49
Bighambo bya Yakobbo byokumaliilila
1 Du̱mbi̱ Yakobbo aabilikila batabani̱ be, aabaghambila ati, “Mwegumbaani̱ye hamui, niikuwo mbaghambile ebikughenda kubʼo mu bilo bya mu maaso.
2 “Mwise mugumbaane hani,
enu̱we baana banje,
mu̱ntegheeleli̱ye si̱ye eseenu̱we.
3 “Uwe Leu̱bbeeni̱,
niiwe mu̱li̱ghaaso ghwanje, maani̱ ghanje,
kaakulolelʼo kaa maani̱ ghanje,
wa ki̱ti̱i̱ni̱sa kandi wamaani̱ mu baana banje boona.
4 Bhaatu waaghu̱lu̱ki̱ye mutaano ghwawe nga maasi ghaasuuye.
Toolitodha kuba na ki̱ti̱i̱ni̱sa,
nanga waahali̱i̱ye ku̱ni̱i̱na haa bulili bwa so waawe,
waalaala na mukali̱ wee.
5 “Si̱mi̱yooni̱ na Leevi̱ ni bamui,
baku̱koleesi̱yagha bihiyo byabo kwita.
6 Tankuhanuula nabo,
kedha kulungana nabo mu mpanuula syabo,
nanga obu baakwatu̱u̱we ki̱i̱ni̱gha, baata bantu
kandi baalamali̱ya nte batali na kighendeleluwa.
7 Ki̱i̱ni̱gha kisaakaaye kitiyo kikiinuwe,
nanga ni kibhi.
Nkubalalangi̱ya mu baasukulu baa Yakobbo,
na mu baasukulu baa I̱saaleeli̱.
8 “Yu̱da, baghenji̱ baawe balaku̱ku̱ghi̱jagha.
Olasi̱ngu̱lagha bananji̱ghu̱wa baawe,
na baghenji̱ baawe balateeli̱yagha mu maaso ghaawe.
9 Yu̱da, oli nga ntale eeti̱ye kisolo.
Ekaakuukutagha elangaala yeenanula,
taaliyo oghu akugubha kughitalabani̱ja.
10 Mwi̱gho ghwa bukama taghu̱li̱lu̱gha mu ka ya Yu̱da,
na baasukulu baawe balabaagha balemi̱ bilo nʼebilo.
Bantu baa mu ntu̱la sinji balakuleetelagha bisembo
kandi balakugombelagha kukutaamu ki̱ti̱i̱ni̱sa.
11 Olabohagha ndogooi̱ yee haa kiti kya mujaabbi̱i̱bbu̱,
obohe kyana kya ndogooi̱ yaawe haa mujaabbi̱i̱bbu̱ ghusemeeye.
Olanaabi̱yagha ngoye syawe na vi̱i̱ni̱
kandi nkanji̱ yaawe olaghinaabi̱yagha na nsandi,
nsandi mutuku elu̱ghi̱ye mu bi̱ghu̱ma bya mi̱jaabbi̱i̱bbu̱.
12 Maaso ghaawe ghatukuuye kusaali̱ya vi̱i̱ni̱
kandi maano ghaawe ni ghajelu dhiyo kusaali̱ya mata.
13 “Jabbu̱looni̱ eye alaakalagha haa ki̱si̱yo kya nanja
kandi ewe niiyo maati̱ aghaku̱lu̱gha mu nanja, ghaleemililagha.
Mitaano yee elyesu̱kana ku̱hi̱ki̱ya Si̱dooni̱.
14 “I̱sakaali ali nga ndogooi̱ yamaani̱,
eghi elangaaye haagati ya nku̱mba syayo.
15 Alimanya ati hambali ahuumuliiye hasemeeye
kandi abone kyalo kyabo ki̱mu̱dheedhi̱ye.
Bhaatu aliheeka nku̱mba si̱lyoti̱ye haa mughongo,
bamuhambi̱li̱je kukolela banji.
16 “Daani̱ aliba mu̱lemi̱ wa bantu be.
Alilema bantu nga ntu̱la sinji sya I̱saaleeli̱.
