1-2 Kemin, nali mafek mafek awak dukum ma kaami sang kaata bokop-talokomi. Kemin, weng san ilapya! Kristen unang tunum, kipyo, God ami naan-bamale, unang tunum alik iyo beten ke-bam, imi aket uyo, God ami yaap ke yo, akan-kaa-bamdiple, gavman alik iso, king, kamok kamok iso, imi beten kamayin-bilipya, God ayo dong dakaayin-balaya, ipyo tambal-kup tiin molipla, alik nuli uluum dinim, waasi dinim, tambal-kup tiin bomdupla, God ata-kup o kal-bomdup ami kukup tambal kaata-kup kutal-fuku kulii-una-bulupya yo! 3 Numi uldaa-yim-buusa tunum God ami tiin diim akal kanolin beten kaata atin ti tambal o kalala, beten umi fiyaap kaata dun-umba, kaa dok kata naa kalolip: Kemin, 4 God ali, unang tunum alik iyo foko kulii-tildang, Nalmi miit tem tiiliya, utamiwa yi, God ami kanuba namti kaa buu nu nikin o, ken-umba. 5 God maakup ata-kup tiina, kuno tunum maakup ma iip kabaaku tola God bik-abang daa, unang tunum bik-kaldang daa ke-bomda dong dakaayin-balala nuyo tal atamdup kela una-tala-kemin tunum kaa Yesus kulaata taa! 6 Siin kaali, God ami bokola-lomda: Kuno nayo, unang tunum alik imi iliim boyon o kala-somdaya, almi angtiil ayo maas kewase. Kemin, God ali numi kukuyalaya, utamupla yi, U faneng, God ali unang tunum alik nuli yim-bii-tildang almi miit tem daalon o, ken-umba nu, kalalupla utamsup. 7 Kemin, nali God alta, Umi sang uyo unang tunum imi bakayak o, kalalaya, uldaa-nam-buulaya, nili tiltam almi weng bakayin tunum kebi-kup ale, almi kalaan tunum ke kelile, akal bokop-na-lomda, Kapyo, tunum miit kusnum kayak kayak imi fanang din ilomdap, nimi tituun-kup tabin weng uyo kulii-din kukuyin-balawa, taltam Kraist ami lak uyo dakaamin o, nakase. Kemin, nali disa ibakamin weng bakabi disa; atin ti tituun-kup tabin weng kaata-kup bakabi te!

8 Nimi aket fukunbi namti kalabu: kapta bokoyapla, unang tunum iyo dok kanolin bokon kawu lotu kemum o kalip namti, tunum iyo tola beten ke-mokomip kiili ban kemin disa; aket atul tabemin disa; weng aal dikimin disa; atin ti talalu atafii-bam nuu-bamdipya, God ami aman dakaan-biliwa yo.

9 Nimi aket fukunbi namti kala buu: unang dak-finan-bamdipla, atin tifan ti lamlaam-kup tabemum o kala-lomdip, dabom kon ang-dina-bam ale, kiit kon tambal-kup tii-bam siyaat ting, iling aye, ilim kaal tiin buluusi so, ilim sisol dukum kiita saan-bi-lom falatam tiibi, dalaalmin daa; akolkup dik-diiba bomdipla, saak yak ilim kaal ma kanolin tap ma ilmi atamip namti, kuliita-kup ipyo tii-bam falatam miki-bilipla yo! 10 Kemin, unang ili God ami man kelum o kalip namti, kukup tambal tambal kaata-kup ke-mokomip kaata, fan imi kiit kon tii-lom lamlaam-kup tabemin kaami liip namti kaa be.

11 Unang uyo ti bilili-kup kala dik-diiba bomdu duluma weng uyo weng san-kaa-bamle kaami miit uyo utamum o kal-bomdipya yo. 12 Nali unang ma kewiya, uta taba-lom tiltam tunum ami kukolin unang ke-lokomu dinim ale, tunum ami dabom ke-lokomu disa; duluma bom, weng kaata-kup weng san-kaa-bamdipya yo 13 Kemin, kabak dokata naa kalolip: Siin kawu, God ayo Adam asiik dap-talalu duuba-kup ale, mafiing kaata Ef umi talalu kesa. Kemin, 14 Adam ali tunum mafak Setaan ami ibakamin weng kaata weng san-ilomda nosa disa; unang uta ibakamin weng uyo weng san-ilomdula, ban kesu! 15 Kata, unang iyo man faka-mokomip kaali, kano God ami lak kaali ti suunkup dakaa-bamdiple, olenin kaami kukup uyo kutal-fuku-lomdip atin ti tambal tambal ma ke-bam ale, aptum kusal iyo aket kukaayip namti, God ayo kukup tambal kaa kukaayokoma no.