Bbaluwa yʼoku̱du̱bha eghi Paulo aahandiikiiye
Batesolonika
Kwanjula
Mukwenda Paulo niiye akatandi̱ki̱i̱si̱ya ki̱bbu̱la kya bahi̱ki̱li̱ja mu Tesolonika, kibugha kikulu kya Makedoni̱ya (Bikoluwa 17), elughulu mu Bu̱gi̱li̱ki̱. Bhaatu aalu̱ghayo bwangu obu bamui mu Bayu̱daaya baatandi̱ki̱ye ku̱mu̱lu̱mba. Haanu̱ma Ti̱mi̱seewa oghu aamukoonelagha aasa, aamuha makulu ati Baki̱li̱si̱taayo baa Tesolonika baneesighiiye kimui Luhanga nankabha bantu mbababon-boni̱ya. Nahabweki Paulo aabahandiikila bbaluwa eni kubeekambi̱i̱si̱ya kandi kukuukamu bi̱bu̱u̱li̱yo byabo.
Mu bbaluwa eni Paulo aasi̱i̱ma Luhanga haabwa ku̱hi̱ki̱li̱ja na kukunda Baki̱li̱si̱taayo baa Tesolonika bali nakuwo, kandi aabaasu̱ki̱ya mulingo aabaakaayemu nga Mu̱ki̱li̱si̱taayo atali na kyakumusoghosʼo kyona. Aabasoboolola ekikubaaghʼo Baki̱li̱si̱taayo bakaaku̱ku̱wagha, kandi ekilibʼo obu Yesu Ki̱li̱si̱to alikuuka munsi muni. Aamaliilila naabalaghikiilila ngoku babhonganuuwe kwetwalikani̱ya ku̱hi̱ki̱ya Ki̱li̱si̱to aku̱u̱ki̱ye.
1
Paulo naasi̱i̱ma bahi̱ki̱li̱ja baa Tesolonika
1 Si̱ye Paulo ndi hamui na Ti̱mi̱seewa na Silaasi. Ndimahandiikila enu̱we ki̱bbu̱la kya bahi̱ki̱li̱ja abali mu tau̱ni̱ ya Tesolonika, abali mu Luhanga Eseetu̱we na Mukama Yesu Ki̱li̱si̱to. Luhanga abaghilile ngughuma kandi abahe mpempa yonkaha. 2 Tukubasabilagha enu̱we boona kandi tu̱si̱i̱ma Luhanga haabwanu. 3 Tukaakubaagha ntusaba Luhanga Eseetu̱we, tukubasabilagha haabwa ebi mukukolagha nanga ku̱hi̱ki̱li̱ja oku muli nakuwo. Tukubasabilagha dhee haabwa kukundangana oku muli nakuwo kandi na ku̱gu̱mi̱si̱li̱ja kwanu haabwa kunihila ngu Mukama waatu Yesu Ki̱li̱si̱to alikuuka.
4 Bahi̱ki̱li̱ja baanakyatu, tumani̱ye ngoku Luhanga aabakomi̱ye kuba mu bantu be, kandi ngoku abaku̱ndi̱ye. 5 Nanga Makulu Ghasemeeye ghaa Luhanga agha twabatebi̱i̱je, tabyabaagha bighambo bya bantu kwonkaha bbaa. Mwoyo Ahi̱ki̱li̱i̱ye niiye aatuhaagha maani̱ ghaa kubatebeja, kandi tumani̱ye ngoku ebi twabaghambiiye ghali majima. Mumani̱ye ngoku ebi twakolagha obu twabaagha naanu byabaagha byakubaghasila kuukala munahi̱ki̱li̱i̱je Mukama waatu Yesu.
6 Naanu mwafooki̱ye ngʼatu hamui na Mukama Yesu Ki̱li̱si̱to, nanga obu mwamu̱hi̱ki̱li̱i̱je, mwabona-bona mu milingo ekani̱ye ngoku naatu twaboona-boone, bhaatu mu ebi byona Mwoyo Ahi̱ki̱li̱i̱ye aakala naanabaha kudheedhuwa. 7 Kandi ebi mukwete kukola byaleki̱ye mwaba kyakulolelʼo kya bahi̱ki̱li̱ja baa Yesu boona baa mu kyalo kya Makedoni̱ya na Akaaya. 8 Nahabweki tatukwetaaghisibuwa kughambila bantu ngoku mu̱hi̱ki̱li̱i̱je Luhanga. Nanga mwaleki̱ye bantu baamanya kighambo kya Mukama, etali mu Makedoni̱ya na Akaaya honkaha, bhaatu na mu bi̱i̱kalo byona. 9 Nanga obu twasi̱ye kubunga eghi, mulingo oghu mwatwebali̱i̱yemu ghukaleka bantu bakani̱ye baatandika kughambila baanakyabo ngoku majima mwaku̱u̱ki̱ye ewaa Luhanga, mwaleka kulami̱ya bihongano, mwatandika ku̱heeleli̱ya Luhanga mwomi̱i̱li̱ kandi wamajima. 10 Kandi mulindiliiye Mwana wee kukuuka ku̱lu̱gha mu eghulu, oghu aahu̱mbu̱u̱ye mu baku̱u̱ye, Yesu oghu akutujuna ki̱i̱ni̱gha kya Luhanga ekikwisa.