KOLOSIAN
vdwa Paul gv Siti Jinam
Mintamchonam
Paul gv sitiv kolosae gvrja lo Kolosian mvngjwngnv vdwa lvkla jito, vv banggu akobv rinv Epesias gv doonyi chaagia peelvbv doonv Asia mainor aralo aadu. Soogv gvrja si Paul gv mvkuk jilin yama namgo, vbvritola Paul gv rigvdagv la rikudaku mooku ara hoka aadu, Epesias banggu lokv kodungkua rinv vdwa Paul vnglin jimu la ridu, vv Asia gv Roman mooku gv Kepital bv rinv banggu bv rinv lokv ngv vngmu jidu. Kolosia gv gvrja lo mvvlarula tamsarnv doodu vla Paul chinto, Oogv Pwknvyarnvnyi chinam okv alvjvbv ringlinbaalin nama paanam lvgabv “dowjeklo rigvdogvnv okv tujupkunam” bv mvngla akingobv kumrung dubv ridu vla mintoku. Vkvgv aolo, soogv tamsarnv vdwv vbvka mindvto, ayakmvu nam sum okv dvnam gv lvkwng so dvmatvngma dubv rinam sum arw rungdubv rirungdu okv kvvbi ogu ogugo arw dubv Pvbv doonam sum ridubv rirungdu.
Paul jvjv rungnv kristan doin lokv svbv tamsarla minam vdw sum hakla vv makv vla siti lvktoku. Ninyigv mirwk sikunam gv haapok jvngv si Jisu Kristo mvnwng gv turku nga jila kujinv okv oogv kvvbi mvngjwng gunv okv si ninyigv lokv adu modubv rila risargwngsar la rilaria gvvdu. Jisu Kristo gv lokv, Pwknvyarnv nyiamooku am pwklinyarlinto okv ninyigv lokv lvkodv um atubongv aw gvlo laakur siduku. Jisu Kristonyi akingobv rinam mvngchik lokv nyiamooku si ringlinbaalin riku vla mvngtin sinamgo doodu. Vbvrinamv Paul alvjvbv mvngjwngnv vdwa singnam lvgabv si kairungnv tamsar svgo dodudw um milin jitoku.
Si chinsv go doodu, Paul lvgabv siti sum kolosae lo gvvlwk jinv Taichikus ninyia Onesimus vngbam la vngtoku, Paul soogv nyira gv lvkwngbv Philemonnyi siti am lvkto.
Arwng lokv darlinnam
Mintamchonam (1:1-8)
Klugv dodungsunv okv Kristo gv kudungkua (1:9-2:19)
Kristo aralo anw bv singnam (2:20-4:6)
Minyungminya (4:7-18)
1
1 Paul lokv, Pwknvyarnv gv mvnglwk lokv Jisu Kristo gv apostol akobv rinv, okv ngonugv achiboru Timoti lokv—
2 Pwknvyarnv gv nyi Kolosae lo doonv, ngonugv lvgabv Kristo gvlo mvngjwng sinv ajin vdw:
Ngonugv Abu Pwknvyarnv nonua ayanam okv sarsopoyo nama jilaka.
Umbonyikv vnam gv kumnam
3 Ngonugv Ahtu Jisu Kristo gv Abua, vdwlo nonugv lvgabv kumrinyi, ngonu Pwknvyarnvnyi umbonyikv vbv jidunv. 4 Vkvlvgavbolo nonugv Jisu Kristonyi mvngjwngla okv Pwknvyarnv gv nyi vdwa nonugv paknam am ngonu tvvpadu. 5 Vdwlo jvjvrungnv doin, alvnv yunying ngv, nonu gvlo atuake bv aacho kubvdw, mvngtin kunam gv lvkwng lo tvvpatoku. Vkvlvgabv nonugv mvngjwng okv pakmisinam lvgabv nonu ogugo mvngtin sidudw, um nonugv lvgabv nyidomooku lo pvvjidunv. 6 Pwknvyarnv gv anyuaya nam lvkwng lo tvvtutvke bv nonugv pingkolo tvvpa dw alu lokv okv si jvjv gurung vla chiri lokv gamlv ngv chinggodogo mooku soka gosik karla okv boktalwkji kunam am laalwk jitoku. 7 Kol 4:12; Pilem 23 Nonu Pwknvyarnv gv aya nga, ngonugv*Ngonugv; Kvvgonv kitaplo doodu Nonu. pakbu ribam ajin, Oogv ngonugv lvgabv mvngjwng sila Kristo gv kudungkua rinv Epapras gv lokv ngv chintoku. 8 Hv Dow lokv nonua paknam jilwk kunama ngonua mintam jitoku.
9 Soogv lvkwnglo nonu lvgabv ngonu tvvpa dala riyi lokv nonu lvgabv, ngonu kumbv jikila ridunv. Ngonu Pwknvyarnvnyi ninyigv mvnglwk lo chinampanam, mvngkimvnglak okv tvvlakbulak gvnvnv dow jilwk nama nonu gvlo pwklwk jitokv vla kumdunv. 10 Vbvribolo nonu Ahtu gv mvnglwk bv nonu singla reku okv ninyigv oguaingbv mvngjwk dudw vbvching mvngpu dubv ribv jila reku. Nonugv singnamrinam lo nvgwng mvnwng gv alvnam kudungkua ngv boklinre, okv Pwknvyarnv gvlo nonu chinvpanv gobv singchare 11-12 Ninyigv yunglitnv jwkrwv mvnwng ngv oogv aanv vv nonua gwlwksopa dubv mvgv yilaka, vkvlvgavbolo ogumvnwng gv hirukaya nam dvdv nga chitam sila ridula saktv lakdubv. Okv Pwknvyarnv ogugo loung gv karv lo ninyigv nyi vdwgv lvgabv pvvchingpvvmu jinam um nonugv baak am paadubv mvnv, Abunyi mvngpu gvdula umbonyikv†Mvngpu gvdula ombonyikv vtoVmalo Saktv gvdula okv mvngpu. Okv ombonyikv vtoku vtoka. 13 Kanvparam gv jwkrw lokv hv ngonua ringlin toku okv ninyigv Kuunyilo gv karv lo laalwk laku ringlwkto. 14 Epe 1:7 Vbvriku lokv gvngv ngonua anyujvbv rimindakmin moduku okv ngonugv rimur am mvngnga jitoku.
