La Lotu God Na Tuka
7
144,000 Non God
1 Hitahun haratu na hite la angelo atu mo vati, la lo turu hin la pulo varama atu mo vati, ale la angelo atu la lo taurilati la langi atu mo vati na varama vara i pa sopo te langi hatea i er̃i sere na varama teni i sere na tasi teni i sere te vipahai hatea. 2 Ale na hite na angelo tinapua matea mo lo vele Opae mo tauri na taipulu non God mauri, ale mo ulo tavera isan la angelo atu mo vati sei la lavi na suiha vara la pa er̃i komo na varama peresi na tasi, Jer 49.36; Dan 7.2; Zec 6.5 3 mo verea mara, “Ha sopo komo na varama teni tasi teni te vipahai hatea tako matan r̃a sopo lo tau na taipulu na punghori volitusi non nor̃a God.” Ezek 9.4, 6
4 Ale na rongo na evin la tamlohi atu la tau na taipulu hinira, mo tikeli 144,000 ale la tamlohi atu la tai na tavtavui tari matan Israel:
5 12,000 na tavtavuin Judah,
12,000 na tavtavuin Reuben,
12,000 na tavtavuin Gad,
6 12,000 na tavtavuin Asher,
12,000 na tavtavuin Naphtali,
12,000 na tavtavuin Manasseh,
7 12,000 na tavtavuin Simeon,
12,000 na tavtavuin Levi,
12,000 na tavtavuin Issachar,
8 12,000 na tavtavuin Zebulun,
12,000 na tavtavuin Joseph, peresi
12,000 na tavtavuin Benjamin.
Vao Tari Na Varama
9 Hitahun haratu na kilau vano, e! Vao tavera matea tea i sopo er̃i evira, la mara jara tinatinapua tari, tavtavui tari, ale tamlohi purongo tari, peresi na leo tari la lo turu na naho jara sakele non supe, ale na nahon Natu Sipsip. La ruru na ruru lulu peravu, ale la lo tauri na rau viniu na limara, 10 ale la lo ulo lara,
“Suiha mata juri na tamlohi mo lo toho na liman nor̃a God,
mo lo sakele na jara sakele non supe peresi Natu Sipsip.”
11 Ale angelo tari sei la lo turu r̃alihi na jara sakele non supe peresi la tamlohi aulu tari atu peresi la hinau mauri atu mo vati, enira mo isoiso la juruvi popovi na lepa atano na naho jara sakele non supe, ale la lotu God.
12 Lara,
“Amen! Avulahi isana,
hasohasona, lelevosahi,
vere meje, oloolo,
suiha peresi na r̃ilangi,
enira non nor̃a God
mata rani tui tui tarea! Amen!”
13 Ale vonan la tamlohi aulu atu matea mo usia isaku mara, “Ko levosahi la tamlohi nike sei la lo ruru na ruru lulu peravu? Ko levosahia vara la tai epu?”
14 Na r̃aramia nara, “Tapala, mo vono, pani engko ko levosahia!”
Ale mo verea isaku mara, “La haranike natu, la jelu hin pongi r̃ilangi tavera atu. La hoje na nora ruru peravu na r̃aen Natu Sipsip ale mo vaira la lulu. 15 Ale matana, la er̃i turu na naho jara sakele nona supe non God vara la lotua tarea na nona Temple, ale haratu mo lo sakele na jara sakele nona supe enia i pa lo kilaura. 16 La pa sopo er̃i marohati teni la mar̃ohu hin te rani, ale alo i pa sopo er̃i vilira, teni langi tutuni i komora, 17 matan Natu Sipsip sei na livuha jara mata jara sakele nona supe i pa kilaura, ale i pa tiromara la vano na patu wai sei la sile na mauri, ale God i pa kamoti na waimata na matara.”