1 Mu mwaka ghwʼoku̱du̱bha ghwa Bbeli̱saja mukama wa Bbabbu̱looni̱, Dhaneeli̱ aaloota kandi aabonekeluwa mu ndooti̱ eghi analangaaye haa bulili buwe. Aahandiika ebi aaboone mu ndooti̱ eghi.

2 Dhaneeli̱ aaghila ati, “Mukilo obu naabaagha ndangaaye, naaboone mpwegha neehunga ku̱lu̱gha haa mpande syona kandi yaaleka nanja namu̱li̱to yaasula. 3 Binyama bbinaa biinamu̱li̱to ebitasusaane byalu̱gha mu nanja eghi.

4 “Kinyama kyʼoku̱du̱bha kyabaagha ki̱su̱si̱ye ntale kandi kili na mapapa nga ghaa kibebe. Obu naabaagha ninaki̱loli̱ye, mapapa ghaakiyo ghaaki̱lu̱ghʼo, kyamuka hansi kandi kyemilila haa maghulu abili nga muntu, kyaheebuwa mutima nga ghwa muntu.

5 “Kinyama kyakabili eki naaboone kyabaagha ki̱su̱si̱ye dubu. Kyemilila haa maghulu ghaakiyo gheenu̱ma kandi mbalu̱ esatu syabaagha mu kanu̱wa kaakiyo haagati ya maano ghaakiyo. Baakighila bati, ‘Oomuke kandi oliye nyama sikani̱ye!’

6 “Haanu̱ma yʼeki, obu naaloli̱ye naabona kinyama kinji, kyabaagha ki̱su̱si̱ye nga nguwe. Haa mughongo ghwakiyo, haabaaghʼo mapapa anaa ghasu̱si̱ye ghaa ki̱noni̱. Kinyama eki kyabaagha kili na mituwe enaa kandi baakiha bu̱toki̱ bwa kulema.

7 “Haanu̱ma yʼeki, mu kubonekeluwa kwanje mukilo, naabona kinyama kyakanaa ekyabaagha kili kyamaani̱, ki̱neeti̱ye, kya kwobahi̱i̱li̱li̱ya kandi kyabaagha kili na maano ghaanamu̱li̱to ghaa kyoma. Kinyama eki kyaheenanga bintu na bantu mu bi̱twi̱ka-twi̱ke kandi kyabiliya. Kyahwelekeeleli̱ya bintu byona na maghulu ghaakiyo. Kyabaagha kili kya mbaghani̱ja na binyama binji kandi kili na mahembe eku̱mi̱.

8 “Obu naaneeli̱li̱kanagha haa mahembe agha, naabona ehembe linji liinabwana kandi lyamilila mu mahembe agha, lyadhuula mahembe asatu aghaasangu̱u̱we ghaliyo. Ehembe eli lyabaagha lili na maaso nga ghaa muntu kandi kanu̱wa akaabu̱ghagha bya kwepanka.

9 “Obu naaloli̱ye naabona ntebe sya bukama kandi Luhanga oghu baaghilaghamu Oghu akaba haliyo hambele na hambele aasitama haa ntebe yee ya bukama. Aabaagha alu̱wete ngoye syeli̱ye dhiyo nga bilika kandi esoke liye lili lijelu dhiyo nga byoha bya ntaama. Ntebe yee ya bukama yaabaagha eli haa bilimi bya mulilo kandi nkata syayo syakaghʼo mulilo.

11 “Neeyongela kulola nanga nkaba ni̱i̱ghu̱u̱ye elaka lya ehembe liinabwana lya kwepanka. Naakala ninaloli̱ye ku̱hi̱ki̱ya obu baati̱ye kinyama kyakanaa kandi mu̱ku̱ ghwakiyo baaghwoki̱ya mu mulilo. 12 Binyama bisatu ebyati̱ghaayʼo baabiiyʼo bu̱toki̱ bwabiyo, bhaatu byakala binali byomi̱i̱li̱ haabwa bwile.

13 “Mu kubonekeluwa kwanje mukilo eghi obu naaloli̱ye naabona oghu asu̱si̱ye nga mwana wa muntu, naasu̱ndu̱ki̱la haa bicu byʼomu mwanya.*7:13 Matayo 24:30; Maliko 14:62; Luka 21:27; Ku̱su̱u̱ku̱lu̱lu̱wa 1:7 Aaghenda hambali Luhanga oghu baaghilaghamu Oghu akaba haliyo hambele na hambele ali kandi aasitama mu maaso ghe. 14 Mwana wa muntu oghu aaheebuwa bu̱toki̱, ki̱ti̱i̱ni̱sa kandi maani̱. Bantu boona, mahanga na bantu baa bu̱li̱ mu̱bu̱ghe baamulami̱ya. Bu̱lemi̱ buwe bukuba bwa bilo nʼebilo kandi obutaakuhuwʼo.

