प्रकासितवाक्य यूहन्ना के जरिये
प्रकासितवाक्य यूहन्ना के जरिये
परिचय
प्रकासितवाक्य की किताब नये नियम की आखरी किताब है। जहो ईसु के जनम के लमसम 95 साल बाद प्रेरित यूहन्ना के जरिये लिखी गई रहै 1:1। बौ गौस्पल यूहन्ना के हिसाब से और तीन किताब 1 यूहन्ना, 2 यूहन्ना और 3 यूहन्ना भी लिखी। यूहन्ना कै “जोसे ईसु प्यार करत रहै” ऐसियौ करकै भी जानो जात रहै यूहन्ना 13:23। बौ पतमुस द्वीप मैं प्रकासितवाक्य की किताब जौ बजह से लिखी काहैकि बाकै ईसु मसीह के सुसमाचार को प्रचार करन के ताहीं निर्वासित*1:0 कैद करो गौ रहै। प्रकासितवाक्य 1:9
प्रकासितवाक्य की किताब लिखन मैं, यूहन्ना को उद्देस्य, पढ़न बारेन कै ईसु मसीह के प्रति भरोसेमंद बने रहन और उन्हैं आसा देन के ताहीं प्रोत्साहित करनो है काहैकि ईसु के लौटन को समय झोने है1:3, 22:7। बौ सब विस्वासिन कै आमतौर मैं और सात खास कलीसियन कै 2–3 मैं लिखी रहै। यूहन्ना अपने खुद के लेखन कै भविस्यवाँड़ी 1:3 के रूप मैं नामपत्र करथै और जो कछु बौ देखी बाको वर्ड़न करन के ताहीं पूरी किताब मैं कई चित्तरन को इस्तमाल करथै। जौ किताब पुराने नियम के कुछ भाग के हानी है, खासकर जकर्याह 6:1-8। सात तुरहई और सात कटोरा बे आफत के हानी हैं जिनकै परमेस्वर मिस्र कै सजा देन के ताहीं भेजी रहैनिर्गमन 7–9। प्रकासितवाक्य की किताब समय के अंत के बारे मैं बात करथै, कि ईसु जीतैगो, और बे सब जो बाके ऊपर भरोसा करथैं, हमेसा के ताहीं बाके संग रहंगे। जौ किताब तुमकै चितौनी देबै और तुमकै आसा देबै कि ईसु जल्दिये बापस आयरौ है।
रूपरेखा
1. यूहन्ना जौ कहने से सुरू करथै कि बौ कौन है और बौ जौ भविस्यसूचक दर्सन कै कैसे पाई। 1:1–1:20
2. बौ सीधे ईसु के घाँईं से सात कलीसियन कै संदेस देथै। 1:1–3:22
3. फिर बौ सात मुहर 4:1–8:5 और सात तुरहई के बारे मैं बताथै। 8:6–11:19
4. जाके बाद यूहन्ना सात मुड़ियन के संग अजगर के खिलाप नर बालकन की लड़ाई को वर्ड़न करथै। 12:1–14:20
5. फिर बौ गुस्सा के सात कटोरन के बारे मैं लिखथै। 15:1–16:18
6. अग्गु यूहन्ना बताथै कि कैसे परमेस्वर स्वर्ग मैं अपने दुस्मनन से जीतथै। 17:1–20:15
7. आखरी मैं बौ नये स्वर्ग और नई पृथ्वी के बारे मैं बताथै जो आखरी मैं आबैगी। 21:1–22:21
1
1 जौ किताब बे घटना के बारे मैं है जो ईसु मसीह प्रकट करी रहै। परमेस्वर अपने सेवकन कै जौ दिखान के ताहीं जौ प्रकासन दई कि भौत जल्दी का होन बारो है। मसीह अपने स्वर्गदूत कै पनारकै बाके जरिया अपने सेवक यूहन्ना कै बताई, 2 और जो कछु बौ देखी बौ सब यूहन्ना बताए दई। जौ पूरो परमेस्वर के संदेस और ईसु मसीह के प्रकासन की गभाई के जरिया करे गै सच्चाई के बारे मैं बाको लेखा जोखा है। 3 खुसनसीब है बौ जो कोई जौ किताब कै पढ़थै, और धन्य हैं बे जो जे भविस्यवाँड़ी संदेस के सब्दन कै सुनथैं और जौ किताब मैं लिखी गई बातन कै मानथैं! काहैकि बौ समय करीब है जब जे चीज होंगी।
सात कलीसियन को स्वागत
