Bikoluwa
bya Bakwenda baa Yesu
Kwanjula
Oghu akahandiika kitabo kini ni Luka, oghu akahandiika dhee Makulu Ghasemeeye ghaa Luka. Mu kitabo kini abu̱ghi̱yʼo ngoku haanu̱ma ya Yesu kughenda mu eghulu, ngoku beeghesebuwa be baaghambiiye bantu Makulu Ghasemeeye aghamukwetʼo. Baadu̱bhi̱la haa Bayu̱daaya mu kyalo kyabo kyonini kandi du̱mbi̱ mu bantu banji mu byalo binji. Luka abu̱ghi̱yʼo ngoku Mwoyo Ahi̱ki̱li̱i̱ye aasi̱yʼo beeghesebuwa baa Yesu boona kandi eeyongela kubalinda kandi kubaha maani̱ kandi na beebembeli̱ baabo.
Mu nsuula 1—12 Luka aki̱li̱ye munu ku̱bu̱ghʼo mukwenda Peetelo kandi na ebyabaayʼo Baki̱li̱si̱taayo na bakwenda aba mu Yelusaalemu. Mwoyo Ahi̱ki̱li̱i̱ye aabakoonelagha kwetegheeleli̱ya ngu Luhanga aabbalagha Makulu Ghasemeeye haa Yesu ghatebejebuwe mu bantu baa mahanga ghoona, etali Bayu̱daaya bonkaha.
Mu nsuula 13—28 Luka ooleki̱ye ngoku Mwoyo Ahi̱ki̱li̱i̱ye aakooneeye mukwenda Paulo kutwala Makulu Ghasemeeye ghani mu bi̱i̱kalo bikani̱ye. Bakaba na kutwala Makulu agha mu Asi̱ya, Bulaaya, kandi haakumaliilila mu kibugha kya Looma. Mu kitabo kini Luka ahandi̱i̱ki̱yemu bu̱tebeji̱ bukani̱ye obu Paulo hamui na bakwenda banji baatebi̱i̱je. Kini kikutukoonelagha kubona ngoku baatebi̱i̱je Makulu Ghasemeeye ghaa Yesu mu bantu baa mbaghani̱ja na milingo ya mbaghani̱ja.
1
Kighendeleluwa kya kuhandiika
1 Wai̱ Ti̱yofi̱lo, mu kitabo naadu̱bhi̱ye kukuhandiikila,*1:1 Kitabo eki ni Luka. nkakughambila byona ebi Yesu aakoli̱ye nʼebi eegheeseei̱ye, ku̱lu̱ghi̱i̱li̱la hambali aatandikiiye, 2 ku̱hi̱ki̱ya kilo eki aani̱i̱ni̱ye mu eghulu, haanu̱ma ya kulaghila bakwenda be aakomi̱ye ebi bakukola, haabwa maani̱ ghaa Mwoyo Ahi̱ki̱li̱i̱ye. 3 Ku̱lu̱ghi̱i̱li̱la obu Yesu aaboona-boone, naaku̱wa, aamala bilo maku̱mi̱ anaa naanaboneka mu bakwenda be aba bwile bwona. Aabonekagha mu milingo ekani̱ye, niikuwo bamanile kimui ngoku aahu̱mbu̱u̱ki̱ye. Aabasoboololagha haa bu̱lemi̱ bwa Luhanga. 4 Obu aanabaagha nabo, aabaghila ati, “Mutalu̱gha mu kibugha kya Yelusaalemu. Mulinde eki naabaghambiiyʼo, eki Tita aabalaghiisani̱i̱ye. 5 Yohaana Mubati̱ji̱ aabati̱jagha na maasi, bhaatu mu bilo bikee mukubati̱i̱ji̱buwa na Mwoyo Ahi̱ki̱li̱i̱ye.”
Yesu naani̱i̱na mu eghulu
(Maliko 16:19-20; Luka 24:50-53)
6 Obu bakwenda aba baatodhi̱ye kusanga-sangaana na Yesu, baamu̱bu̱u̱li̱ya bati, “Mukama, buni niibuwo bwile waasi̱ye ku̱ku̱u̱ki̱li̱ya Banai̱saaleeli̱ bu̱lemi̱?” 7 Aabaghila ati, “Eki takili kyanu kumanya bwile obu Tita aataayʼo haabwa bu̱toki̱ buwe. 8 Bhaatu mukutunga maani̱ Mwoyo Ahi̱ki̱li̱i̱ye naabaasi̱yʼo, tooli̱ mukuba baakai̱so banje mu Yelusaalemu, Bu̱yu̱daaya, Samali̱ya, na bi̱i̱kalo byona byʼomunsi yoona.”