15 “Ebi si̱ye Dhaneeli̱ naaboone mu kubonekeluwa oku byaleka naatuntula kandi noobahila kimui. 16 Neebinga omui haa abaabaagha baamiliiye haai nanje mu kubonekeluwa oku, naamu̱bu̱u̱li̱ya eki bintu ebi byona bikumani̱i̱si̱ya.

“Nahabweki angambila eki bintu ebi bikumani̱i̱si̱ya. 17 Aaghila ati, ‘Binyama bbinaa biinamu̱li̱to ebi bikumani̱i̱si̱ya bakama bbanaa baamaani̱, abakulema mu nsi na bu̱toki̱. 18 Bhaatu bantu bahi̱ki̱li̱i̱ye baa Luhanga wa Eghulu Munu bakutunga bukama kandi bube bwabo bilo nʼebilo.’

19 “Du̱mbi̱ naabbala kumanya eki kinyama kyakanaa kikumani̱i̱si̱ya, ekyabaagha kya mbaghani̱ja na binji kandi ekyobahi̱i̱li̱li̱yagha. Kinyama ekyabaagha na maano ghaa kyoma na bi̱ku̱lu̱ bya kyoma bakughilaghamu bbu̱looji̱. Kinyama ekyakpeetaaguuye bintu na bantu mu bi̱twi̱ka-twi̱ke kandi kyabiliya. Kinyama ekyahwelekeleei̱ye bu̱li̱ kintu kyona na maghulu ghaakiyo. 20 Naabbala dhee kumanya ebikwetʼo mahembe eku̱mi̱ aghaabaagha haa mutuwe ghwakiyo na ehembe linji liinabwana elyahiye mahembe ghanji asatu mu ki̱i̱kalo kyagho niikuwo liikalʼo. Ehembe liinabwana eli mahembe ghanji asatu gheegengi̱ye mu maaso ghaaliyo lyabaagha lisaakaaye kusaali̱ya mahembe ghali̱ ghanji. Ehembe eli lyabaagha lili na maaso kandi kanu̱wa akaabu̱ghagha bintu bya kwepanka. 21 Obu naabaagha ninaloli̱ye, ehembe eli lyatandika kulwana na bantu bahi̱ki̱li̱i̱ye kandi lyabasi̱ngu̱la. 22 Bhaatu Luhanga oghu baaghilaghamu Oghu akaba haliyo hambele na hambele aasa kandi aatu̱wa musango ati bantu be bahi̱ki̱li̱i̱ye niibo baasi̱ngi̱ye. Du̱mbi̱ bwile bwahi̱ka bwa bantu aba kutwala bukama bwabo.

23 “Niibuwo angi̱li̱ye ati, ‘Kinyama kyakanaa ni bukama bwakanaa obukuba munsi. Bukama obu bukuba bwa mbaghani̱ja na makama ghanji kandi bu̱ku̱hwelekeeleli̱ya nsi yoona, bukughikpeetaaga kandi bughisabangule. 24 Mahembe eku̱mi̱ ni bakama eku̱mi̱ baa bukama obu. Haanu̱ma ya bakama aba, mukama onji hakubʼo, oghu akuba wa mbaghani̱ja na bakama banji kandi aku̱si̱ngu̱la bakama basatu aba. 25 Aku̱bu̱gha naahakani̱ya Luhanga wa Eghulu Munu kandi akubona-boni̱ya bantu baa Luhanga bahi̱ki̱li̱i̱ye. Akulengʼo kuhindula bwile na bilaghilo. Bantu bahi̱ki̱li̱i̱ye bakuba hansi ya bu̱toki̱ buwe haabwa myaka esatu na ki̱twi̱ke.

26 “ ‘Bhaatu kooti̱ ekusitama ku̱mu̱twi̱la musango, niikuwo bamuuyʼo bu̱toki̱ buwe kandi bamu̱hwelekeeleli̱ye bilo nʼebilo. 27 Du̱mbi̱ bukama, bu̱lemi̱ kandi ki̱ti̱i̱ni̱sa kya makama ghaa munsi yoona biliheebuwa bantu bahi̱ki̱li̱i̱ye baa Luhanga wa Eghulu Munu. Bukama buwe buliba bwa bilo nʼebilo kandi balemi̱ banji bakumulami̱ya kandi bamu̱hu̱ti̱ye.’

28 “Ebi niibiyo naaboone kandi naaghu̱wa mu kubonekeluwa kwanje. Si̱ye Dhaneeli̱ naatuntula kwonini kandi haali̱i̱so yanje aahinduka haabwa kwobaha. Bhaatu naakala ni̱i̱neeli̱li̱kana haa bintu ebi.”