Ku̱lu̱gha
Kwanjula
Kitabo kya Ku̱lu̱gha ki̱bu̱ghi̱yʼo ngoku Banai̱saaleeli̱ baatu̱ngi̱ye bughabe ku̱lu̱gha mu bu̱syana mu nsi ya Mi̱si̱li̱. Bantu aba baalu̱ghayo kandi baaghenda haa mwena ghwa Luhanga oghu baaghilaghamu Holebbu kedha Si̱naai̱. Luhanga aabakoonela mu lughendo olu naabakolela byakuswekani̱ya, nankabha bwile bwona mbaakalagha mbatongana na mwebembeli̱ wabo Musa. Luhanga aakola ndaghaano na Banai̱saaleeli̱ kandi aabaha bilaghilo na ndaghikiililo, otaayemu bilaghilo eku̱mi̱. Aabalaghikiilila ngoku bakukwela ki̱i̱kalo ki̱hi̱ki̱li̱i̱ye, hambali bantu aba balahongelagha bihonguwa ewaa Luhanga.
Kitabo kini ki̱bu̱ghi̱yʼo ngoku Luhanga aakoli̱ye ebi aabu̱ghi̱ye mu ndaghaano eghi aakoli̱ye na Ebbulahi̱mu̱, I̱saka na Yakobbo, eghi ebu̱ghi̱yʼo ngoku akubaha baasukulu bakani̱ye kandi nsi. Obu bantu aba baalu̱ghagha Mi̱si̱li̱, kutahi̱ki̱li̱ja kwabo kwaleka baamala bwile bukani̱ye batakaki̱dhi̱ye mu nsi eghi. Mujo ghwona ghwa bantu aba abataabaaye beesighibuwa, boona baakwi̱la mu elungu. Luhanga aakola ndaghaano na bantu aba boona naabu̱gha na Musa. Bantu aba baakabhengagha ku̱mu̱hu̱ti̱ya, abafubila kandi abaata, ati̱ghʼo bakee abaku̱byala mujo oghukulabhʼo.
Kitabo kini ki̱bu̱ghi̱yʼo ngoku Luhanga ali ahi̱ki̱li̱i̱ye, ali na bwengani̱ja, ali na kukunda, ali na kisa kandi ali na bwesighibuwa. Aabalaghila kukolagha Ki̱ghenu̱ kya Kusaaluwʼo mbahonga kihonguwa kya kyana kya ntaama. Aabalaghila kukolagha ki̱ghenu̱ eki kuusukagha ngoku bantu baa I̱saaleeli̱ baalu̱ghi̱ye mu bu̱syana mu nsi ya Mi̱si̱li̱. Ki̱ghenu̱ eki kikwolekagha dhee Yesu nga kyana kya ntaama oghu baati̱ye niikuwo bantu boona baa munsi abaku̱mu̱hi̱ki̱li̱ja bajunuwe kifubilo kya Luhanga.
Kitabo kini ni kimui haa bitabo bitaano ebi Musa aahandi̱i̱ki̱ye.
1
Banai̱saaleeli̱ mbabona-bonela Mi̱si̱li̱
1 Ghani niigho mali̱i̱na ghaa batabani̱ baa I̱saaleeli̱ (oghu ni Yakobbo), abaaghendi̱ye naye mu ehanga lya Mi̱si̱li̱, bu̱li̱ omui na ka yee: 2 Leu̱bbeeni̱, Si̱mi̱yooni̱, Leevi̱, Yu̱da, 3 I̱sakaali, Jabbu̱looni̱, Bbenjami̱i̱ni̱, 4 Daani̱, Nafutaali, Gaadi̱ na Aseli̱. 5 Muhendo ghwa batabani̱ na baasukulu baa Yakobbo, boona bakaba bali bantu nsanju̱. Mutabani̱ wee Yojeefu̱ akaba asangu̱u̱we ali Mi̱si̱li̱.
