Bbaluwa eghi Paulo aahandiikiiye
Bakolosaai̱
Kwanjula
Kolosaai̱ kikaba kili kibugha ekyabaagha bughuwa ejooba bwa ehanga eli endindi bakughilaghamu Bu̱tu̱lu̱ki̱. Mukwenda Paulo eenini akaba atakahi̱ki̱yeyo. Aaghu̱wa akwatu̱u̱wʼo nanga beegheesi̱ya baa bisubha bakaba mbaasi̱ye mu ki̱bbu̱la kya bahi̱ki̱li̱ja baayo. Beegheesi̱ya aba bakaba mbaghambiiye Baki̱li̱si̱taayo aba bati bakulaghiluwa kukwamilila mi̱ghendi̱yo ya di̱i̱ni̱ ya Ki̱yu̱daaya.
Paulo aabahanuulila kutasi̱i̱ma mi̱ghendi̱yo na bilaghilo bya bantu beeteeleeyʼo kukola nga kusaluwa kedha kulami̱ya baamalai̱ka niikuwo Luhanga adheedhuwe.
Paulo aahandiika bbaluwa eni kubaasu̱ki̱ya ati ku̱ku̱wa kwa Ki̱li̱si̱to niikuwo kwabaju̱ni̱ye. Aabaghila ati Ki̱li̱si̱to ali mu eghulu kandi alemi̱ye baamalai̱ka boona na bu̱li̱ kintu ekili mu munsi na mu eghulu. Nahabweki, aabaghila ati tabakwetaaghisibuwa kukwamilila mi̱ghendi̱yo enji kedha njegheesi̱ya sinji. Babhonganuuwe kulami̱ya Ki̱li̱si̱to enkaha. Aabaasu̱ki̱yagha dhee ati bwomi̱i̱li̱ bwabo bukulaghiluwa kwoleka ngu ni bantu aba Luhanga aakomi̱yemu.
1
1 Si̱ye Paulo, oghu Luhanga mu kubbala kuwe aakomi̱ye kuba mukwenda wa Ki̱li̱si̱to Yesu, ndi hamui na mu̱hi̱ki̱li̱ja muunakyatu Ti̱mi̱seewa.
2 Nabahandiikila bbaluwa eni enu̱we bantu baa Luhanga, kandi bahi̱ki̱li̱ja baanakyatu beesighibuwa abeelungani̱i̱ye na Ki̱li̱si̱to, abali mu tau̱ni̱ ya Kolosaai̱. Luhanga Eseetu̱we abaghilile ngughuma kandi abahe mpempa yonkaha.
Paulo naasi̱i̱ma Luhanga kandi naasabila Bakolosaai̱
3 Tukaakubaagha ntubasabila, tu̱ku̱si̱i̱magha Luhanga Ese Mukama waatu Yesu Ki̱li̱si̱to haabwanu, 4 nanga baatughambiiye ngoku mu̱hi̱ki̱li̱i̱je Ki̱li̱si̱to Yesu kandi ngoku mu̱ku̱ndi̱ye bantu baa Luhanga boona. 5 Muli na ku̱hi̱ki̱li̱ja kandi kukunda oku, nanga kunihila muti Luhanga alibaha mi̱gi̱sa yoona eghi aabateekani̱li̱i̱je mu eghulu, bakabaghambilʼo biyo mu butumuwa bwa majima obuli Makulu Ghasemeeye ghaa Luhanga, 6 agha baabatebi̱i̱je. Ti̱ mu bi̱i̱kalo bikani̱ye munsi yoona bantu niibuwo baahi̱ki̱li̱ja Makulu Ghasemeeye agha kandi niibuwo baatunga mi̱gi̱sa ya Luhanga, ngoku naanu mwabaaye, ku̱lu̱gha kilo eki mwaghwi̱li̱i̱yemu makulu agha kandi mwetegheeleli̱ya majima ngoku Luhanga ali na ngughuma. 7 Makulu Ghasemeeye agha, oghu akabeegheesi̱ya gho ni Epafula mu̱heeleli̱ya muunakyatu oghu tu̱ku̱ndi̱ye, oghu naye ali mu̱koli̱ mwesighibuwa eghi wa Ki̱li̱si̱to haabwatu. 8 Epafulo oghu niiye aatughambiiye ngoku Mwoyo Ahi̱ki̱li̱i̱ye abagu̱bhi̱i̱si̱i̱ye kukunda bantu baa Luhanga.
9 Ti̱ ku̱lu̱gha bwile obu aatughambiiye makulu ghaanu, tukubasabilagha. Tukusabagha tuti Luhanga abakoonele kwetegheeleli̱ya ebi akubbala ati mukole kandi tuti Mwoyo Ahi̱ki̱li̱i̱ye abahe magheji ghaa kwetegheeleli̱ya kusemeeye ntegheka ya Luhanga. 10 Tukubasabilagha tutiyo niikuwo mu byona mwetwalikani̱ye mu mulingo oghu̱dheedhi̱ye Mukama. Tuti mukolanganaghe kusemeeye kandi mweyongele kukula mu kumanya Luhanga, 11 kandi Luhanga wa bu̱soboli̱ bwona mu maani̱ ghaa ki̱ti̱i̱ni̱sa kiye abagu̱mi̱ye, niikuwo muukale mu̱gu̱mi̱ye masaasa kandi muli na kudheedhuwa 12 ni̱mu̱si̱i̱ma Luhanga Eseetu̱we, oghu akabafoola dhee naanu kuba mu bakutunga hʼebi aalaghiisani̱i̱je kuha bantu be mu bukama buwe bwa kyeleeli̱. 13 Nanga niiye akatucungula ku̱lu̱gha mu bu̱lemi̱ bwa mweli̱ma bwa Si̱taani̱ aatufoola kuba mu bantu aba Mwana wee Yesu oghu aku̱ndi̱ye alemi̱ye. 14 Niiye akatucungula kandi kukwama mu eye, Luhanga aatughanila bibhi byatu.
