PILIPIAN
vdwa Paul gv Siti Jinam
Mintamchonam
Paul gv siti lvknam si Pilippian vdwgv mvngjwngnv vdwa Europ vdwgv kvdw lo Rom mooku arwng lo doonv Mesidonia lo oogv Paul ninyigv riturikebv gvrja mvlwk jikunam vdwa siti sum lvkto. Soogv siti sum Apostol Paul ninyigv Patwk doi alulo siti sum lvkto, okv ninyigv ribv gvvnam kristan ajin Kvvgonv ninyigv peelv bv alvmabv minla adwkaku dubv rimutoku. Okv vbvriyi alulo um Pilippi gvrja lo mvvlarula minggo karla riyilo siti sum lvkto. Vbvrijvka Paul gv ninyi Jisu Kristo gvlo arwng rungbv mvngjwng siku lokv mvngpu okv mvnglwk nama minbwk jila siti so lvktoku.
Soogv siti sum lvknam lvkwng si oogv jilwknam amin lvgabv Pilippi kristan vdwgv ninyigv mvnggab nam alu dwa oogv bunugv ninyia mvdurridurla jilwk kunam am umbonyikv vla minv dubv lvkla jilwkto. Hv soogv alvnv dw sum rinvpanv gvrila haapok am pvktvsintv dubv mvngsula rigv nvdubv bunua mintam do, vkvlvgavbolo bunu vdwv hapokv pvktv ladubv okv ninyigv adwkaku mvnwng lo mvngangatvng mabv dakrap minsu ladubv bunugv atubogv lvgabvka minto. Kaimvngsunam okv atubogv lvgabv mvngchik rigvkomam svnga, Jisu Kristo gv rvniak bv rinam am gvvtoka vla Paul ninyi kumla minto. Paul bunu vdwa Kristo gvlo akingobv rinamv mvngjwng sinam lokv Pwknvyarnv gv anyuaya gv amin jinamv vla minto, Jius vdwgv pvbv ridungrimalo riming gvnam lokvma. Kristo gvlo akingobv renv vdwa Pwknvyarnv gv mvngpuv okv sarsopoyo bv rinam am jidunv vla Paul siti lvkto.
Soogv siti so mvngpunam, mvngdw sinam, haapok pwkinnam, okv Kristan mvngjwngnam lo ribvdoobvla rinam okv turnam lo rinamdaknam lokv dinchi yanam lvgabv mvngla siti si jiu pvdubv vla lvkto. So Paul gv Pilippi gvrja nga arwng rungbv paknama kaatam sitoku.
Arwng lokv darlinnam
Mintamchonam (1:1-11)
Paul gv atubogv adwkaku sunam (1:12-26)
Kristo gv aralo turnam (2:27-2:18)
Timoti okv Epaphroditus gv lvgabv rungnampanam (2:19-30)
Nyimak vdwa okv hinsarbabaknam lvkwnglo gamrwnam (3:1-4:9)
Paul okv ninyigv Pilippi lo doonv ajin vdw (4:10-20)
Minyungminya (4:21-23)
1
1 Nyim 16:12Jisu Kristo gv pakbu akobv rinv Paul okv Timoty bunyi gv lokv—
Oogv Kristo gvlo akingobv rinv Pilippi lo doonv Pwknvyarnv gv nyi vdwa, gvrja nga rigvdogvnv okv ridorminggvnv vdwaka mintak sila:
2 Ngonugv Abu Pwknvyarnv okv Ahtu Jisu kristo nonua ayanam okv sarsopoyo nama jilwk yilaka.
Paul gv kumnamv Ninyigv purinv vdw lvgabv
3 Ngo Pwknvyarnvnyi umbonyikv vla kumrap dwkibv nonua mvngpadunv. 4 Okv ngo kumyi dwkibv mvngpu dula, nonu mvnwng lvgabv ngo kumla ridunv. 5 Ogulvgavbolo riturike lokv rila yikula vjvlodvbv nonuno ngam gamlv gv kudungkua lo ridur la lamtv nga kaatam la ridu. 6 Okv vbvrinamv nonu gvlo soogv alvnv kudungkua sum rirapgvnv Pwknvyarnv, oogv Jisu Kristo gv aluv aanya ma dvdvbv so gv sum no gakbwng chikwngla riredore vla ngo alvrungbv mvngdunv. 7 Nonua ngoogv hapok aralo mvngpa dvdv kidunv! Okv vkvlvgabv nonugv lvkwnglo ngoogv vbv mvngnam si mvngrung dubv rrirungdunv mvngdu. Ogulvgavbolo nonuno svkvnv kudungkua ogumvnwng sum ridur dula Pwknvyarnv gv nga orpinorin sidubv jitoku, vjak ngo anyi baabwng nga patwk lo doodu laka, okv vdwlo ngo ajarabi bvka ridula gamlv am karingsiching bv okv gwlwkrungbv mvkukrikuk la riduku. 8 Ngo vdwlo nonu mvnwng lvgabv achialvbv ngo haapok sokv mvngnamv Jisu kristo ninyigv atubogv aw lokv aanv ngv vla mindudw okv jvjvrungbv minam am Pwknvyarnv ngo gvbv miria jinv ngv.
9 Ngo nonugv pakmisinam am jvjvklvbv chinampanam lokv okv rvbwngching jwngkadaka nam lokv lvkin gobv kai lo kaiyaya bv ribamdobam la ribvre vla kumdu, 10 vkvlvgavbolo nonuno ogunv alvyachok nvngvdw um gaklare. Vbvribolo nonuno arwanyu nvbv rimare okv Kristo gv alu am alvmabv nvvlwknam gobv riku mare. 11 Jisu Kristo mvngchik gv rilen gvvlanamv, Pwknvyarnv gvlo hartvnama okv paknama laalwk dubv nonugv gwngnamsingnam lo jvjvrungnv ngv alvjvbv doolwk la rire.
