I Sulat Pablowe dob Filemone
Ay niy sébaane bé de sénulat Pablo, sani ménbantuge muret fantag bé Jesu Kristowe. I Filemone ni, wén i rifé no féndawét Onesimo. Endob ténulis Onesimowey kurta Filemone, atin ménraréy. Amun énggumah i Onesimowe dob ingéde Roma, énggébalaka noy Pablowe. Atin nuret Pablowey fantage bé Jesu Kristowe dob beene. Tidéw béno, énggésénule i Onesimowe bé de salaén atin ménwaléy munur bé Kristowe. Tidéw béno, ténabangén i Pablowe brab fénagifatén non diyo i Pablowe dob férisunone.
Dob kitab i de Romano, fatut féléhuén i Onesimowe non ségétéw rifén ménraréy. Mélaw sénulat Pablowey ni sulat dob Filemone, sani gefee bé Onesimowe inok ongoté no dob beene bé fésagadé noy Onesimowe. Tidéw béno, fénuwitén i ni sulat bé Onesimowe non séfule mangéy dob Filemon.
1
Filemon,
Begéney dumo muwe Pablo. Ay niwu dob férisunone sabaf bé kéunur guwe bé Jesu Kristowe. I begéne brab Timoteowe, sani dumo tome munur, sulata key beem. I beeme, gulaané key beem dumo gey gémalbék bé galbék i Tuluse. Atin sémulat gey so mangéy dob de munur sélimud méngadaf dob lawi me. Loo so dob Apiawe, sani maake libu key sabaf bé Kristowe, brab dob Arkipowe sani dumo geye maak sundalo gémalbék bé galbék i Tuluse.
I Abay tome Tulus brab Kadnane Jesu Kristo, mégédaw ro damén begom brab iray ro damén begom i métanéke fédéw.
 
Sénga démasalu, démoyunu fo fésalamat dob Tuluse sabaf bé beeme, Filemon. Non énggélingoo kuy fantage bé mégéte kéunurém bé Kadnane Jesus brab fantag bé kégédaw me bé kéluhanay de dumo mo munur. Atin démasalu so dob Tuluso bé waléy gétiga kom non bé késédumo tome sabaf bé kéunur tome bé Jesuse. Mélaw gésobuto kom i de kéfiyonon gédoté tom sabaf bé kéunur tome bé Kristowe. Atin i kégédaw me bé de dumo mo, been i niy funa kuwe toow fo moror brab fiyoy fédéw guwe. Atin moror soy kéluhanay de munur bé Kristowe sabaf bé beeme.
 
8-9 Mélaw, wén i ongoté kuwe dob beeme. Fakay gésuguo ku beem rémigo bé fatute non bé atura kuwe tidéw dob Kristowe. Non begén i Pablowe, ségétéw sarigo Jesu Kristowe, atin béleewe ni ménférisuwu sabaf bé Beene. Gido loo, ongoté ku saén dob beeme non toow fo gulaané ku beem. 10 Mélaw, ongoté ku dob beeme bé fésagadém i Onesimowe. Beeney maake nga gu sabaf bé kéunur ne bé Kristowe. Non amun diniwu dob férisunone ni, fénunur gu. 11 Bé do gétah, énda i tabang Onesimowe beem. Endob béleewe ni toow fo énggétabangén dob beeme, loo so dob begéne.
12 Atin béleewe ni féséfuleé ku mangéy dob beemey ni toow fo gulaané ku étéw. 13 Méuyotu de damén émfébati dob begéne bé lala guwe bati dob férisunone ni sabaf bé kéfélégéb guwe bé Fiyowe Uret. Non amuk bati dini, gétabanga no begén loo bé beeme amuk dini go damén. 14 Endob énda rigoné kuy ni amuk énda tungkasé mo de begén. Non énda méuyotu mémégés beem. Yamula méuyotu de ké tidéw fo dob kaame kétayan i kétabanga muwe begén.
15 I funa nuwe keyén énggéséfékay Onesimowe beem bé magade saén, inok amuk séfule mangéy dob beeme, éndaén géséféka gom tidéw béleewe ni. 16 Atin béleewe ni, i Onesimowe, békénén rifé mo saén. Yamula ménwaléyén maak dumo mo sétiman idéng sabaf bé kéunur ne bé Kristowe. Toow fo gulaané ku éndob toow na fo gulaané mo non békén saén rifé mo, yamula ménwaléyén maak dumo mo sétiman idéng sabaf bé Kadna tome.
17 Mélaw amuk fégitungé mo begén ségétéw dumo mo, tayakufém loo bé kétayakuf me damén begén. 18 Atin amuk réménigo tete dob beeme taloo no wén i utongén beem, dob begéne séden étukém. 19 Sulaté kuy ni bé de kagén kémér: I begéne, Pablo, bayada ku beem. (Endob kago lifotén de wén i utongém begén, sani mantuwe umulém sabaf bé kéunur me bé Kristowe.) 20 Mélaw adih, toow fo damén méuyotu de ké tabanga mo begén bé rigoné moy nan nongot gu. Féororénu non sédumon tom sabaf bé kéunur tome bé Kristowe.
21 Toow fo gétiga ku béleewe ni, rigoné moy kéluhanay ongoté kuwe beem dob sulat guwe ni, atin gétiga ku umana moy kérigo muwe bé éndae ongoté ku. 22 Atin wén nay ségiyo ongoté ku dob beeme. Tafayanu sibéy inok wén i batio ku ké mangéyu diyaan. Non wén i inam gu féséfuleéy Tuluse begén mangéy diyaan sabaf bé kédasala kome bé késéfule guwe mangéy diyoan.
 
23 Atin i Epafrase dumo gu ménférisu sabaf so bé kéunur ne bé Jesu Kristowe, ségifaé no beem. 24 Atin ségifaéy de dumo gu so gémalbék beem, ro Markos, Aristarko, Demas brab Lukas.
25 Mégédaw damén begom kéluhanan i Kadnane Jesu Kristo.
Pablo