Mattee yuşan hav'una yugna xabar
Gellesde insanaaşe, in I'sa Masixhne hək'eedın kitab otk'unna Matta vornava eyhe. Mana nalok'bı sa'ana ıxha. I'sa Masixhee mana Cukar qihna qort'ul, mang'uke Cune yits'ıq'vəne (12) telebayna sa hı'ı. İncilee ine kitabıle ğayrı, I'sayne ı'mrene hək'ee, Cune telebabışe otk'unin xhebılle kitabıd vodun.
Mattee in kitab oyk'anang'a, I'sayna yəq avquyn cühüt'yar yik'el avqu otk'un. Mang'vee cune kitabee ts'etta I'sayne nasılene hək'ee oyk'an. Məxüd mang'vee, Mana İbrıhım peyğambarna, Davud peyğambarna nasılena ıxhay hagva. Mattee, I'sa Allahee g'əyxı'na, g'attivxhan haa'asva g'axuvuna Paççah vorva oyk'an. Mang'vee, I'sayne qarıyne hək'ee gellesde peyğambaraaşed uvhuynvaniy eyhe.
I'see neniy uvhu, hiccovayiy uvhu, nen əlaamatbıyiy hagu Mattee mançine hək'eeyid geed otk'un. Mane kitabee geed 26 misaalabı vod I'see nəxübiy Allahna Q'aanun xəb qaa'avad, Allahne Paççahiyvaline hək'eeyid nəxüdiy yuşan ha'avad.
1
I'sayna nasıl
1 İbrıhımaaşina, Davudaaşina eyxhena I'sa Masixhna*Masixh: man cuvab «q'ış qadğuna» eyhen vodun. Avaala İzrailil məxdın ədat ıxha, kaahinaaşine, paççahaaşineyiy peyğambaraaşine vuk'lelqa q'ış qadağva ıxha. Man q'öd'esın I'sayn do Allahee Mana g'əyxı'nava eyhen vod. İzrailybışik'le peyğambaraaşe uvhuynbı ats'a ıxhal-alla, manbışe Masixh qarı cun millet duşmanaaşike g'attixhan hı'ı, dyunyeys xəbvalla hav'uy gozet ha'a ıxha. nasıl:
2 İbrıhımıke I'saq' g'arı.
I'saq'ıke Yaaq'ub g'arı.
Yaaq'ubukeb Yahudiy mang'un çocar g'abı.
3 Yahudukeb Tamaree vuxuyn Peresiy Zarax g'avayle.
Peresıker Xetsron g'arayle.
Xetsronuker Ram g'arayle.
4 Ramıker Amminadav g'arayle.
Amminadavıker Naxşon g'arayle.
Naxşonıker Salmon g'arayle.
5 Salmonıker Raxavee uxuna Boaz g'arayle.
Boazıker Rutee uxuna Oved g'arayle.
Ovedıker Yessey g'arayle.
6 Yesseyker paççah Davud g'arayle.
Davuduker Uriyeyne xhunaşşee uxuna Sıleyman g'arayle.
7 Sıleymanıke Rexavam g'arayle.
Rexavamıke Aviya g'arayle.
Aviyadıker Asaf g'arayle.
8 Asafıker Yehoşafat g'arayle.
Yehoşafatıke Yehoram g'arayle.
Yehoramıker Uzziya g'arayle.
9 Uzziyeker Yotam g'arayle.
Yotamıker Axaz g'arayle.
Axazıker Xizqiya g'arayle.
10 Xizqiyeker Menaşşe g'arayle.
Menaşşeyker Amos g'arayle.
Amosuker Yoşiya g'arayle.
11 İzrailin millet Baabil eyhene ölkeeqa g'e'eşşemee, Yoşiyayke Yekonyayiy mang'un çocar g'avayle.
12 Baabileençe qabıyle qiyğa, Yekonyayke Şealtiel g'arayle.
Şealtieliker Zorubbabil g'arayle.
13 Zorubbabiliker Avihud g'arayle.
Avihuduker Elyaqim g'arayle.
Elyaqimıker Azor g'arayle.
14 Azoruker Tsadok g'arayle.
Tsadokuker Axim g'arayle.
Aximiker Elihud g'arayle.
15 Elihuduker Eleazar g'arayle.
Eleazarıker Mattan g'arayle.
Mattanıker Yaaq'ub g'arayle.
16 Yaaq'ubuke Mayramna adamiy Yusuf g'arayle.
Mayrameeyir I'sa, insanaaşe Masixhva eyhena uxoxa.
17 Gırgıda İbrıhımılee Davudulqameen nasılbı qədəqqəxhee yits'ıyoq'ab (14) vooxhe, Davudulee Baabilqa g'e'epşesmeen nasılbıd qədəqqəxhee yits'ıyoq'ab vooxhe, Baabilqa g'eepşiyled Masixhılqameen nasılbı qədəqqəxheeyid yits'ıyoq'abcab nasıl vooxhe.
I'sa yedike ıxha
18 I'sa Masixhın yedike ıxhay inəxüd ıxha: mang'una yed Mayram Yusufne doyulyniy qey'ı. Manbışe davatbı ha'assecad, məng'ı'n vuxhne yixhay aq'valqa qığeç'e. Məng'ee uxasın Uşax Muq'addasne Rı'hı'ke eyxhe. 19 Yusuf qorkuna insan eyxhe, Mayram insanaaşine k'ane tesser hidee'esva, mang'us mana dyugulenra galerç'es yikkiykan.
20 Mang'vee man kar ək'leeqa k'eççumee, mang'us nik'ek Rəbbin malaaik dyagu eyhen:
– Davudaaşda dix Yusuf! Mayram hee'es qıməyq'ən, məng'ı'ne vuxhnedın Uşax Muq'addasne Rı'hı'ken vodun. 21 Mayramee Dix uxas, ğu Mang'un do I'sa (Rəbbee g'attixhan ha'a) gixhxhe, Mang'vee Cun millet manbışde bınahbışike g'attixhan ha'as.
22 İn gırgın kar, Rəbbine mizele yuşan ha'ane peyğambaree otk'unin xhinne eyxhe:
23 «Haane, içiy vuxhne ayxu sa Dix uxas,
Doyud İmmanuel gixhxhes»†İnəxüd Yeşaya peyğambarne kitabee otk'un (7:14). .
(İmmanuel «Allah şaka vornava» eyhen vodun.)
24 Yusuf muğur qıxhamee, mang'vee Rəbbine malaaikee uvhuyn xhinne ha'a: Mayramıke cus xhunaşşe hee'e. 25 Mayramee Dix uxasmee, Yusuf məng'ı'ka g'ılexha deş. Məng'ee uxuyne Uşaxın doyud, Yusufee I'sa giyxhe.
*1:1 Masixh: man cuvab «q'ış qadğuna» eyhen vodun. Avaala İzrailil məxdın ədat ıxha, kaahinaaşine, paççahaaşineyiy peyğambaraaşine vuk'lelqa q'ış qadağva ıxha. Man q'öd'esın I'sayn do Allahee Mana g'əyxı'nava eyhen vod. İzrailybışik'le peyğambaraaşe uvhuynbı ats'a ıxhal-alla, manbışe Masixh qarı cun millet duşmanaaşike g'attixhan hı'ı, dyunyeys xəbvalla hav'uy gozet ha'a ıxha.
†1:23 İnəxüd Yeşaya peyğambarne kitabee otk'un (7:14).