4
Fol imi bogo-nala, “Kristen unang tinum nuyo Yesus Krais imi dam umdii kalbup o,” agesa uta ko
(Rom 12:4-21, 1 Kor 12:12-20, Fpai 2:1-5, Kol 2:19)
1 Kale niyo Bisel God imi ogok waafulin tinum utamta, bomi kalan uta sok de namolipta, nuubi kale, God iyo ipkil mungkup bogobela mitam ilami man ke-silip kale, ipmi tonamip tiinemip uyo, ibo te tam God imi kuguup tambal, “Bota kanumin o,” agesa uyo tiilu kupkalin o age-nilita, weng koyo fomtuup baga-e-bii ko. 2 Kale ibo ipkumal kek kek imi afak tem iinom win binim ke-bom bet bubul uta kupka-e-bom-nilipta o ageta kale, ipkum iyo maak God imi kuguup, “Kanumin o,” agesa uyo no tiyuuk ilalin-tem umdii, atafimin ba kale, imi aget uyo kupka-e-bom bilili age-bom dong daga-e-bilip te tam yagal tiyuuk ila no kelata o ageta ko. 3 Kale God imi Sinik iyo tebe dong dogobe angge sok de imolin tap kela duup kiina tala ke aget maagup ke-silip kale, boyo fomtuup waafu-bom-bilipta o ageta ko.
4 Numi kwego dego ke-sulup uyo dam maagup ulutap kale minte, God imi Sinik ipmi diim alba beyo maagup ita kup kale, God imi ipmi bogobela mitam ilami man ke-silip kota, weng maak bogobe bogobe ke, “Ibo imdep tal nalami abiip daalita, ipsino nisino kagal nan-temup o,” agela fen tebesip boyo weng migik migik ba kale, weng maagup uta kup kale, 5 aa mungkup yagalami kamok kamok ba kale, ipmi Kamogim iyo maagup ita kup no kale, minte ipmi Krais imi ilak dola dola kesip uyo maagup, minte imi win tolop diim ok sam ugan tebesip uyo maagup, 6 minte numi God iyo maagup no kale, beyo alugum numi Aalap kale, beyo alugum nuyo tiin mo-bom-nala e minte, alugum numi tiin diim kugol ogok ke-bom-nala e minte, alugum numi iibak tem uyo bom no kem tebesa ko.
7 Kale minte Krais iyo kuguup tambal tambal uyo maagup maagup nuyo kafalebelata, imi titil diim ku-tele kanum-nuubup kale, boyo ilami san kale, yagal mufekmufek uyo misiim kobe kobe ke-se kale, 8 ulutap kale, God imi suuk kon tem uyo Krais imi sang bogo-nulu e,
“Siin bemi unanbu tam iin-se uyo, beyo waasi sok de imolin kwiin tagang iyo kulep tam-nala e minte, unang so tinum so iyo mufekmufek uyo misiim kobe no ke-se o,”
agesu kale, 9 weng ko bogo-nulu, “Tam iin-se o,” agesu boyo dok uta ba kale, Krais imi tam abiil tigiin iin-se uta kup ba kale, kamaki uyo talanbu malaak kafin diim o-nalata, tam iin-se kale, 10 ise tinum ko kamaki malaak ti-se beyo yagal asok tam iin-se kale, beyo atin tam abiil tigiin tam-nalata, abiip so sep so abiil tigiin so uyo alugum bugu ton-bom-nilita o age-nalata, tam iin-se ko.
11 Kale Krais imi mufekmufek misiim kupka-em tebesa uyo kulbu kale, tam tinum iip maak iyo nimi kalaan tinum o age ulu-nala e, milii iyo God imi weng kem baga-emin tinum o age ulu-nala e minte, atuk iyo God imi weng tambal kupka-em yak abiip maak maak kem tiinemin tinum o age ulu-nala e minte, iip maak iyo Kristen imi tiin mo-bom dong daga-e-bom God imi weng kafalemin tinum o age ulu no ke-nalata, ilami aget fugunin tambal uyo kopmata, ogok uyo tambaliim kem tebesip ko. 12 Kale kanube Krais imi mufekmufek kupka-em tebesa boyo, iyo God imi unang tinum nuyo dong dogobe, kafale-bili igil te yak nimi ogok boyo tii waafulan-temip kalaa age kanubelipta, nimi unang tinum ko age nimi dam uyo mitam senganan-temu kalaa age-nalata, kupka-em tebesa kale, 13 kanum abe-balata, unanbu top alugum nuyo mitam aget maagup kelupta, numi God imi Man imi ilak dugamin min, atamamin min uyo maagup kelan-temu kale, kanum abe-buluta, numi God imi ilak dugamin uyo sengan-nuluta, unanbu top man tinum imi te tam fito ko biselaba ulutap keluta, te tamta Krais ilatap kelan-temup ko.
14 Kale kanumup umdii, nuyo suun kup man kangkang ilitap nan-temaalup e minte, alugum uget tagamin tinum bilip imi bisop bagamin weng uyo baga-e-bilipta, nuyo man kuguup kanubelin tap ke, boyo aafen ko age kupkaa yang iinon-temaalup no kale, imi bisop weng bagamin uyo yol ok daang kun umi aliin iit o daak o ke-bom-nulu bot kwaalu unbu talbu kem-nuubu ulutap e minte, dulul tebe at kon kwaalu tam tam unan-nuubu ulutap no kale, nuyo bisop weng bo tinangkamin ba kale, 15 God imi tuluun weng uta kup tinangku waafu-bom-nulup e minte, unang tinum kek kek imi aget kup ugaa kwaa-bom no ke-nulupta, mitam fen tinum ke-nulup e minte, numi dubom Krais imi diim kal feba no kelum o ageta ko. 16 Kale numi dubom beyo tiin mo-bom-balata, ilami yaan, sagaal, tiin nuyo ilami mufekmufek, “Kanupmin bota kanumin o,” age-nala maagup maagup numi baga-e-be uyo tambaliim kanum-nuubup kale, tinum imi mamel uyo tulu tulu ke dam uyo alugum de koluta, atin dam maagup kesu ulutap kale, dam umi atuk nuyo dong dogobina tala ke-bomta alugum maagup kem-nuubup kale, kanube aget kobina tala kem-nuubup uyo dam nuyo mitam titil fagaa senganan-nuubup ko.
