6
1-2 Yesus ami kalaan tunum nikil nuli God aso bomdup okok kebup kemin, nuta ipni weng ma dukum-kup bokoyum o, kalup kemin, weng san iliwa! God ayo boko-lomda:
Unang tunum imi disa masiim kawu dong dakaayin-bam kapni iliim bomin am uyo daan tiltam tulu kala, kalaliya kawu, kapni weng uyo weng san-somdila dong dokop-tasii no,
kalase. Kemin, siin kaa God ali kanum bokosa. Kemin, am kamala kula daana kalawaali, God ali kipni weng uyo weng san-ilomda, kipni iliim boyin am kaayo, daan tiltam tulu kemin, dik-daaliwa, akal ipni dong dokoyak o. Kanolin kemin, kibi God ata disa masiim kawu ipni dong dokoyase kaa, ibi maas kela-laamin daa; kuno kelipla tal ipni diim abamnak o!
Yesus ami kalaan tunum imi okok ken-tal-une-bamdip aket uluum kaamsip kaami sang kaata ko
Ap 20:17-24, 1Kor 4:1-13, 9:1-27, 2Kor 4:1-15, 11:16-32
3 Utamuwa yi, Misii unang tunum iyo nikil nuyo itam bokoya-lomdip: Pol anang imi kukup so, weng so kiili, atin ti maakup disa yo, kal-bomdip weng itafiimin weng bakayililp o, kala ili numi kukup kaa kanu-bam God ami okok kebup kaami kalan kaata, God ami daang ukolalip o, kalalupla, nuli ti kukup tangbal so, weng so, kiili maakup ma nun-umbup. 4 Ti kukup tambal kaata-kup kukuyin-buluwa, ibi nikil nuli itamiwa yi, Ili tifan God almi ok tabolin tunum kesip. Kemin, numi kanun-umbup kaali, yak mafek mafek mafak tal numi diim abamnu aye, aket uluum kuluulup aa, saak yam-mafak-daalu aye, kaali ti aket atul ke-yimbu disa; ti titil-fak-daa-lom, God ami weng uyo kukaayila-yaabup. 5 Numi waasi ita tal sok faklet aye, asukum aye, ta ye-bam ale, sok ta de-yam-bamdip, fuut-kaayin-bam, atul-fak-daka-bam ke-biliwa, nuli atin iluut ti titil-fak-daa fiit-bam okok ke-bamdupya, nuli tambal-kup ma akan-unemin dinim; ima tinap-kup atin umtal-dakamsup. Lale, 6 nuli ti kukup tambal kaata-kup tabuu-bom ale, aket fukunin tambal namti kalabuu kala, kutal-fuku-som aa, abiltap-siik aket atul tabemin dinim ke-bam aa, unang tunum imi kukup tambal ma kamayin-bamdup kem-yaabup kaali, nuli God ami Sinik Tambal ami titil kaata kuluu-lomdup, tunum kusnum imi aket ayo ti dukum-kup kukaayin-bam kemsup. 7 Kemin, nikil nuli kanu-bamdupya, God almi tituun-kup tabin weng kaata-kup kukaayin-bam ale, God ami titil diim kawu ok kaa ke-bam, nuli atin tituun-kup tabin kaami kukup kaata, waasi dinin kaami mafek mafek kiita, sikil awaanlo fuku tingtuplo fuku kelin tap, ke-lomdupla, tunum ita taba-lom numi yam-mafak-daalum o, kebip kiiyo, kabaak banipla keyila-yaabup. 8 Kemin, tunum malo ma kiita, numi win uyo ku-mafak-dakaayin-biliwale, kuno malo ma kiita, numi win kaa kufuyin-bilip, malo ma kiita weng mafak kukaayim-bilip, malo ma kiita yang tunum kusnum imi bokoya-lomdip: Pol nikil kiili ti, kukup tambal-kup kebip o, kal-bom kanu-bilipya, malo ma kiita imi aket fukunin kaata, Nikil kuliili kasen-fakayin-bam ibakayin tunum kayi! yakan-kan-umbip. Lale, nuli ti tituun weng kaata-kup bakayila-tabasup. 9 Kemin, tunum malo ma kiita boko-lom: Nikil ili win dinim o, kebip. Yale, yang abip ma ma kiimi unang tunum yaapkan ita nuli itamsip. Kemin ale, nuli ti saak-nakin tap keluwa, God ata dong dokoyilala, taanin disa bom-bulup; malo ma imi aket fukunin kaata, nikil imi ban kaami kalan kaata, God ayo taba-lom angtiil yol kukaayinba no, kem-laabip. La, mafek mafek mafak uyo ma tildak numi angtiil diim aba yelu taanin disa bom-bulup. 10 Kanola nikil nuli aket uluum uyo kuluu-yaabup. Yale, nuli kuluu utam-kewa-bomdup, suunkup God ami fiyaap-kup duu-bamdup; tunum iwaan kebup. Katale, nuyo God ami mafek mafek tambal tambal kiili, unang tunum yaapkan imi kukaayin-bamduple; nuli tawaal diim kalawiimi mafek mafek iyo disa kebip. Katale, nuli God ami mafek mafek yaapkan kiili, fuku-bam kem-tabasup o.