4 यूहन्ना के घाँईं से आसिया की सात कलीसियन के ताहीं: परमेस्वर के घाँईं से, जो है, जो रहै, और जो आनबारो है, और बाके सिंहासन के सामने सात आत्मा के घाँईं से अनुग्रह और सांति मिलत रहबै। 5 और ईसु मसीह के घाँईं से, भरोसा के काबिल गभा है, जो मौत से पहलिये जिलाओ गौ, और जो दुनिया के सब राजन को मुखिया भी है। बौ हमसे प्यार करथै, और अपने खून के जरिया बौ हमैं हमरे पापन से आजाद करी है। 6 और हमैं एक राज्य और अपने परमेस्वर दऊवा की सेवा करन के ताहीं पुजारी भी बनाये दई। ईसु मसीह के ताहीं महिमा और सामर्थ्य हमेसा और हमेसा के ताहीं बनी रहबै! आमीन।
7 देखौ, बौ बादर मैं आए रहो है! और हर कोई बाकै देखैगो, जो बाकै बेधी रहैं। पृथ्वी के सब जाति के लोग बाके ताहीं सोक करंगे। ऐसो होनो चाहिए! आमीन।✡1:7 दानिय्येल 7:13; मत्ती 24:30; मरकुस 13:26; लूका 21:27
8 सर्वसक्तिमान प्रभु परमेस्वर कहथै, “मैं पहलो और आखरी हौं,” जो है, जो रहै, और जो आनबारो है।
मसीह को दर्सन
9 मैं तुमरो भईय्या यूहन्ना हौं, और ईसु के पिछलगुआ के हानी मैं बे लोगन के ताहीं दुख को धीरज से सहन करन मैं तुमरो भागीदार हौं, जो बाके राज्य से मेल खाथैं। मोए पतमुस टीला मैं रखो गौ रहै काहैकि मैं परमेस्वर के बचन और ईसु के जरिया बताई गई सच्ची गभाई दौ रहौं। 10 प्रभु के दिन मैं पवित्र आत्मा मोए काबू कर लई, और मैं एक बड़ा जोड़न से अबाज सुनो, जो एक तुरहई की अबाज के तराहनी लगत रहै, जो मेरे पच्छू बोलत रहै। 11 बौ कही, “जो कछु तुम देखथौ बाकै लिख लियौ, और सात सहर की कलीसियन कै जौ किताब भेज दे: इफिसुस, स्मुरना, पिरगमुन, थुआतीरा, सरदीस, फिलदिलफिया और लौदीकिया।”
12 और मैं जौ मुड़क कै देखो, कि मोसे कौन बात कर रौ है, और मैं सात सोने की डीट देखो, 13 और डीटन के बीच मैं से एक इंसान के लौड़ा तराहनी दिखात रहै, बौ एक चोंगा पहने पड़े रहै जो बाके पाँव ले आत रहै, और छाती मैं एक सोने की कमरबंद पहने पड़े रहै। 14 बाके बार सफेद ऊन के तराहनी और बरफ के जैसे सफेद रहैं, और बाकी आँखी आगी के जैसी धधकत रहैं; 15 बाके पाँव ऐसे चमकीले पीतर के तराहनी रहैं जो भट्टी मैं तपाए कै चमकाय गै होमैं, और बाकी अबाज गरजत भै झरना के तराहनी रहै। 16 बाके सामर्थी दहने हात मैं सात तारा रहैं, और बाके मोहों मैं से एक तेज दुईधारी तलवार निकरी भइ रहैं। और बाको मोहो दुपारी के दिन के हानी चमकदार रहै। 17 जब मैं बाकै देखो, तौ एक मरे भै आदमी के हानी मैं बाके पाँव मैं गिर गौ। बौ अपनो दहनो हात मेरे ऊपर धरी और कही, “डराबै मत! मैं पहलो और आखरी हौं। 18 महीं जिंदो हौं! मैं मर गौ रहौं, लेकिन अब मैं हमेसा के ताहीं जिंदो हौं। मोए मौत और नरक की चाबी मेरे अधिकार मैं है। 19 लिखौ, फिर, तुम जो चीज देखथौ, दोनों चीज जो अभै हैं जे सब बाद मैं होंगी। 20 जो सात तारा तुम मेरे दहने हात मैं देखथौ, उनको और सोने की सात डीट को भेद जौ है: सात तारा सात कलीसिया के दूत हैं, और सात डीट सात कलीसिया हैं।”