Ki̱li̱si̱to asaai̱ye byona
15 Ki̱li̱si̱to oghu niiye ali kwonini ngoku Luhanga oghu ataakubonekagha ali, akabʼo Luhanga atakahangi̱ye kintu kyona kandi niiye ali na bu̱toki̱ haa bihanguwa byona. 16 Nanga bintu byona bikahanguwa kukwama mu eye, ebili mu eghulu nʼebili munsi, ebikubonekagha nʼebitaakubonekagha, bi̱li̱mu̱ ebili na bu̱toki̱ kandi maani̱ ghaa kulema munsi na mu mwanya. Byona niiye akabihanga kandi haabuwe. 17 Akabʼo bintu ebi byona bitakahangu̱u̱we, kandi niiye aleki̱ye bu̱li̱ kintu kiliyo kandi kiteekaane mu ki̱i̱kalo kyakiyo. 18 Niiye mutuwe ghwa ki̱bbu̱la kya bahi̱ki̱li̱ja abali mubili ghuwe; niiye akulekagha bahi̱ki̱li̱ja baba boomi̱i̱li̱, kandi niiye Luhanga aadu̱bhi̱ye ku̱hu̱mbu̱u̱la mu baku̱u̱ye niikuwo Ki̱li̱si̱to oghu abe na bu̱toki̱ bumaliliiye bwa kulema bintu byona. 19 Nanga ki̱dheedhi̱ye Luhanga Ki̱li̱si̱to kubeela kimui ngoku Luhanga eye eenini ali, 20 kandi Ki̱li̱si̱to oghu niiye Luhanga aakoleeseei̱ye kweku̱u̱ki̱li̱ya bintu byona ebili mu eghulu nʼebili munsi, akakola eki kukwama mu saghama ya Mwana wee Yesu eghi ekaseeseka haa musalaba matu̱kwi̱la, niikuwo endindi bu̱li̱ kintu kyona kigubhe kuba mpempa na Luhanga.
21 Mutakahi̱ki̱li̱i̱je Ki̱li̱si̱to mukaba mwebaghani̱i̱jʼo Luhanga kandi muli ngi̱ghu̱ siye mu byeli̱li̱kano byanu haabwa bikoluwa bi̱bhi̱i̱hi̱ye mwakolagha. 22 Bhaatu endindi Luhanga aabeeku̱u̱ki̱li̱i̱ye haabwa Ki̱li̱si̱to oghu aaleki̱ye aaba muntu kandi aabakwi̱la, niikuwo obu Luhanga alileeta enu̱we hambali ali, mube muli bahi̱ki̱li̱i̱ye mu maaso ghe, mutali na kibhi kedha eki akubasoghosʼo. 23 Eki kikubʼo kaakuba mweyongela ku̱hi̱ki̱li̱ja Ki̱li̱si̱to, mumugumilʼo kwonini kandi mutalu̱gha haa kunihila oku baabaghambiiye mu Makulu Ghasemeeye haa Ki̱li̱si̱to agha. Makulu agha ni agha mwaghu̱u̱ye kandi agha bakwete kulangilila bantu bakaniiye kimui munsi, kandi nanje Paulo niigho naafooki̱ye mu̱heeleli̱ya wagho.
Mulimo ghwa Paulo mu bahi̱ki̱li̱ja baa Kolosaai̱
24 Ti̱ endindi nku̱u̱ghu̱wa ndheedheeu̱we kubona-bona mu nkomo haabwanu, kandi neehaayeyo kubona-bona byona ebi Ki̱li̱si̱to aku̱si̱i̱ma ati mbona-bone ngoku eye aaboona-boone haabwa ki̱bbu̱la kya bahi̱ki̱li̱ja abali mubili ghuwe. 25 Naafooka mu̱heeleli̱ya wabo haabwa bujunaani̱ji̱buwa Luhanga ampaaye kubaghambila butumuwa buwe mu buusuuye. 26 Butumuwa obu ni nsi̱ta eghi ataasi̱i̱mi̱lani̱i̱ye bantu kumanya ku̱lu̱gha hambele na hambele, bhaatu eghi endindi aasu̱ku̱li̱i̱ye bantu be baamanya. 27 Luhanga akatu̱wamu kwoleka bantu be ngu butumuwa obu bwoleki̱ye ngu akuha mi̱gi̱sa ekani̱ye naanu dhee batali Bayu̱daaya haabwa Ki̱li̱si̱to oghu ali mu bwomi̱i̱li̱ bwanu niikuwo eki̱ku̱lu̱ghamu kuba enu̱we kunihila kwonini ngu mulighabana haa ki̱ti̱i̱ni̱sa kya Luhanga.
28 Tukulangililagha bantu butumuwa haa Ki̱li̱si̱to, ntuteelelela kandi ntwegheesi̱ya bu̱li̱ omui mu kwetegheeleli̱ya kwona, niikuwo tuleete bu̱li̱ muntu mu maaso ghaa Luhanga aku̱li̱ye mu Ki̱li̱si̱to. 29 Ku̱hi̱ki̱ya nʼendindi haabwa maani̱ Ki̱li̱si̱to akumpaagha niikiyo kikulekagha ntalibana kwonini kandi neekambila kimui kukola mulimo oghu.