11 Atin nulmi nak-tunum kusal Korin kasel kipyo! Nuli kipni aket-kup yesu. Kemin, aket fukunin nulmi aket tem kaldaku bombuu kaa, ibi kuwaayilalup disa kemin, ipni alik kaa bokoyup. 12 Kemin, nuli kipni aket kaa lukuuyinsa disa; kipni aket ayo ti suunkup fukun-umbup. Yale, kipta numi aket uyo kuyilalup disa yo, kala-lomdip titil-kup tabasip. 13 Kalaali aalap ata man imi weng tem bakayinba tap keliya, weng kala bokoyon o, kali kemin, weng san iliwa! Numi kukup kala, kipni kanuyila-yaabup tap, kipsiik numi aket uyo alik kuyinbip-kup maan tiiyin o, kala-somla ko.
Pol ali boko-lomda: Ibi God ami lak duulin disa imi kukup mafak kulii-tilip kuyaku-diyaku-kemin disa yo, kalsa kaami sang kaata ko
1Kor 3:16-17, 6:12-20
14 Yak tunum unang God ami lak duulin disa bom-bilip kiili, yakal alik tunum miit kusnum tap kemin, kibi iso tal-une-bam imi kukup nuubip kaa ipyo, dong dokoyip nuumin disa kemin, tituun-kup tabin kukup so, kukup mafak so, alep kiili, aptum kela una-tala-kemin disa. Kuno am daan-laamin so, kutamiip so, alep kii alep maakup aptum kela una-tala-ke kuyaku-diyaku-ke-lomdip alep tambal maakup ilokomip disa; 15 Kraist ali Setaan aso alep aket maakup kesip disa kemin, ili kanimin o, kalaliwa, tunum God ami lak duulin so, aa tunum God ami lak duulin disa iso, alep imi aket fukunin kaa maakup kaata-kup fukunokomip i? Disa te! 16 Nuli dok kano-lomdupla awem men uyo kulii-din God ami am awem kawu tiilupla, God aso aket maakup kelamup i? Disa. Kipkal utamsip taa! Kristen numi iipyak tem kaldak-ali tiin kawang miit kayaakim God almi am tituun alik kemin, kaami sang kaali, siin kawu God kaa boko-lomda:
Nali iso bomdila imi iipyak tem kabaku tiin-bomdila, nata imi God keyilile, ita nami unang tunum kep-nip ke-lokomip o,
kalsa. 17 Kanolin kemin, Dukum ayo weng maso ma boko-lomda kanum bokosa:
Kibi nami lak duulin disa bom-bilip kii, ipso tal-unemin disa; kii yakal kamboyila takas yang ipkal iltipni baan ma kawu bomdiwa kayi! Ibi kukup mafak kaami aket kaa fukunin disa kemip namti, kaata nali yim-buu-lomdile, 18 kawu nata kipni kaalap keyilile, kipta nalmi tunum man kep-na-som ale, nalmi unang man kep-na ke-lokomip o,
kala-lomda Tunum Dukum Titil Miit Kayaakim ata kanum bokosa ko.