TESALONIAN
vdwa Paul gv Siti Lvnyinvbv Jinam
Mintamchonam
Tesalonika gvrja lo mvngjwngnv vdwv Kristo gv aakur kunam ha dvmin lakula kaayala doonam lvkwng ngv mingominpenla minyakunam mv adwkakubv ribwng toku. Paul gv Tesalonian vdwa siti jidvnam si Ahtu gv aadw alu hv aaro pvku vla minam go. Paul um sibv minbwk jitoku, Kristo gv aatv madvbv alvmanv okv achialvbv alvmabv rigvnv “Alvmaya choknv” vla minam gvlokv, hv Kristonyi rinyingriru riku.
Apostol Paul so puririnv vdwa dinchinv gaam vkv minpa jidu, adwkaku okv hirukaya nga mvngnga gvrila mvngjwng yanga haatin yala Paul la okv ninyigv lvkobv kudungkua ribam vdwgv rinam apiabv turnam lvgabv kudungkua rila doolakv vtoku.
Arwng lokv darlinnam
Mimtamchonam (1:1-2)
Hartv okv ayumnam gaam (1:3-12)
Kristo gv aakur kuse gv lvkwng nga minam (2:1-17)
Kristan ridungsvngdung nga tamsarnam (3:1-15)
Minyakunam (3:16-18)
1
1 Nyim 17:1 Paul, Sailas okv Timoti gvlokv—Tesalonika gv gvrja gv nyi yvvbunudw Abu Pwknvyarnv okv Ahtu Jisu Kristo gvbvrinv vdwa jidunv:
2 Pwknvyarnv Abu okv Ahtu Jisu Kristo nonua aya okv sarsopoyo nga jigv nyika.
Kristo gv aarilo jwngkadakanam
3 Ngonugv ajin vdwa, ngonu nonugv lvgabv Pwknvyarnvnyi dw mvnwnglo umbonyikv vdubv rirung dunv. So si ngonugv vbvridubv alvnv dw vku, ogulvgavbolo nonunogv mvngjwng ngv achialvbv kaiyaya duku okv nonuno akin-akinhv kvvbi am paknam rinam gvnam hvka kaiyaya duku. 4 Vkvlvgabv ngonu atubongv Pwknvyarnv gv gvrja vdwlo ngonu goosu dunv. Ngonu nonunogv mvritmvka okv hirukaya mvnwngnga saktv sula okv mvngjwng bvngla rikunama ngonu goosu dunv. 5 Svbvrinam mvnwng sokv gaklin duku Pwknvyarnv gv jwngkadaka ngv jvjv duku, vbvrinam lokv kaapa duku nonugv hirukaya hinla rinam hv nonu Pwknvyarnv gv Karv lo aala dukubv riduku. 6 Jvjv ngv ogu vdw um Pwknvyarnv rire: nonua hirukaya monv nga hv bunua hirukaya naalwk jire. 7 Okv hv nonu ngonua hirukaya kunvnga saknu nama jireku, vdwlo Jisu nwgv kairungnv nyidogindung nga lvkobv nyidomooku tolo daklin rikudw hv so vdw sum rireku, 8 okv hv vmv nga gudor dukubv bvngla ikula Pwknvyarnvnyi toa kunv vdwa okv Ahtu Jisu Kristo gv lvkwngbv Alvnv Yunying nga tvvmanv vdwa mvrit dukubv rireku. 9 Aij 2:10 Bunua hirukaya himbwng jikulo mvrit riku, okv Ahtu gv nvchi okv kairungnv gwlwk lokv adu moreku, 10 Vdwlo nwgv nyi vdwa naarwk tvbv ho Alu lo aarikudw ninyi mvngjwngnv nyi mvnwng lokv hartvnama okv mvngdv nama paareku. Ho nonuka reming gvvre, ogulvgavbolo nonu ngonugv minji kunam doin am jvjv ngv vla mvngjwng toku. 11 Vkvlvgabv ngonu lokia nonugv lvgabv kumdunv. Ngonugv Pwknvyarnv gv nonua singlakv vla goknam lo singla dubv rimutvka vla ngonu ninyia koodunv. Nonugv alvnam gv lvgabv mvngnam ha hv richi molaka okv nonugv mvngjwngla kudungkua rinam ha rinya molaka. 12 Vbvrila Ahtu Jisu gv*ngonugv Pwnvyarnv okv Ahtu gv; Vmalongonugv Pwnvyarnv okv Ahtu aminv nonu gvlo hartvnama paadubv okv nonu ninyi gvlokv paadubv, ngonugv Pwknvyarnv gvla okv Ahtu Jisu Kristo gv aya lokv.