1 Nahabweki, tatukuhuwa maani̱ kukola mulimo ghwa kutebeja bbaa, nanga Luhanga mu ngughuma siye niiye akatutuma kughukola. 2 Ti̱, tukubhengagha kukola bikoluwa ebikuhemulagha, ebi bantu bakukolagha ki̱bi̱so; tatukuhaagha bisubha kandi tatukuhindulagha kighambo kya Luhanga. Bhaatu tu̱ku̱bu̱ghagha majima ghoonini niikuwo bu̱li̱ muntu weena eetegheeleli̱ye, kandi Luhanga niiye amani̱ye ngoku tu̱ku̱bu̱ghagha majima ghoonini. 3 Nankabha bantu banji mbakughilagha bati tabakwetegheeleli̱yagha bhyani Makulu Ghasemeeye agha tu̱kwegheesi̱yagha, abataaku̱gheetegheeleli̱yagha ni abakughenda kuhwelekeelela. 4 Si̱taani̱ oghu alemi̱ye nsi eni, niiye atangi̱ye byeli̱li̱kano bya abatali bahi̱ki̱li̱ja, niikuwo batabona kyeleeli̱ ekili mu Makulu Ghasemeeye haa Ki̱li̱si̱to waatu oghu ali na ki̱ti̱i̱ni̱sa kandi oghu atwoleki̱ye ngoku Luhanga ali. 5 Tatukwetebejaghʼo bbaa, tukutebejaghʼo Yesu Ki̱li̱si̱to nga Mukama. Eki tu̱kwebu̱ghaghʼo ni ngu etu̱we tuli baheeleli̱ya baanu haabwa eki Ki̱li̱si̱to aatukoleeye. 6 Nanga Luhanga oghu akaghila ati, “Oleke kyeleeli̱ kibʼo hambali mweli̱ma ghwabaagha,”*4:6 Kubanja 1:3 niiye akatuha butumuwa buwe kuba nga kyeleeli̱ mu mitima yaatu kuleka ntwetegheeleli̱ya ki̱ti̱i̱ni̱sa kiye ekyolekeeu̱we mu Yesu Ki̱li̱si̱to.

7 Butumuwa obu ni Makulu Ghasemeeye ghaa mughaso munu, agha Luhanga aahaaye etu̱we bakwenda, abali baceke nga minagha yʼebumba, kwoleka ngu bu̱toki̱ bwamaani̱ bwatu kutebeja butumuwa obu bu̱lu̱ghi̱ye ewaa Luhanga etali mu etu̱we. 8 Tukubaagha na bijibu bwile bwona, bhaatu takikulekagha tuhuwa maani̱, bunji nʼobunji tatukumanyagha kyakukola, bhaatu tatukuhuwagha maani̱ bbaa. 9 Bantu bakutubona-boni̱yagha etu̱we bakwenda, bhaatu Luhanga taakutulekagha etu̱we bonkaha, ngi̱ghu̱ syatu syatu̱hu̱taali̱yagha bhaatu Luhanga ataabasi̱i̱mi̱lani̱ya kutwita. 10 Tu̱kwehi̱ghu̱wagha bwile bwona tuti bantu bakutwita ngoku baati̱ye Yesu, niikuwo haabwatu bantu banji bagubhe kubona ngoku Ki̱li̱si̱to ali mwomi̱i̱li̱. 11 Tukuukalagha tuli mu kabhi kaa ku̱ku̱wa haabwa ku̱heeleli̱ya Ki̱li̱si̱to, niikuwo bantu bagubhe kumanya ngoku Yesu ali mwomi̱i̱li̱ mu mibili yaatu eghi bwile bwona eku̱ku̱wa. 12 Nahabweki, nankabha etu̱we tuli mu kabhi kaa ku̱ku̱wa, kini ki̱ku̱lu̱ghi̱lamu̱ enu̱we bwomi̱i̱li̱ butahuwʼo.

13 Haliyo hambali kihandi̱i̱ku̱u̱we mu Jabbu̱li̱ ngu, muntu aaghila ati, “Ni̱hi̱ki̱li̱i̱je Luhanga kandi nku̱bu̱gha eki̱leki̱ye ni̱mu̱hi̱ki̱li̱i̱je.”*4:13 Jabbu̱li̱ 116:10 Naatu niikuwo tukukolagha nga muntu oghu. Tu̱hi̱ki̱li̱i̱je Luhanga tukughambilagha bantu eki̱leki̱ye tu̱mu̱hi̱ki̱li̱i̱je. 14 Tumani̱ye ngu ngoku Luhanga aahu̱mbu̱u̱ye Mukama waatu Yesu mu baku̱u̱ye, naatu haabwa kuba mu bumui na Yesu ali̱tu̱hu̱mbu̱u̱la, niikuwo etu̱we boona atuleete hamui hambali ali. 15 Tukubona-bonagha tutiyo haabwanu, niikuwo ngughuma sya Luhanga esikwete ku̱hi̱kʼo bantu bakani̱ye, sibaleeteleje ku̱si̱i̱ma Luhanga kandi bamu̱hu̱ti̱ye kwonini.

16 Nahabweki tatukuhuwagha maani̱ bbaa, nankabha mibili yaatu eni eba eli ya ku̱ku̱wa, Luhanga aku̱gu̱mi̱yagha myoyo yaatu bu̱li̱ kilo. 17 Kubona-bona kwatu endindi ni kantu kati̱i̱ munu kandi takukumalʼo bwile bukani̱ye, bhaatu ku̱ku̱tu̱lu̱ghi̱lamu ki̱ti̱i̱ni̱sa kyamaani̱ kya bilo nʼebilo. 18 Nahabweki tukaakulolagha haa kubona-bona tukwete kubona-bona endindi; tukulolagha mu maaso hʼeki tutaboone endindi. Kubona-bona tuli nakuwo endindi kukuhuwʼo, bhaatu kudheedhuwa tukuba nakuwo nkwa bilo nʼebilo.