17 Daani̱ oghu aliba nga njoka ya buseguwe,
eghi ekwebi̱si̱li̱lagha nkai̱na,
haakpengbu̱ ya kihanda eghikonde,
niikuwo mu̱ni̱i̱ni wayo eegenge.
18 “Mukama, ndindiliiye kujuna kwawe!
19 “Gaadi̱, bananji̱ghu̱wa balikwegimba,
bhaatu naawe olilwana nabo kandi obasi̱ngu̱le.
20 “Aseli̱ alaliyagha byokuliya bisemeeye,
alahaagha byokuliya ebibhonganuuwe kuliibuwagha bakama.
21 “Nafutaali akuba nga nsama ekwete kubunga-bunga
kandi eghi eku̱byalagha byana bisemeeye.
22 “Yojeefu̱ ali nga kiti kya mujaabbi̱i̱bbu̱,
kiti ekili haa kyambu.
Kikwanaghamu bi̱ghu̱ma bikani̱ye,
bitai byakiyo bi̱ku̱ni̱i̱nagha haa kisiika.
23 Bananji̱ghu̱wa be balimwegimba basaakaaye,
bamubhasuulile bimala, bamu̱bu̱li̱ye bu̱si̱nge.
24 Bhaatu aakale anali wamaani̱,
mikono yee yaakala enagu̱mi̱ye,
nanga Luhanga wa Bu̱toki̱ Bwona wa Yakobbo,
Mu̱li̱i̱si̱ya kandi Mu̱li̱ndi̱ wa I̱saaleeli̱,
aliikala amukwatiliiye.
25 Nanga niiye Luhanga wa so waawe oghu alakukoonelagha.
Nanga niiye Luhanga wa Bu̱toki̱ Bwona oghu alakuhaagha mu̱gi̱sa,
mu̱gi̱sa ghwa mu eghulu,
mu̱gi̱sa mu etaka lyawe,
mu̱gi̱sa ghwa lu̱byalo lwawe na lwa bisolo byawe.
26 Mu̱gi̱sa ndimakusabila Luhanga kukuha ghukaniiye kimui,
ghukani̱ye kusaali̱ya myena eghi eli hani bilo nʼebilo.
Mu̱gi̱sa oghu ghukuukalʼo, uwe Yojeefu̱,
nanga nuuwe mwebembeli̱ wa baghenji̱ baawe.
27 “Bbenjami̱i̱ni̱ oli mwaga ghusaakaliiye kimui.
Nkyambisi ghukuliyagha kisolo eki ghwati̱ye
kandi lwagholo ghutwala bintu byakiyo.”
28 Bani boona ni ntu̱la eku̱mi̱ nʼebili sya I̱saaleeli̱. Kandi bini niibiyo esebo aabaghambiiye, aabaha mu̱gi̱sa kandi naaghambila bu̱li̱ muntu ebibhonganuuwe kumubʼo.
Ku̱ku̱wa kwa Yakobbo
29 Du̱mbi̱ Yakobbo aabalaghila ati, “Ndi haai ku̱ku̱wa! Ninaaku̱u̱ye, munjiike hambali baaji̱i̱ki̱ye tita hamui na baataata, mu ki̱i̱na kyʼebaale, mu musili oghwali ghuli ghwa Efu̱looni̱ Mu̱hi̱tahi̱ti̱. 30 Ki̱i̱na eki kili e Macepela haai na Mami̱le munsi ya Kanaani̱. Ebbulahi̱mu̱ akakighula na Efu̱looni̱ Mu̱hi̱tahi̱ti̱ kuba ki̱i̱kalo kya kujiikamu. 31 Mu ki̱i̱na omu, niiho Ebbulahi̱mu̱ na mukali̱ wee Saala baaji̱i̱ki̱i̱we. I̱saka na mukali̱ wee Lebbeeka, nabo dhee niiho baaji̱i̱ki̱i̱we. Kandi niiho naaji̱i̱ki̱ye mukali̱ wanje Leei̱ya. 32 Ki̱i̱na hamui na musili oghu, Ebbulahi̱mu̱ akabighula ku̱lu̱gha mu Bahi̱ti̱.” 33 Obu Yakobbo aamali̱ye kulaghikiilila batabani̱ be, aalangala haa bulili buwe, du̱mbi̱ aatwi̱kana.