1-2 Nafalop kupyo, God ami daang bakaalin unang uldaa-tam-buuse kupso, kupni man kaa Kristen unang tunum ke-silip iso, aptil kaa tiinsip o. Nali God ami unang tunum tiin molin dabom tunum nata, sukon kala aptil kipni dola kuyon o kali. Kemin, God ami tituun-kup tabin weng kaali, kuyak numi aket tem daa-yinsa kaali, suunkup laaba. Kemin, atin ti fan nami aket fanang kaali ti, kipni kuyasii. Kemin, kaa nata-kup daa; unang tunum kanta God ami tituun-kup tabin weng utamsip iso, alik imi aket fanang kaali, kipni kuuya kesip o.

3 Nili numi Aatumen God aso, ami man Yesus Kraist so, alim imi dik-dakaayin-bilila, alim ita alik numi kukup tambal kaata, disa masiim kawu kukaayin-bam, olen-kamayin-bam ale, yam-talal-bilipla, balili-kup kala-lomdup Kristen unang tunum imi aket dukum uyo kola-una-tala-kemin kaali, tifan tituun-kup kuyokomup o.

4 Siin sawaayak kawu, Aatumen God ali bokoya-lomda: Nami tituun-kup tabin weng kaa boko-lomdi kuka-daasi uyo, kutal-fukulin o yakase. Kemin, kulaata nali weng seli yi, Kupni man maakup maakup ili God ami tituun-kup tabin weng kaata, weng san-som ale, iyo kutal-fuku-som kebip o kala-somdiya, atin ti fiyaap dukum duu-bam tiinbi. 5 Nalmi unang kupyo, Nali aptil ibi weng ma bokoyon o kali kemin, weng san bom ilipla! Kipyo, alik numi aket aa, fanang saanin aa, kiili ti nak-tunum kusal imi kuya-una-tala-ke-bamduwa yo! kala-somya ko. Kemin, kaali kama kulu God ami weng kuka-daalaya, dola kulaayi din unu disa; kaali siin sawaayak God ami kanolin kukup kaata, kutal-fukulin o kalala, bokoyase ami weng kaa kutiiyinsa kaata-kup, dola-lomdi kulaali din unu kayi!

6 Kalawaali kanola God ami weng kuka-daasa uyo kanumup namti, kaata taba-lomdu kayak kayak ili kukuyuluya, numi God ami aket ayo kola-sulup uyo kabuu no, kalokomip. Kemin, nokol God ami weng kuka-daasa uyo kutal-fukulupla yo, kala-somla ko. Kemin, God ami weng kuka-daa-lomda: Ibi kaptum kusal, imi aket kola-una-tala-kemin kaata ti kutal-fuku kulii-taba bomdiwa yo, kalase kaali, kamasi kaptoowu bakayin-bilipya, ibi weng san yakyak talan-unbip o.

7 Tunum unang disa kulu ibakayin tunum kiili, yaapkan tiltam taba-lomdip unang tunum imi ibakayila-tal-unen-tabip. Kemin, ibi kii talalu itafii-bamdiwa yi! Ili unang tunum imi ibakayin-bamdip: Yesus Kraist ami tildaak tawaal diim talse kaali, tunum kese disa; ali sinik o kalalip kanum tal-unen-tabip. Kemin, kanubip tunum kiili, ibakayin tunum ale, Kraist ami waasi kamaalin tunum kayi! 8 Misii kipkal mep kanolin tunum kiimi weng kaayo, weng sanokomip kaali, Kraist ami weng so, kukup tambal so, iyo kela-lom, kipni fiit-bamdip ok fuku-bam God ami mafek mafek ma kuluulum o kebip uyo alik disa kelamip o. Kemin, talalu utafii-bamdiwa yi! Kraist ami weng kaali, talalu kutal-fukule, kulaali tal aba tam God ami mafek mafek tambal talalu kutiiyinsa uyo kuluulin o! kala-somya ko.

9 Unang tunum ili kanta Kraist ami weng kaa dukum-kup kutal-fukulin dinim kela-lomdip weng kusnum ma kaata kutal-fukulip namti, God ali iso ilokomip disale, aa unang tunum iyo kanta ma Kraist ami weng kaata ti kutal-fukulin-kup ilip namti, Aatumen God aso, almi man Yesus so, alim kiili alimal maakup ilokomip. 10 Kanola tunum ma kapni fanang tal-ilomda Kraist ami weng ayo kulii-talin disa ke-lomda disa almi weng kusnum ma kaali, ibakayin kiimi weng kaata, kulii-tala namti, kibi kaali weng fokola dibii tiltam kipni am kaa dakamin disa; 11 kemin ale, ibi kanolin tunum kaami weng fokonbip-kup ipyo dap-tam am daalokomip namti, kipni kanolip kaali, ami ok mafak kanuba kaata, dong dokolip kayi!

12 Nimi weng kala kipni bakayon o kalbi kaa katip daa; kaali dukum yale, nali sukon tem kuldaku-kup dola kuyokomi disa; nali din itamon o kebi kemin, nayo din kipni itamila kawu, nokol weng kaayo, baka-bamdup atin ti fiyaap duun-una-tala-ke-mokomup o.

13 Kemin, kipni unang God ami ulduuse umi man kiita, weng uyo umuuyip kemin, tambal-kup bom biliwa yi!