9 Haanu̱ma ya ku̱bu̱gha ebi, aani̱i̱na mu eghulu banamu̱loli̱ye, kicu kyamu̱swi̱ki̱la baaleka kumubona. 10 Obu baabaagha banaloleleeye kimui eghulu ngoku akwete kughenda, beetu̱lakaka basaasa babili babeemiliiye haakpengbu̱ nga haala, balu̱wete nkanji̱ sijelu dhiyo. 11 Baabu̱u̱li̱ya bati, “Enu̱we Banagalilaaya, munaloli̱ye eghulu nangaaki? Yesu oghu mwaboone naani̱i̱na mu eghulu, alikuuka ngoku mwamuboone naaghenda.”
Mati̱ya naakuuka mu ki̱i̱kalo kya Yu̱da Esikalyota
12 Bakwenda aba baalu̱gha haa mwena Oli̱va, baakuuka Yelusaalemu. Mwena oghu ghulabhaane na Yelusaalemu, haai nga ki̱lomi̱ta emui. 13 Obu baaki̱dhi̱ye mu kibugha kya Yelusaalemu, baaghenda mu kisiika kya kai̱na yaakabili, hambali baabaagha baghooneeye. Bakwenda aba ni: Peetelo, Yohaana, Yakobbo, Andeleya, Fi̱li̱po, Tomasi, Batu̱lu̱maayo, Matayo, Yakobbo mutabani̱ wa Alifaayo, Si̱mooni̱ oghu aalwanililagha ehanga liye, na Yu̱da mutabani̱ wa Yakobbo. 14 Bakwenda aba hamui na Mali̱ya ni̱na Yesu, baana baani̱na Yesu,†1:14 Bbai̱bbu̱li̱ sinji sighambi̱ye baghenji̱ baa Yesu. na bakali̱ banji, baagumbaanagha hamui bwile bwona kusaba.
15 Bwile obu ki̱bbu̱la kya bahi̱ki̱li̱ja haai nga ki̱ku̱mi̱ nʼabili baagumbaana. Peetelo aamilila kubabu̱ghi̱la naaghila ati, 16 “Baana baamaaha, ebi Ebyahandi̱i̱ku̱u̱we bi̱bu̱ghi̱ye byabaaye kuwo. Ebi Mwoyo Ahi̱ki̱li̱i̱ye aabu̱ghi̱ye kukwama mu Dhau̱dhi̱ ku̱bu̱ghʼo Yu̱da oghu akaleeta abaasi̱ye kukwata Yesu. 17 Yu̱da oghu naye akaba atulimu, kandi akomeeu̱we kukola naatu mulimo ghuni.”
18 (Sente esi aatu̱ngi̱ye haabwa kibhi kiye, aaghulamu musili hambali eeni̱ghi̱i̱ye. Aakasuuka, eegenga, aahu̱u̱li̱ka mala ghaamugbunduuka. 19 Bantu bʼomu Yelusaalemu boona baaghu̱wa makulu agha. Mu Lulamai̱ki̱ musili oghu bakughughilaghamu Hakaladama, kikumani̱i̱si̱ya Musili ghwa Saghama.)
20 Peetelo aatodha aaghila ati, “Kihandi̱i̱ku̱u̱we mu kitabo kya Jabbu̱li̱ ngu,
“ ‘Oleke numba yee ebe ki̱hu̱ma,
tooli̱ muntu atalitodha kughiikalamu.’*1:20 Jabbu̱li̱ 69:25
Mu ki̱twi̱ke kinji kyaghila kiti,
“ ‘Muntu onji atwale mulimo ghuwe.’*1:20 Jabbu̱li̱ 109:8
21 Nahabweki, tukwetaaghisibuwa kukoma muntu oghu aaghendagha naatu bwile bwona obu Mukama Yesu aamali̱ye naatu. 22 Abhonganuuwe kuba oghu akatandika obu Yohaana Mubati̱ji̱ aabati̱i̱je Yesu, ku̱hi̱ki̱ya obu aani̱i̱ni̱ye mu eghulu. Niikuwo naye abe kai̱so hamui naatu kughambila bantu haa ku̱hu̱mbu̱u̱ka kwa Yesu.”
23 Du̱mbi̱ baahaayo mali̱i̱na ghaa bantu babili: Mati̱ya na Balasaba Yojeefu̱, oghu bantu banji baaghilaghamu Yu̱si̱to. 24 Niibuwo baasabi̱ye bati, “Mukama omani̱ye mitima ya bantu boona. Mu bantu babili bani otwolekemu oghu waakomi̱yemu, 25 ku̱heeleli̱ya kandi kuba mukwenda mu ki̱i̱kalo kya Yu̱da, oghu akatu̱lu̱ghʼo aatunga ekyali kimusemeleeye.” 26 Du̱mbi̱ baakoma buluulu, kumanya oghu Luhanga aakomi̱yemu. Mati̱ya aakomuwa, aaba mukwenda hamui na bali̱ eku̱mi̱ nʼomui.