1 Musa aakumaani̱ya ki̱bbu̱la kyona kya Banai̱saaleeli̱, aabaghila ati, “Bini niibiyo bintu ebi Mukama aabalaghiiye kukola. 2 Muli na bilo mukaagha bya kukola milimo yaanu, bhaatu kilo kyamusanju̱ kilabaagha kilo kya Sabhato kya kuhuumula kandi ki̱hi̱ki̱li̱i̱ye ewaa Mukama. Muntu weena oghu alakolagha mulimo haa kilo eki aatibuwaghe. 3 Mutali̱tu̱mi̱ka mulilo mu maka ghaanu haa kilo kya Sabhato.”

4 Musa aaghila ki̱bbu̱la kyona kya Banai̱saaleeli̱ ati, “Kini niikiyo kintu eki Mukama aabalaghiiye kukola. 5 Muheyo kisembo ewaa Mukama. Muntu weena oghu ali na mutima ghwa bwenge, aleete kisembo kya Mukama: feeja, siliva, bbu̱looji̱, 6 mahu̱u̱ji̱ ghaa langi̱ ya bbu̱lu̱lu̱, papo, mutuku, lughoye lusemeeye, byoha bya mbu̱li̱, 7 mpu siimutuku sya ntu̱u̱li̱ sya ntaama, mpu sya mbu̱li̱, mbaau sya ki̱i̱lu̱mbo, 8 mafu̱ta ghaa kuta mu taala, bintu bisasi̱ye bya kuta mu mafu̱ta ghaa kusiigha, bubbani̱ busasi̱ye, 9 mabaale onika na mabaale ghanji ghaa muhendo, ghaa kuta haa efodi̱ na kyaku̱lu̱waala haa ki̱ku̱bha.

10 “Muntu weena oghu amani̱ye kukola bintu bya ngalo, aase tukole bintu byona ebi Mukama aalaghiiye: 11 weema ehi̱ki̱li̱i̱ye na byaku̱ghi̱swi̱ki̱la, bigwasi byayʼo, fuleemu syayʼo, mikiiko yayo, mpaghi syayʼo, ncuba sya kutaamu mpaghi, 12 sandu̱u̱ku̱ ya ndaghaano, mpaghi syayʼo, kyakughaniililʼo bantu bibhi, kateni̱ ya kuta mu maaso ghaa sandu̱u̱ku̱ eghi, 13 meeja na mpaghi syayʼo, na byaku̱koleesi̱yʼo byona, mugaati̱ ghwa kuhongela Luhanga, 14 kyakutʼo taala na byaku̱koleesi̱yʼo byona, taala syakiyo na mafu̱ta ghaakuta mu taala esi, 15 kyaku̱tu̱mi̱kʼo bubbani̱ na mpaghi syakiyo, mafu̱ta ghaa kusiigha, bubbani̱ busasi̱ye, kateni̱ ya kuta haa mulyango ghwa weema ehi̱ki̱li̱i̱ye, 16 kyakuhongelʼo bihonguwa byona byokeei̱ye, kati̱mba kaakiyo kaa bbu̱looji̱, mpaghi syakiyʼo, byaku̱koleesi̱yʼo byona, bbaafu ya bbu̱looji̱ na kyakughitʼo, 17 kateni̱ sya kukola lugho lwa jighati̱, mpaghi sya jighati̱ eghi, ncuba sya kutaamu mpaghi esi, kateni̱ ya kuta haa geeti̱ ya jighati̱, 18 nkondo sya weema ehi̱ki̱li̱i̱ye, nkondo sya jighati̱ na mighuwo yasiyo, 19 bi̱lu̱waalo bi̱koleeu̱we kulungi bya bahongi̱ ku̱lu̱waalagha mbakola mulimo mu Ki̱i̱kalo Ki̱hi̱ki̱li̱i̱ye, bi̱lu̱waalo bi̱hi̱ki̱li̱i̱ye bya mu̱hongi̱ Alooni̱ na bi̱lu̱waalo bya batabani̱ be balalu̱waalagha mbaheeleli̱ya nga bahongi̱.”