“Kristen numi siin kuguup uyo kupkaa kamaa kuguup uta kup waafuu bom-bulupta o,” agan-kalin umi sang uta ko
(Rom 12:9-21, Ef 5:1-20, Kol 3:5-17, 1 Tes 4:1-12, 1 Fit 4:1-6)
17 Kale niyo weng kem umaak Bisel imi win tolop diim fomtuup bogobelan o ageta kale, ibo Aatum God imi ilak dolin binim unang tinum imi kuguup uyo ibo maak so kanumin ba o ageta ko. Bilip imi aget fugunin uyo tambal binim kale, bisop aget uta kup fugun-nuubip kale, 18 bilip iyo utamsaalip e minte, imi utamamin uyo bisop magam binim e minte, bilip iyo ilum ilum bii tonsip no utamta, mitam God imi suun nin unang tinum kelin-tem yang kugol albip kale, 19 bilip iyo fitom umaak tebe-emsaalu binim kale, atin kuguup mafak mafak umi aget uta ugel kala-nilipta, daal binim suun kup kanumin kup tebesip ko.
20 Bilip imi kanupmin kuguup mafak boyo Krais imi kuguup ipmi kafalebe-sulup uyo kulbaalu kuba. 21 Krais imi sang uyo bogobelup ibo tinangku-nilipta, mitam imi unang tinum ke-nilip e minte, Yesus imi tuluun weng tambal uyo kafalebelup tinangku no ke-silip kale, aafen ko. 22 Kale siin uyo ipmi intap intap mok unan-bii-silip uyo, ibo kuguup tambal ko ageta no kuguup mafak boyo kanu-bomta ilipmi kaal uyo kufak dagan-bii-silip kuta, ipmi kanupmin siin aget fugunin boyo kwaalip kot iinu kupka-nilipta, 23 ipmi sinik so aget fugunin so uyo kwaalip yak God imi diim abeluta, yagal telela kobelata, uyo atin kamaa keluta, 24 kamaa aget fugunin uyo kulin o ageta kale, kamaa aget fugunin boyo God yagal, nimi aget fugunin ulutap kelin o age kobelata, ibo kanupmin aget fugun-bom kanu-bilipta, kek kek iyo itamipta e, bilip iyo tol kup tebesip e minte, atin tambal no kalaa agelan-temip ko.
25 Kale alugum ibo bisop bagamin kuguup uyo kupka-nilipta, kanumin kanumin sang uyo tuluun uta kup ipkumal Kristen kek kek iyo baga-e-bom-nilipta o ageta kale, alugum nuyo dam maagup umi atuk atuk ke-bom albup kale, tuluun weng uta kup baga-bom-nulupta o ageta ko. 26 Ibo kanube olsak kup dine-emu umdii, fenga kolan-temip kale, tele utama-bom-nilipta o. Olsak uyo waafu-bom-balap ataan uyo tem iinemin ba kale, yuut kupkan kelal o ageta ko. 27 Olsak uyo waafulin kup nan-temip bole, ipmi aget tem uyo sinik mafak imi kamok imi faal umdii bitopman-temip ko. 28 Yuguut unin tinum iyo maak so yuguut unan-kalin ba kale, kamano koyo ogok tambal ke-bom-nalata, ilami titil diim kugol iman min, mani uyo kwaa-bom-nalata, utamata e, ipkum iyo mufekmufek uyo duumatanba kalaa agela umdii, dong daga-e-bom bon-tema ko. 29 Kale ibo weng mafak uyo bagamin ba kale, weng tambal tambal uta kup baga-bom-nilipta, unang tinum titii binim iyo kuntuk mobe-nilip e minte, unang tinum tinangkan-bilip iyo dong dogobe no ke-bilipta, ito God imi deng uyo tebeman-temip ko. 30 Kale ibo ipkumal iyo weng mafak uyo kupka-e-bom God imi Sinik Tambal iyo aget iluum uyo kupka-emin ba ko. Kale God imi Sinik Tambal ko ipmi diim alba beyo God tebe ipmi faal fagak kobe-se ulutap kale, ibo bo utamipta, nuyo aafen God imi unang tinum iyo kalbup kalaa age, son-temu uyo, God iyo sok talaa imdalata, nuyo iluum binim kelan-temup kalaa agelin o ageta ko. 31 Kale ipmi iluuk iluuk ke-bom
aget mafak fugunin so,
aget atul tebemin so,
olsak tebemin so,
alaang weng bagamin so,
weng miil tebemin so,
ipkumal itafinonin so uyo alugum kwaalip kot iinu kupka-nilipta, 32 inal o agan-bom tambaliim kup telelebina tala ke-bom-nilipta o ageta kale, God tebe Krais imi win tolop diim ipmi fengmin kupkabe-se ulutap ke ipkumal tebe ipmi mufekmufek uyo fenga kolip uyo ipkil mungkup kupkabina tala ke-bom-nilipta o ageta ko.