Turnamv Kristo gv lvgabv
12 Ngoogv ajin vdwa, ngam ogugo ripvdw vbvrinam oogv gamlv ngv jvjvrungbv ridur la alvyabv rinvvngnv nvgobv rito, um ngo nonua chintoka vla mvngdunv. 13 Nyim 28:30Vbvrijo ngv kaakunamv, dvbvkarv lo dakyanv okv nyikvvbi dvdv ngv ngam Kristo gv pakbu bv rinam lvgalo ngo patwk doopvnv vla chintoku. 14 Okv ngoogv Patwk aralo doonam lokv mvngjwngbu twngtv yanv vdwv kaiyago Ahtu gvlo mvngjwng svlwkla rito, vkvlvgabv ogu guka busukano kaamabv pwktvrungbv bunu vdwv twngtvyanv Doin am*Doin; Kvvgonv manuscripts loPwknvyarnv gv doin. aludwkibv japgo yaya karla rito.
15 Ridungrima gvbv Kvvgonv kristo gv lvkwnglo ngam kaanek la okv minwng la japgo karnia la ridu, vbvritola Kvvgo nvgv rinamv alvbv mvngnam lokv kudungkua nga rito. 16 Soogv rinam si paknam lokv ripvnv, ogulvgavbolo bunu vdwv ngam gamlv nga jvjv ngvrung vla rinvnv kudungkua nga Pwknvyarnv gvlo gvngv jipvnv vla chindu. 17 Kvvbi vdwv, Kristonyi jvjv alvbv japgo jimadu, vbvritola bunu awgv yalu lokv mvngchik mvngdu; bunu ngoogv patwk aralo doilo maatar alvbv mvrikmvchik modula erit emu dubv vla mvngdu.
18 Siidv ogugula! So lvkwng lo ngo mvngpudu—ogulvgavbolo alvnv lamtv lokv mindulo vmalo alvmanv lamtv lokv mindulo, Kristo gv gamlv am japgo kardu. Okv vkvlvgabv ngo mvngpu la ribvre. 19 Ogulvgavbolo nonugv kumnam lokv okv Jisu Kristo gv Dow gv ridurnam lokv ngam laalin pvkunv vla ngo chindu. 20 Ngoogv arwngrungbv mvngnamv okv ngo mvngtin dunv si ngoogv kudungkua lo vdwloka remabv doonam kaamare mvngdunv, vbvritola oogv dw mvnwng lo, okv jvjvklvbv vjak daadwka, ngo mvngtvmvngru gv chvrv ngv lvvpuk dvdvre, vkvlvgabv, ngo turjvka okv sijvka, ngoogv adwnayak am Kristonyi hartv nvla ribvre. 21 Holvgabv turnamv ogudw? Ngoogv lvgabv, Kristo nv. Vbvrikunamv, sinamv, alvyabv turnam laalwk yareku. 22 Vbvrijvka ngo turla dubv dvdv bolo ngo kaiyayabv arv doonv kudungkua lo rila tvnvpv, vbvrikubolo ogugunyi gakla riyidw um ngo mila nyuya ma. 23 Ngam aba anyi gobv putoku. Ngo soogv adwnamar bv turnam sum achialvbv kayu nwngdu okv Kristo gvloya akingobv riming gvnwng yaduku, hoka ngoogv lvgabv ogumvnwng ngv alvyanv gobv ridu; 24 Vbvritola nonugv lvgabv ngo turla doonam si achialvgo dinchiyanv ngv. 25 Sum ngo jvjvklv hinrungsidu, okv vkvlvgabv doodvre vla ngo chinsudu. Nonu mvnwng gv lvkobv ngo doore, nonugv alvbv rinamdaknam am kaiyayabv ripwngrita dvdubv okv mvngjwng lo himpure. 26 Vkvlvgabv vdwlo nonu lvkobv ngo lvkodv doodv ridw, nonugv turnam lo Jisu Kristo gvlo akingobv rikulo nonu ngam kaiyayabv googv sinvnam gobv rire.
27 Vjakgv, dinchirungnam si um nonugv turnam lamtv lo Kristo gv gamlv mingku jvbv vngrungtoka, vkvlvgavbolo ngo nonu gvlo vngla okv kaala mabv rijvka, nonugv mvngjwng ngv vngdvng la gamlv lvgabv nonuno rungkirunglak gvrila akingobv dakrap minsula okv um mvngnamv akingobv turbumlarbum nama ngo tvvpa tvnvpv. 28 Nonuno nyimak vdwa busu yoka; haapok am pwktvpwkru la ribv laka, okv vbvrinam lokv bunugv rilamanam am okv nonu rigumriya yareku vla bunu chinsukaasu riku, ogulvgavbolo nonua rigumriya yadubv jinv ngv Pwknvyarnv ngv jidu. 29 Ogulvgavbolo nonua Kristo gv kudungkua nga ridubv jito, ninyia mvngjwng mvngchik la rimwng yoka, vbvritola ninyigv lvgabv hindarkaso aka hindubv jito. 30 Nyim 16:19-40Vjak nonu ngoogv yalungnyimak damku lo daming gvla do. Soogv yalungnyimak damkwng minsu dubv ngam nonugv kaanam si kvvlo gv damro akinnv, okv vbvching nonu tvvsudu, oogv akin am ngo vjvlodvbv damkwng minsu dvvla ridungdu.