20 Du̱mbi̱ ki̱bbu̱la kyona kya Banai̱saaleeli̱ kyalu̱gha hambali Musa ali kandi kyaghenda. 21 Bu̱li̱ muntu aaghenda kandi aakola ngoku mutima ghuwe ghwamughambiiye. Baaleetela Mukama bisembo bya kukola mulimo ghwa kukwela weema ya kusanga-sangaanamu, milimo yayo yoona na bi̱lu̱waalo bi̱hi̱ki̱li̱i̱ye bya bu̱hongi̱. 22 Bakali̱ na basaasa beehaayo kandi baaleeta bintu bisemeeye bya feeja, bigwasi, mpete syʼomu matui, mpete syʼomu byala na bikwanji byʼomu bikiya, baabihaayo ewaa Mukama. 23 Muntu weena oghu akaba ali na lughoye lwa langi̱ ya bbu̱lu̱lu̱, papo, mutuku kedha lughoye lusemeeye, byoha bya mbu̱li̱, mpu siimutuku sya ntu̱u̱li̱ sya ntaama na mpu sya mbu̱li̱, byona baabileeta. 24 Muntu weena oghu aagubhagha kuleeta kisembo kya siliva kedha bbu̱looji̱ aakihaayo nga kisembo ewaa Mukama. Muntu oghu akaba ali na mbaau sisemeeye sya ki̱i̱lu̱mbo sya kukola mulimo aasileeta. 25 Bakali̱ boona abaabaagha bamani̱ye kukola kulungi milimo ya ngalo, baaluka bintu ebi baagu̱bhi̱ye kandi baabileeta, bintu bya langi̱ ya bbu̱lu̱lu̱, papo, mutuku na lughoye lusemeeye. 26 Bakali̱ boona abaabaagha bamani̱ye kukola ngoye mu byoha bya mbu̱li̱, baasikola badheedheeu̱we. 27 Beebembeli̱ baa Banai̱saaleeli̱, baaleeta mabaale onika na mabaale ghaa muhendo, ghaa kuta haa efodi̱ na kyaku̱lu̱waala haa ki̱ku̱bha. 28 Baaleeta bintu bisasi̱ye na mafu̱ta ghaa kuta mu taala, mafu̱ta ghaa kusiigha na bubbani̱ busasi̱ye. 29 Banai̱saaleeli̱ boona, bakali̱ na basaasa, abaabaagha na mutima ghwa kuhaayo kintu kyona haabwa mulimo oghu Mukama aalaghiiye Musa kukola, baabileeta kandi baabihaayo ewaa Mukama nga kisembo badheedheeu̱we.

30 Musa aaghila Banai̱saaleeli̱ ati, “Mukama aakomi̱ye Bbejaleeli̱ mutabani̱ wa U̱li̱, muusukulu wa Hula, wʼomu ntu̱la ya Yu̱da. 31 Luhanga aaleki̱ye Mwoyo wee aamwisʼo kwonini, aamuha magheji, kwetegheeleli̱ya kandi aamufoola oghu amani̱ye kukola bintu bya ngalo. 32 Akugubha kukola bintu bisemeeye ku̱lu̱gha mu feeja, siliva na bbu̱looji̱. 33 Akugubha kubhaaka mabaale kandi kughata mu buufuleemu bwa feeja, kulanda mbaau kandi kukola bu̱li̱ mulimo ghwona ghwa ngalo. 34 Mukama aahaaye Bbejaleeli̱ na Oholi̱yaabbu mutabani̱ wa Ahisamaki̱ wʼomu ntu̱la ya Daani̱, magheji ghaa kwegheesi̱ya bantu banji. 35 Aabahaaye magheji ghaa kukola bintu bya ngalo, kuteela bisasani̱, kusona kulungi ngoye kandi kutaamu langi̱ ya bbu̱lu̱lu̱, papo, mutuku kandi kukola lughoye lusemeeye. Bakugubha kukola bintu bikani̱ye.