6 Haanu̱ma ya bwile kuhuwʼo, Yojeefu̱, baghenji̱ be boona na bantu bakulu boona baa mujo oghu, baaku̱wa. 7 Bhaatu baasukulu baa I̱saaleeli̱ baabyala baana kandi baakanila kimui, baaba baamaani̱ kandi baasula mu nsi ya Mi̱si̱li̱.
8 Bwile obu, mukama muhyaka oghu akaba atamani̱ye Yojeefu̱ aalema mu Mi̱si̱li̱. 9 Aaghila bantu be ati, “Mulole, Banai̱saaleeli̱ baakaniiye kimui kandi bali na maani̱ ghasaaye ghaatu. 10 Muleke tutʼo ntegheka ya kubatanga kweyongela kukana, nanga naanabaayʼo bulemo, bakwelungani̱ya na ngi̱ghu̱ syatu batulwani̱i̱si̱ye kandi baaluke mu ehanga lyatu.”
11 Nahabweki Banami̱si̱li̱ baatandika ku̱koleesi̱ya Banai̱saaleeli̱ nga basyana baabo. Baabateelʼo abakubaloleelela haa milimo kubabona-boni̱ya mbabaha kukola milimo yamaani̱. Baakwelela Falaaho bibugha bibili bya kubiikilamu bintu, Pi̱toomu̱ na Lamu̱sesi̱. 12 Bhaatu ngoku baakeeyongelagha kubabona-boni̱ya, niikuwo Banai̱saaleeli̱ beeyongelagha kukana kandi kumalakaka nsi eghi yoona. Banami̱si̱li̱ baatandika kwobaha Banai̱saaleeli̱ aba. 13 Nahabweki baatandika kuhambi̱li̱ja Banai̱saaleeli̱ kukola na maani̱. 14 Baababona-boni̱ya mbabaha kukola milimo yamaani̱ ya kukpeeta bulongo kandi kubumbamu matafaali na kukola milimo yoona mu Mi̱si̱li̱. Tabaabaghililagha kisa.
15 Mukama wa Mi̱si̱li̱ aalaghila bakali̱ Bahebbulaayo babyali̱i̱si̱ya, Sifula na Puha ati, 16 “Obu mulabaagha ni̱mu̱byali̱i̱si̱ya bakali̱ Bahebbulaayo, nimwaboone abyaye mwana wabusaasa, mwana oghu mumwitaghe, bhaatu naabyaye wabukali̱, mumulekaghe ali mwomi̱i̱li̱.” 17 Bhaatu bakali̱ babyali̱i̱si̱ya aba bakaba boobahi̱ye Luhanga kandi bataakola eki mukama wa Mi̱si̱li̱ aabalaghiiye. Baaleka baana baabusaasa bali boomi̱i̱li̱. 18 Niibuwo mukama oghu aabilikiiye bakali̱ babyali̱i̱si̱ya aba, aababu̱u̱li̱ya ati, “Nkiki mukwete kukola kubhenga kwita baana baabusaasa?”
19 Bakali̱ aba baakuukamu Falaaho bati, “Bakali̱ Bahebbulaayo tabali nga bakali̱ Banami̱si̱li̱, bali na maani̱ kandi baku̱byalagha bwangu mubyali̱i̱si̱ya atakabaki̱dhi̱yʼo.”
20 Nahabweki Luhanga aaghilila kisa bakali̱ babyali̱i̱si̱ya aba kandi Banai̱saaleeli̱ beeyongela kukana kandi kuba baamaani̱. 21 Bakali̱ aba haabwa kwobaha Luhanga, aaleka baabyala baana kandi baatunga maka.
22 Niibuwo Falaaho aalaghiiye bantu be boona ati, “Mwana weena wabusaasa oghu mukali̱ Muhebbulaayo alabyalagha, mumukubaghe mu maasi ghaa Nailo, bhaatu baabukali̱ mubalekaghe bali boomi̱i̱li̱.”