GALASIAN
vdwa Paul gv Siti Jinam
Mintamchonam
Jisu kristo gv alvnv yunying nga milwknam lvkwng lo japrap jilaku riyilo okv jius manv nyi vdwgv pingkolo laarwk sirapto, hooka jvjvnv kristan nyi alvnv akobv rinam lvgabv Moses gv pvbv nga tvvrung dubv riduri vla tvukapak gaam go tvvkato. Paul mirwk sila minto Pvbv umjvdv vbv tvvrung dubv rinam jvgo kaama vv jvjv mingkubolo, turnam gv kolv lvri jvngv Jisunyi mvngjwng nam lokv, oogv Pwknvyarnv gvlo ogumvnwng nga takdamara jvbv dooku lokv paadunv. Vbvritola Galasia gvrja vdwgv pingkolo, Asia mooku aralo twngching yanv roman mooku lokv Galasia mvngjwngnv nyi vdwv hoka aalaku okv milaku Pwknvyarnv gvlo takdamara bv doonam lvgabv Moses gv Pvbv loka tvvrung dubv ridunv vla mintoku.
Paul gv Galasian vdwa siti lwknam si mvnv runv mintam nam vdwgv mvvla vngye gvvkunam nyi vdwa takdamara bv aakur gvvdu kubv okv jvjv rungnv am mvngjwng modu kubv vla lvktoku . Paul Jisu kristonyi ninyigv takdamara bv mvngging sunam Apostol akobv mirap sitoku. Hv vbv mimbv suto ninyigv apostol akobv rinamv Pwknvyarnv gv lokv aapvnv, nyianyidung tulwkunam lokv aama pvnv vtoku, okv si minje jekubolo ninyigv rilwkdolwk jikuv jius manv vdwv gvlo jitoku. Vbv hv larbv sidula nyi vv mvngjwng nam lokv Pwknvyarnv gvlo takdamarabv doola dunv. Minyungminia bvku minamv Paul kristonyi mvngjwng lokv Kristan ridung nga paknam lokv kaatam tvka
Arwng lokv darlinnam
Mintamchonam (1:1-10)
Paul gv apostol akobv tulwkkunam (1:11-2:21)
Pwknvyarnv gv aya ngv (3:1-4:1)
Kristan anyubv riminkunam okv risvvngsv Laakunam (5:1-6:10)
Ataranya bvku (6:11-18)
1
1 Paul lokv, oogv Apostol akobv goknamv nyia nyidung lokv aama, vbvritola ngonugv Jisu kristo lokv okv ninyi sikunvnga turmu kunv Abu Pwknvyarnv lokv aapvnv. 2 Okv ngam reming gvnv kristan ajin vdwv Galasia gv mvngjwngnv mvnwng nga kumrwklwtaknam gaam am jilwk jito. 3 Pwknvyarnv ngonugv Abu okv Ahtu Jisu kristo gv aya jinam okv sarsopoyonamv doi laka.
4 Silumelu gv alvmanv lokv laalin kunam lokv, Kristo ninyi atubongv ngonu rimur lvgabv sijinam si ngonugv Pwknvyarnv okv Abu gv mvnglwkkaalwk lo ridunv. 5 Vkvlvgabv Pwknvyarnv gvlo dvbvsingtambv yunglit namv doobv yilaka! Amen.
Gamlv akinnv
6 Ngo nonua ogubvda bvri mvngla mvngdu! Oogv Jisu kristo gv anyuaya lokv*Jisu kristo gv anyutaku bv aya jinam lokv; Kvvgonv kitap lo Ninyigv anyutaku aya lokv. goknam am nonu mvnwng ngv vjakpi gobv kayu datola, okv kvvbi gv gamlv yangaya laarwk silaya riduku. 7 Jvjvrungbv mimbolo, hoka ogu kvvbi “gamlv yago kaama,” vbvritola ngo sum mindu ogulvgavbolo hoka nyi meego nonua ridwkriku la okv kristo gv gamlv am angusibv miyela mindubv rikw nyadu. 8 Vbvritola ngonua amajeka nyidogindung go nyidomooku lokv ho ngonugv gamlv japji pvkunam am kayu tvla angusibv kvvbi yago japji dubolo, ninyia aka uyumooku lo miyakaya lvkreku! 9 Ngonu um mincho tvnam aingbv, okv ngo vjak lvkodv mindv dunv: nonu laarwk sirokunam gamlv am kayu tvkula kvvbi gamlv go minggo karji nvgo doopv bolo, ninyia uyumooku bv miyakaya kunam bv lvkreku!
