I Sunguwe sulat Pablowe dob Timoteowe
Ay niy sébaane bé de sénulat Pablowe, sani ménbantuge muret fantag bé Jesu Kristowe. Sénulatén dob ségétéwe lagéy féndawét Timoteo. I Timoteowe ni, been i dumo Pablowe amun ménagéw mangéy muret fantag bé Kristowe. Ténabanga Timoteowey Pablowe atin beeney maake nga Pablowe.
Sénulat Pablowey ni inok féingaté noy Timoteowe fantag bé de tugién do émbéréh énda kun fakay i mamae bé de dumo amaén. Wén soy de ségiyo tugién kétoro ro.
Dob ni sulat, ténoro Pablowey fantage bé fiyowe kéféngintulus, atin ténoroén soy fantage bé ati klasiy étéwe fatut waléy odoroy de munur.
1
1-2 Timoteo,
Sulata ku beem, sani maake nga gu sabaf bé kéunur me bé Kristowe. I begéne Pablo, sani ségétéwe apostol Jesu Kristowe non i Tuluse brab Jesu Kristowe sénugu ro begén muret fantag bé Kristowe, sani mémukase betom dob de sala tom. Atin i Jesuse, Beeney sarigo tome.
I Abaye Tulus brab Kadna tome Jesu Kristo mégédaw ro damén beem, brab méuray damén i na ruwe beem, atin iray ro damén beem i métanéke fédéw.
Fantag bé tugiéne kétoro
3 Féginauné ku beem loo bé rénigo guwe bé do gétah amun ténagak gu beem bé kéagéw guwe mangéy Masedonia. Kago tékédan dob Efeso, non wén i de étéw témoro diyo bé éndae toow. Mélaw méuyotu de ké géléé mo bero. 4 Béréhém bero bé békénén féganadé roy de kétutul brab de kélabit bé de médoo do katufuan funa ro démoyun séédél. I de ni do éntingayén énda fégésobuté ro betom i bantak i Tuluse non i tintuwe aguwon, been i kéunure bé Kristowe. 5 I funa kuwe sémugu bé ni inok ségédaw ro sabaf bé kétagak ruwe bé de sala ro brab sabaf bé fiyoy fédéw ruwe brab sabaf bé tintuwe fo kéunur ro. 6 Endob wén i de étéw diyo bénaleng roy de ni inok témantu ro séédél bé éndae lantékén. 7 Méuyot ro témoro bé kitabe tidéw dob Moisese. Endob fiyon i karowe kébéréh, énda gésobuto ro de taloo no de kétoro ro do fégésé ro dob de ségiyo étéw.
8 Endob i betowe, gétiga to fiyoy kitabe tidéw dob Moisese amuk fiyoy kéusare de. 9 Gétiga to, i kitabe békén rénigo inok kay de fiyo do étéw. Yamula rénigoy kitabe inok wén i gémélé bé de tete étéw, brab i de étéw do ménsala, brab de énda méngintulus, brab de étéw énda fégadata roy Tuluse, brab de méméléhu bé de lukés ro brab de méméléhu do étéw, 10 brab de étéw sétayan bé de békén do bawag ro, brab de bakla, brab de miyag, brab de témugi, brab de témbo bé éndae toow, brab de étéw félisé roy toowe kétoro. 11 Atin i ni toow kétoro, tidéw dob Fiyowe Uret i ménbantuge barakatan Tulus, sani Fiyowe Uret sénarig dob begéne inok légébé ku.
12 Fésalamatu fo dob Kadna tome Jesu Kristo, sani émfébagére begén inok gérigono kuy ni galbék. Fésalamatu dob Beene non kénarangén begén mésarigon funa no fénémilién begén inok waléyu sugu-sugué no. 13 Fénémilién begén fiyon fo ké bé do gétah ménbéréhu fo tete fantag bé Beene, brab fénrasay gu, brab fénéngiras gu. Endob i Tuluse toow fo ménuray i na nuwe begén non énda séna ménunuru, mélaw énda gétiga kuy fatute rigoné ku bé béno. 14 Atin i Kadna tome toow fo ménggédaw begén brab fénunurén begén brab ménggédaw begén non been i de niy rigoné nuwe dob de étéw do dumo Jesu Kristowe.
15 Wén i toowe kébéréh, fatut tayakuf gom brab unuro kom mano, “I Jesu Kristowe ménangéy dob duniyae ni inok fukasé noy de ménsala do étéw inok énda mékukum ro.” Atin begéney toowe fo tete bero kéluhanan. 16 Endob been i niy funay Tuluse ménuray i na nuwe begén, inok giton i kédakél i kétingkél Jesu Kristowe bé kégédaw ne begén sani toowe fo tete étéw. Mélaw i kéluhanay de étéw munur dob Beene moso, sani de gégédot bé umule magufusa, gétiga ro toow fo mégédaw i Kristowe. 17 I tintuwe Tulus, sani éndae giton, brab sani méguléwe bé kéluhanane, brab sani énda i féganayay kéuyag ne taloo no tamana no, médayéw damén brab basanan taman sa taman. Amen!
18 Timoteo, beemey maake nga gu, sugué ku beem béleewe, loo bé kébéréhe bénréh i sénarigoy Tuluse fantag bé beeme bé do gétah.
Odor go bé de ni do kébéréh inok gétabana moy de békén toow kétoro loo bé ségétéwe sundalo tabana noy dumo nuwe sébanil. 19 Féégétém i kéunur me brab odoro moy fatute. Non wén i do étéw énda rigoné roy gétiga ruwe fatut, funay kéunur ruwe mébinasa. 20 I de dumo bero, been i ro Himeneowe brab Alejandrowe. Endob ténagak gu bero brab kénukum gu bero bé kéiray guwe bero dob Satanase inok gétiga ro énda fakay ro émbéréh tete fantag bé Tuluse.