Kristo gv kudungkua okv nyidam ngv
15 Kaapa nyolanv Kristo kaapa nyoka manam Pwknvyarnv aingdo. Hv bvngtubvngke bv bvngnam Kuunyilo go, pwklinyarlinnam dvdv nga kaiyachok nvgo. 16 Holvgabv ninyigv lokv nyidomooku lo doonv okv sichingmooku lo doonv, kaapanam okv kaapa manam ikimora, dowjwklo jwkrw, atu vdwa, rigvdonv, okv tujupkunam vdw aka mintakla mvnwng nga Pwknvyarnv Pwklinto. Pwknvyarnv ninyigv lokv ngv chinggodogo mvnwng nga pwktoku okv ninyigv lvgabv pwktoku. 17 Ogumvnwng ngv dooma tvbv Kristo doocho linto, okv ninyi gvlo akingobv ridula ogumvnwng ngv atubogv dooji kolo doosu toku. 18 Epe 1:22,23 Hv ninyigv adwnanmar gv dumpo ngv, oogv adwnamar vv gvrja ngv; hv adwnamar gv turlin kobv ridunv. Hv sipikula turkur kunv, Hv mvngchik ogumvnwng nga doocho yachok kunam lvgabv Kuunyilo bvngtu bv ridunv. 19 Holvgavbolo Pwknvyarnv ninyigv Kuunyilo nga Pwknvyarnv gv ridungnga ridubv ninyi atubogv mvngnam lokv mimbwk toku. 20 Epe 2:16 Vbvrikunamv, Kuunyilo lokv, Pwknvyarnv ninyi atubogv gvlo chinggodogo nga laakur lwkdu kubv mimbwk jitoku. Pwknvyarnv ninyigv Kuunyilo gv daapo lo oyi‡Ninyigv Kuunyilo gv krosslo oyi sarjinam lokv; Vmalo Ninyigv Kuunyilo gv erin peelwkjinam lokv. sarjinam lokv sarsopoyo dubv mvtoku holvgabv nyidomooku gv okv sichingmooku gv, anyi gv ogumvnwng dvdv nga ninyi gvlo laakur lwktoku.
21 Lvko nonu Pwknvyarnvnyi adu laku rito okv vkvlvgavbolo nonugv alv manv oguogu rinam lokv okv mvngmur kunam lokv ninyigv nyimak bv rito. 22 Vbvritola vjak, ninyigv Kuunyilo gv adwnamar am sijikunam lokv, Pwknvyarnnv ninyigv ajin bv mvtoku, nonua darwk dubv, darkw dukubv okv gungnying go kaaku madubv, ninyigv dooku lo doomu dukubv vla mvtoku. 23 Vv jvjvklvbv, nonuv jwkjwkvrwk bv ribv la okv lvngtung tunlwk runglaka, okv nonugv mvngtin sinam gamlv nga tvvpa laku paaku bvdw um nonu atubongv dvlobak mabv ritoka. Soogv gamlv nga nyiamooku mvnwng lo minggo kunam gv soogv pakbubv Paul ngo ripvkunv.
Gvrja gv lvgabv Paul gv kudungkua rijinam
24 Okv vjak, ngoogv nonu lvgabv hirukaya bv hinam lvkwng lo ngo mvngpu bv mvngsu dunv, vkvlvgavbolo ngoogv adwnamar lo hirukaya bv hinam si gvrja gv lvgabv, vjvlodvbv oguaingbv Kristo gv ninyigv adwnamar am hirukaya bv hila ritungnga ripwngrinya ridubv ngo ridur dvnv. 25 Okv ngam oogv nonugv alvnam lvgabv kudungkua riya dubv jinv, Pwknvyarnv gv lokv ngam gvrja gv pakbu ako bv mvto. Hoogv kudungkua vnamv doin am japnyachika jidubv kudungkua jinamgo. 26 Oogv klukuchu gv vngrokunv nyia adwnamar am chimu mabv Pwknvyarnv gv vvching kunamgo vbvritola vjak ninyigv nyi vdwa kaatam la riduku. 27 Pwknvyarnv gv rungnamv ninyigv arwng gv vvsi nama ninyigv nyi vdwa chimpa modubv vla, soogv nyitv okv vvsinam yunglit si hv nyi mvnwng gv lvgabv doogvto. Okv oogv vvsinam vv Kristo nonugv aralo doodu, vbvrikunamv vv nonu Pwknvyarnv gv yunglitnam aba lo rireku. 28 Vkvlvgabv ngonu Kristo gv lvkwnglo mvnwng gvlo japgo kardunv. Ngonu nyi mvnwng ngv Kristo gvlo akin gobv rila gvrila mvngki laknv vrungbv ritola Pwknvyarnv nvchilo laalwk dubv mvngkimvnglak lokv gamrw okv tamsar la bunua ridunv. 29 Sum ripwngrinya gvvdubv vla ngo gvlo oogv kudungkua ridunv jwkrw lokv okv oogv kristo gv kairungnv gwlwk jinama ngo rinvla okv raitungtung bv ridukunv.