10 Ngoogv vjakgv svbv ridunv si nyia gv mvnglwkkaalwk bv ritvtvdu nvdw? Maa vbvma, ngo ogugo ridudw Pwknvyarnv gv mvnglwk bv rinvpv mvngla ridunv! Ngo nyi vdwa tvvpakapa kodu bv vla ridunvdw? Ngo vjvlodv vbvridv dubolo, ngo kristo gv Pakbu gobv minla suma dunv.
Paul oguaingbv apostol akobv ripvnv
11 Ngo nonua minji dunv, ngoogv ajin vdwv, ho ngo gamlv japdunv si nyia nyidung gv lokv japlin madunv vla. 12 Ngo nyia ridungdodung lokv oguguka laarwk sima pvnv, vmajvka yvvka ngam tamsarnam goka kaama. Si Jisu kristo gv ninyi atubongv ngam kaatam suku lokv paanamv.
13 Nyim 8:3; 22:4,5; 26:9-11 Nonu mintoku ngo vdwlo ngo Jius dormo lo tulwksila riyilo ngo vdwgo oguaingbv ribvdobvdw, vdwgo ngo Pwknvyarnv gv gvrja vdwa ogu aya mvngpa namgo kamabv mvdwkmvku la okv ngoogv lvgvlvmabv mvyakriyak la ritoku. 14 Nyim 22:3 Ngoogv Jius dormo lo ridu lo ngoogv singtam anying lo ngo Jius nyi kvvbiya alvyabv chinyala rito, okv ngonu abuapa gv ridungdodung lo dinchikochi alvbv rito.
15 Nyim 9:3-6; 22:6-10; 26:13-18 Vbvritola Pwknvyarnv ninyigv anyuaya lokv ngam anv gv kipo lokv bvnglin madvbv gakcho la ritoku, okv ngam ninyigv kudungkua nga ridubv goktoku. Okv vdwlo hv 16 Ninyigv Kuunyilo am ngam kaatam sidubv vla mvngpwk lakula kaatamto, ogulvgavbolo ngo ninyigv lvkwng lo Alvnv Yunying nga Jentail vdwgv pingkolo japji koodubv vla kanam ilo, ngo yvvgvlo ka minsar kodubv vla vngnam kaama, 17 Vbvmajeka oogv apostol rinv vdwaka Jerusalem loka ngam kaarwk sitv bvka vngmato, vbvmayabv, ngo vjakpigobv Arabia yabv vngto, okv vbvrikunamv ngo Damakas bv vngkur toku. 18 Nyim 9:26-30 Anying nyingam koching bvku ngo Pitar gv dukubv yunyingsa tvvkurtvrwk la ho ngo Jarusalem bv vngtoku, okv ngo ninyia hoka alu looring gula loopi gobv dooming gvvtoku. 19 Ngo Ahtu gv nyikapsu Jems gv lvvyalo kvvbi Apostol yago kaarwk sipa mato†Jems gv lvvyalo kvvbi Apostol yago kaarwk sipa mato Vmalo Ogu Kvvbi Apostol ako; nyido kvvbigo kaanamv ngo Jemsnyi kaato..
20 Ngo ogugo lvkdudw si jvjv ngv. Pwknvyarnv chindu ngo mvvma dunv vla!
21 Ho kochingbv ngo Sairia okv silikia mooku lo vngtoku. 22 Oogv aluching lo Judia lo doonv gvrja nyi vdwv ngam yvvka aw am kachin mato. 23 Bunu kvvbi vdwgv mindung nama chimwngdu: “Nyi angv kvvlogv ngonua mvdwkmvku la ribwngnv angv hv atubongv mvyakriyak dubv rikwnam oogv mvngjwng nga vjak japgo jidu!” 24 Okv holvgabv bunu ngoogv lvkwng bv Pwknvyarnvnyi hartv la rito.
*1:6 Jisu kristo gv anyutaku bv aya jinam lokv; Kvvgonv kitap lo Ninyigv anyutaku aya lokv.
1:13 Nyim 8:3; 22:4,5; 26:9-11
1:14 Nyim 22:3
1:15 Nyim 9:3-6; 22:6-10; 26:13-18
1:18 Nyim 9:26-30
†1:19 Jems gv lvvyalo kvvbi Apostol yago kaarwk sipa mato Vmalo Ogu Kvvbi Apostol ako; nyido kvvbigo kaanamv ngo Jemsnyi kaato.