4
Kuhuumula kwa bahi̱ki̱li̱ja
1 Nahabweki, ngoku kulaghi̱i̱sani̱ya oku Luhanga aalaghi̱i̱sani̱i̱ye kutaaha mu ki̱i̱kalo kiye kya kuhuumula kunaliyo, twelinde hatabʼo nʼomui mu enu̱we oghu aasaghuwa ku̱hi̱ka mu kuhuumula oku. 2 Nanga naatu dhee bakatutebeja makulu ghasemeeye, ngoku nabo baabatebi̱i̱je gho, bhaatu makulu agha baaghu̱u̱ye agha taghabaghasiiye, nanga abaaghaaghu̱u̱ye aba tabaaghahi̱ki̱li̱i̱je. 3 Hatiini etu̱we abaamali̱ye ku̱hi̱ki̱li̱ja tukugubha kutaaha mu ki̱i̱kalo kya kuhuumula eki, nanga Luhanga akaghila ati,
“Niikiyo kyaleki̱ye naalahila ndi na ki̱i̱ni̱gha nti,
‘Tabalitaaha mu ki̱i̱kalo kyanje kya kuhuumula.’ ”*4:3 Jabbu̱li̱ 95:11
Kandi kuni mulimo ghuwe ghwa kuhanga ghukaba ngwahooye obu aahangi̱ye nsi. 4 Nanga haliyo mu byahandi̱i̱ku̱u̱we hambali abu̱ghi̱yʼo kilo kyamusanju̱ ati, “Kandi Luhanga aahuumula milimo yee yoona haa kilo kyamusanju̱.”*4:4 Kubanja 2:2 5 Kandi dhee mu ki̱twi̱ke tu̱ku̱lu̱ghʼo, Luhanga aaghila ati, “Tabalitaaha mu ki̱i̱kalo kyanje kya kuhuumula.”
6 Kinali dhee ngu bamui balitaaha mu ki̱i̱kalo kya kuhuumula eki, bhaatu bamui mu baadu̱bhi̱ye ku̱u̱ghu̱wa makulu ghasemeeye agha, tabalitaahamu nanga ebo bakaghaya Luhanga. 7 Nahabweki Luhanga akatodha aatʼo kilo kinji, aakighilamu Obwalo, eki kikabʼo bwile bukani̱ye mbwasaaye obu aabu̱ghi̱ye kukwamila mu Mukama Dhau̱dhi̱ ngoku Luhanga aali asangu̱u̱we abu̱ghi̱ye naaghila ati,
“Obwalo, nimwanaaghu̱u̱ye elaka liye,
mutatimbiikani̱ya mitima yaanu.”*4:7 Jabbu̱li̱ 95:7, 8
8 Nanga nguli baatu̱ngi̱ye ki̱i̱kalo kya kuhuumula eki mu bwile obu Yosuha aabaaghʼo, Luhanga tangubaaye abu̱ghi̱yʼo kilo kinji bbaa. 9 Nahabweki endindi hanaliyo kilo kyambaghani̱ja kya kuhuumula kya bantu baa Luhanga;*4:9 Mu Lu̱gi̱li̱ki̱ baghambi̱ye bati kilo kya Sabhato kya kuhuumula. 10 nanga weena oghu akutaahagha mu ki̱i̱kalo kya Luhanga kya kuhuumula, akuhuumulagha milimo yee ngoku na Luhanga aahuumuuye. 11 Nahabweki tuteelʼo kimui ku̱lu̱ na nkokolo kutaaha mu ki̱i̱kalo kya kuhuumula eki, niikuwo hatabʼo nʼomui oghu aasaghuwa kutaaha yo haabwa kughaya Luhanga ngoku ebo baakoli̱ye.
12 Nanga kighambo kya Luhanga kili na bwomi̱i̱li̱ kandi kikukolagha na maani̱. Kyoghiiye kusaali̱ya kihiyo kiinamu̱li̱to kya mooghi abili, kikutaahilagha kimui mu byeli̱li̱kano byatu nʼebi tukubbalagha kukola. Ti̱ kyolekela kimui ngoku tuli.†4:12 Mu Lu̱gi̱li̱ki̱ baghambi̱ye bati kikujombelagha kimui haagati mu mutima na mu mwoyo, ngingo na musango; kandi ku̱twi̱la musango byeli̱li̱kano bya muntu na mitwalikani̱ye ya mutima ghuwe. 13 Taaliyo kintu kyona eki Luhanga aahangi̱ye eki bamu̱bi̱si̱li̱i̱ye kutabona. Bu̱li̱ kintu ki̱su̱u̱ku̱u̱we kandi kyaboneka bbeni̱-bbeni̱ mu maaso ghe, oghu tulyetonganʼo ewe.
Yesu mukulu wa bahongi̱
14 Nahabweki ngoku etu̱we tuli na Yesu Mwana wa Luhanga mukulu wa bahongi̱ boona, oghu akaghenda mu eghulu, tuteelʼo kimui ku̱lu̱ na nkokolo ku̱mu̱hi̱ki̱li̱ja. 15 Nanga etu̱we tuli na mukulu waatu wa bahongi̱ boona, oghu akugubha kutukoonela mu buceke bwatu, nanga eye akoohebuwa mu milingo yoona ngʼatu, bhaatu ataasi̱i̱sa. 16 Nahabweki tukwebinga haa ntebe ya bukama ya Mukama waatu wa ngughuma oghu tu̱gu̱mi̱ye, niikuwo atughilile kisa kandi ngughuma, atukoonele mu bwile bwona obu tukwetaaghisibuwa kutukoonela.
*4:3 4:3 Jabbu̱li̱ 95:11
*4:4 4:4 Kubanja 2:2
*4:7 4:7 Jabbu̱li̱ 95:7, 8
*4:9 4:9 Mu Lu̱gi̱li̱ki̱ baghambi̱ye bati kilo kya Sabhato kya kuhuumula.
†4:12 4:12 Mu Lu̱gi̱li̱ki̱ baghambi̱ye bati kikujombelagha kimui haagati mu mutima na mu mwoyo, ngingo na musango; kandi ku̱twi̱la musango byeli̱li̱kano bya muntu na mitwalikani̱ye ya mutima ghuwe.