8
Yesu niiye mukulu waatu wa bahongi̱
1 Kikulu kyʼebi tukwete ku̱bu̱gha ni ngu: Tuli na Mukulu wa bahongi̱ boona, oghu asitami̱ye haa luhande lwa mukono ghwabuliyo ghwa ntebe ya bukama ya Luhanga wa ki̱ti̱i̱ni̱sa mu eghulu. 2 Niiye aku̱heeleli̱yagha mu Kisiika Ki̱hi̱ki̱li̱i̱ye mu weema yoonini yamajima elukwela ya kulami̱li̱yamu eghi Mukama eenini akweye eghi etakwehuwe ngʼeghi Musa aakweye.
3 Bu̱li̱ mukulu wa bahongi̱ boona bakumukomagha kuhonga bisembo na bihonguwa. Nahabweki Ki̱li̱si̱to naye dhee eetaaghisibuwagha kuba nʼeki akuhonga. 4 Nguli aabaagha ali hansi hani tangubaaye mu̱hongi̱ nanga hani haliyo bantu abakuhongagha bisembo ebi bilaghilo bilaghiiye. 5 Baku̱heeleli̱yagha mu Kisiika Ki̱hi̱ki̱li̱i̱ye kandi kisasani̱ ekyolekagha ekili mu eghulu. Niikiyo kyaleki̱ye obu Musa aabaagha neeteekani̱ja kukwela weema ya kulami̱li̱yamu, Luhanga aamuteelelela ati, “Olole ngu bu̱li̱ kintu waaki̱koli̱ye kusighikila haa ndaghikiililo eghi naakwoleki̱ye obu waabaagha haa mwena.”*8:5 Ku̱lu̱gha 25:40 6 Bhaatu bu̱heeleli̱ya bwa Ki̱li̱si̱to busaahi̱ye bwa bahongi̱ baa hambele aba, kandi ndaghaano eghi eye alimu nga mulungani̱ya haagati ya Luhanga na bantu nayo esaai̱ye ya hambele, kandi ebi Luhanga aalaghi̱i̱sani̱i̱ye mu ndaghaano eghi bisaahi̱yʼo.
7 Nanga nguli ndaghaano yʼoku̱du̱bha eghi etaabaaye nʼeki̱ghi̱sobi̱yemu, tangwetaaghi̱si̱bu̱u̱we kubʼo ndaghaano yaakabili eghi ekukoluwa. 8 Bhaatu Luhanga akabonamu bantu nsobi̱ du̱mbi̱ aaghila ati,
“Mukama aaghila ati, bwile buliisa,
obu nkukola ndaghaano mpyaka
na bantu baa I̱saaleeli̱
na bantu baa Yu̱da.
9 Teekuba nga ndaghaano
eghi naakoli̱ye na baataata baabo
obu naabahikiiye
kubaaya munsi ya Mi̱si̱li̱.
Mukama aaghila ati, haabwabo kutaakala baneesi̱ghi̱ye ndaghaano yanje,
kikaleka naabalu̱ghʼo.
10 Mukama aaghila ati, eni niiyo ndaghaano
nkukola na bantu baa I̱saaleeli̱ mu bwile buliisa:
Nkuta bilaghilo byanje mu byeli̱li̱kano byabo
kandi mbihandiike haa mitima yabo.
Nkuba Luhanga wabo,
kandi nabo bakuba bantu banje.
11 Taakutodha kubʼo oghu akwegheesi̱ya muunakiye,
kedha muntu kughila muunakiye ati, ‘Omanye Mukama,’
nanga boona bakuba bamani̱ye si̱ye,
ku̱lu̱gha haa mwana ku̱hi̱ka haa mukulu oghu abalimu.
12 Kandi ndibaghanila bikoluwa byabo bi̱bhi̱i̱hi̱ye
ti̱ tanditodha kuusuka bibhi byabo bbaa.”*8:12 Yelemi̱ya 31:31-34
13 Luhanga kughila ati ndaghaano eghi ni “mpyaka” akooleka ngoku eyʼoku̱du̱bha yaakaakuuye, kandi ekinakukaakula kikubaagha kili haai kuhuwʼo.