyarnv gv ringlinbaalin kunam am mvngpanam (1:3-12)
Darwk bv singnamrinam am mintvmirunam (1:13-2:10)
Hirukaya hiri lo Kristan vdwgv kudungkua rigv sv (2:11-4:19)
Kristan bv rvnyaknam okv kudungkua rinam (5:1-11)
Minyungminyanam (5:12-14)
1
1 Jisu Kristo gv Apostol akobv rinv, Pitar lokv—
Pwknvyarnv gv darlin kunam nyebunyi bv tloblobv doosik sikunv, Pontus, Galasia, Kapadosia, Asia okv Bithynia lo doonv vdwa kumrwklvtaksinam siti am lvkdunv. 2 Nonua Pwknvyarnv Abu gv mvngnam lokv darlin pvnv okv ninyigv Dow lokv nonua darwknv nyi bv ridukubv mvtoku, vv Jisu Kristo gvlo nonua mingku lo vngmu dokubv okv ninyigv oyi lokv sarkak modu kubv vla ritoku.
Anyuaya okv sarsopoyo ngv nonugvlo akomaring bv doolwk yilaka.
Turnam akonyi mvngtinnam
3 Klai ngonu Ahtu Jisu Kristo gv Abu okv Pwknvyarnvnyi umbonyikv vlaju! Vkvlvgavbolo ninyigv kairungnv ayanam lokv Jisu Kristonyi sikunvnga turkur mokunam lokv hv ngonua anwnv turnam am jila ritoku. Si ngonua turnv mvngtinam lokv pwlwk jidu, 4 okv vbvrinamv ngonu Pwknvyarnv gv nyi vdwa nyitvrungbv boktalwkji pvvnama laarwk sidubv kaaya dunv. Vkvnv vdw sum ninyi nonugv lvgabv nyidomooku lo, ogolo bunu vdwloka yaaka nyomadudw, vbvmajvka nyeka madudw, vbvmajvka kaapa nyomadudw hoka pvvching jidu. 5 Oogv boktalwkjinam vdwv nonu gvngv, nonu mvngjwngla Pwknvyarnv gv Jwkrw lo kaachingkaamu dukunv, so si ringlinbaalinam gv lvgabv vvpv pvkunv vv ataranya alu lo kaatam dukubv mvpvripv duku.
6 Vbvrijvka vjvgv so nonuno lvgabv mvngru rungdubv ridu nvpv vkvlvgavbolo hirukaya nam nvgwngnv adwkaku vv nonuno enduku, vbvrijvka nonuno ho lvkwnglo sum himpu sitoka. 7 Bunugv svbv rinam si nonugv mvngjwng nama jvjv dunvdw um kaabwkrwsik nvnvbv ridu. Ain aka, mvyakmvchak dunv umka vmv lokv ramkwrampak la ridu; okv oogv apiabv nonugv mvngjwng aka, oogv ain aka arv doyanv umka, hingkw rungto, vbvribolo vv hirukaaya hinjvka chetamrvnam gvlareku. Vbvribolo Jisu Kristo gv kaatam sidw alu am Pwknvyarnv gvlo nonuno hartvnama paareku okv paknam gorungbo mvngdv rungnam gobv laarwk sireku. 8 Nonuno ninyia kaapa makwng jvka, ninyia nonuno pakdu, okv nonuno ninyia vjv kaapa majvka, nonuno ninyia jvjvrungnv ngv vla mvngdu. Vbvrinamv oogv gaam lokv minji lamanam achialvbv kairungnv gobv mvngpunam okv Yunglit kunv um nonugv haapok lo mvngpu mola ridu, 9 vkvlvgavbolo nonugv ninyia mvngjwng sijo am nonu yalu gv turku nama laarwk sitv duku.
