1 Bwile obu muhendo ghwa beeghesebuwa ghweyongelela kimui kukana. Bayu̱daaya abaabu̱ghagha Lu̱gi̱li̱ki̱ baatandika kuhakangana na Bayu̱daaya abaabu̱ghagha Luhebbulaayo, nanga abaabu̱ghagha Luhebbulaayo baanaghi̱li̱jagha bakwi̱si̱ya bʼabaabu̱ghagha Lu̱gi̱li̱ki̱ mu kubatambu̱li̱ya bintu bu̱li̱ kilo. 2 Niibuwo bakwenda eku̱mi̱ na babili aba baabilikiiye beeghesebuwa boona kwisa mu lukulato. Baaghila bati, “Takili kilungi etu̱we kuukala ntunaghaba bintu mu ki̱i̱kalo kya kutebeja kighambo kya Luhanga. 3 Nahabweki baana baamaaha, mwekomemu bantu musanju̱ aba bantu bahu̱ti̱i̱ye, abaasuuye Mwoyo Ahi̱ki̱li̱i̱ye, kandi abali na magheji, aaniibo twaha mulimo ghwa kughaba bintu. 4 Niikuwo etu̱we bwile bwatu bwona tubumale ntusaba kandi ntutebeja kighambo kya Luhanga.” 5 Bahi̱ki̱li̱ja aba boona baasi̱i̱ma kihanuulo eki. Baakoma Siteefaano, musaasa ali na ku̱hi̱ki̱li̱ja kwamaani̱ kandi aasuuye Mwoyo Ahi̱ki̱li̱i̱ye. Baakoma Fi̱li̱po, Polokolo, Nikanooli̱, Ti̱mooni̱, Pamena, na Nikola wʼomu kibugha kya Anti̱yoki̱ya (wʼomu Anti̱yoki̱ya, oghu akaba adu̱bhi̱ye kutaaha di̱i̱ni̱ ya Ki̱yu̱daaya.) 6 Baaleeta basaasa aba mu maaso ghaa bakwenda, baabatʼo mikono kandi baabasabila.

7 Kighambo kya Luhanga kyeyongela kugbaatikana, ti̱ muhendo ghwa beeghesebuwa ghwakanila kimui mu Yelusaalemu. Na bahongi̱ bakani̱ye baahi̱ki̱li̱ja Mukama Yesu.

8 Luhanga aaghilila Siteefaano ngughuma aamuha maani̱ ghaa kuukala naakola byakuswekani̱ya bikani̱ye mu bantu. 9 Niibuwo bamui mu bantu bʼomu elami̱li̱yo eli baaghilaghamu lya Basyana Abaatu̱ngi̱ye Bughabe, baasi̱ye baatandika kuhakangana naye. Bakaba bali Bayu̱daaya abaali balu̱ghi̱ye mu mahanga ghaa Kilene, Alekijandi̱li̱ya, Ki̱li̱ki̱ya na mu kyalo kya Asi̱ya. 10 Bhaatu Mwoyo Ahi̱ki̱li̱i̱ye aaha Siteefaano oghu magheji. Kandi taaliyo muntu nʼomui oghu akagubha ku̱mu̱si̱nga. 11 Niibuwo baahani̱ye bantu kuhabi̱i̱li̱li̱ya Siteefaano bati, “Twaghu̱u̱ye musaasa oghu nambulila kimui Musa hamui na Luhanga.” 12 Du̱mbi̱ baahaaghi̱li̱li̱ya bantu, bengei̱ baa Bayu̱daaya, hamui na beegheesi̱ya baa bilaghilo. Bantu aba baasa baakwata Siteefaano baamutwala mu Lukulato Lukulu lwa bengei̱. 13 Baataahi̱yamu bamui mu bantu kuhabi̱i̱li̱li̱ya Siteefaano bati, “Musaasa oghu akuukalagha naabu̱ghʼo kubhi ki̱i̱kalo ki̱hi̱ki̱li̱i̱ye kini hamui na bilaghilo. 14 Twamu̱u̱ghu̱u̱ye naaghila ati Yesu wabo wa Najaaleeti̱ oghu akuuhilʼo kimui Numba ya Luhanga waatu kandi ahindulile kimui mi̱ghendi̱yo yoona eghi Musa aatulaghiiye kukola.” 15 Obu abaabaagha mu Lukulato olu baaghu̱u̱ye eki, baalola tonono Siteefaano kandi baabona haali̱i̱so yee naabbebbeniya nga Malai̱ka.