10 Ringbaalinnam soogv lvgabv nyijwk vdwgv kaachartayarla makimaidu okv tvcharkayar la ritoku, okv bunu vdwv nonua oogv Pwknvyarnv gv jisv amin lvkwng lo mincho jitoku. 11 Vdw nyibvdw okv oguaingbv aaredw *Vdwnyibvdw okv ogu aingbv aaredw; Vmalo Yvvdw oogv aajinv okv vdwnyi aaredw. um bunu vdwv malin nvpv vla rikwto. Soogv dw sum kvvlo Kristo gv yaluv bunu gvlo doolwkla, Kristo gv hindarkaso hinsv nga okv yunglit kusv nga kaatamla riku nama um bunu mincho pvvtoku. 12 Pwknvyarnv nyijwk vdwgv bunugv oogv kudungkua rinamv bunugv atubogv pwbinpaabin yanam lvga bvma, vbvritola nonugv lvgabv vla kaatam toku, oogv nyido lokv imunam Darwknv Dow gv jwkrw lokv oogv alvnv yunying go gindungpingko vdwgv lokv bunugv vbv oogv lvkwnglo japji kunama um vjak nonuno tvvduku. Svkvnv jvjvnv oguogu soka Nyidogindung vdwvka chinwngla ritoku.
Darwk bv singnam lvgabv goknam
13 Vkvlvgabv, nonugv mongrumara lo kudungkua ridubv doya tvka. Nonu chvrv rungbv doya laka, vdwlo nonua Jisu Kristo gv kaatam rekudw oogv boktalwkji jitv kunam um nonugv mvngtin sinam mvnwng nga tinlwk laka. 14 Pwknvyarnv gvlo tvnvrinv gobv ritoka, okv vdwlo nonu gvlo chingkupaaku mabv ribvdw um nonugv mvngnam lokv rigvdagvnv um nonugv singnam lo rimu koyoka. 15 Vbvmabvya, nonua goklinnv Pwknvyarnv gv darwknv aingbv, nonugv rinam mvnwng lo darwk nvbv rito laka. 16 Leb 11:44,45; 19:2 Darwknv kitap vv mindu, “Darwk tvlaka ogulvgavbolo ngo darwk nvngvla.”
17 Vdwlo nonu Pwknvyarnvnyi kumyidw, nonuno ninyia Abu vla mindu, akin akingv ogubv ripvdw vbvrinam lokv, nyi mvnwng nga lvyinakin bv jwngkadaka dunv; Vkvlvgabv nonugv sichingmooku so turdunam soogv lvvnv tungv sum ninyigv lvgabv busu la mvngdv kaadvla rilaka. 18 Holvgavbolo nonu abuapa vdwgv lokv arv kaama bv rigv nam lokv ogugo jila rvvlin kubvdw um nonu chindu. Vkvnv vv bunu ain vmalo raaji aingbv rinv ogu mvyakmvchak dubv rila jinv yikimora mago; 19 so si ungnvtarv kaamanv vmalo tarintatv kaamanv svlarkuu aingbv, Kristo gv erinpeelwk sunamv maatar alvbv arv doyachoknv gobv rikunamv. 20 Hv Pwknvyarnv gv nyiamooku am pwklinyarlin madvyilo gvngv gaklin chonamv okv ataranya alua nonu lvgabv kaatam la ritoku. 21 Ninyigv lokv nonu Pwknvyarnvnyi mvngjwng do, yvvdw ninyia sinam loka turkur molaku yunglit dubv jikunv; okv vkvlvgabv nonugv mvngjwng okv mvngtinv Pwknvyarnv gvlo mvnggap lwkdu.
22 Vjak nonugv jvjv am tvvlapala rinam lokv nonu atubonga darkw dubv mvsu duku okv nonugv kvvbi ajin vdwgv lvgabv dinchikochi bv aya minsu duku, vbvrinam †Nonugv haapok mvnwng; Kitap Kvvgonv doomadu Darwkchongjornv haapok lokv. lokv ajin anyingnga dinchi rungbv aya minsudu. 23 Holvgabv vbvrinam lokv turdunv okv Pwknvyarnv gv gamchar doobvnv lokv nonuno anw bv kuu bvngdw kunam, Sikamajinv abu gv umvuu gobv ridukunv. 24 Aij 40:6-8 Darwknv kitap vbv mindu,
“Nyia mvnwng ngv Nvsingnvmwng aingbv ridu,
okv bunugv yunglit namv mootum gv apungana aingbv ridu.
Nvsingnvmwng ngv singkup duku, okv apungana ngv holu duku,
25 Vbvritola Ahtu gv gamchar ngv dvbvdwkibv doobvdu.”
So gamchar si Alvnv Yunying ngv um nonua japgo jitoku.