5
Kilimbo kya Debbola na Bbalaka
1 Haa kilo eki Debbola na Bbalaka mutabani̱ wa Abbinowaamu baalimba kilimbo kini:
2 Musinde Mukama!
Obu beebembeli̱ baa Banai̱saaleeli̱ baahikiiye kulwana,
bantu beehaayo haabwa kubbala kwabo.
3 Mu̱u̱ghu̱we enu̱we bakama
kandi mu̱tegheeleli̱ye enu̱we balemi̱!
Si̱ye nkulimbila Mukama,
nkusinda Mukama Luhanga wa I̱saaleeli̱.
4 Ai̱ Mukama, obu waalu̱ghi̱ye Seyi̱li̱,
nuwaalu̱gha mu kyalo kya Edomu,
nsi ekatukumila
kandi bicu byatooni̱ya mbu̱la.
5 Myena yaadhinga-dhinga mu maaso ghaa Mukama,
nankabha ghwa Si̱naai̱ ghwadhinga mu maaso ghaa Mukama, Luhanga wa I̱saaleeli̱.
6 Bwile obu Samugali̱, mutabani̱ wa Anati̱ aabaaghʼo,
na bwile obu Yayeli̱ aabaaghʼo,
bantu boobaagha kukwama mu nguudhe,
baakwamagha bihanda bya haakpengbu̱.
7 Bantu boobaagha kuukala mu mi̱bhi̱li̱ mu I̱saaleeli̱,
ku̱hi̱ki̱ya obu si̱ye Debbola naasi̱ye.
Naasa kuba nga ni̱na wa Banai̱saaleeli̱.
8 Obu Banai̱saaleeli̱ baatu̱u̱yemu kukwamilila baaluhanga banji,
bulemo bwatwi̱ka mu maatau̱ni̱ ghaabo.
Mu balwani̱ mitwalo enaa baa Banai̱saaleeli̱,
taabaayemu oghu ali na ngabo kedha eti̱mu̱.
9 Mutima ghwanje ghu̱dheedheeu̱we na bakulu baa mahe baa Banai̱saaleeli̱,
na bantu boona abeehaayeyo kulwana.
Mukama Asi̱i̱mu̱we.
10 Mu̱ki̱bu̱ghʼo enu̱we abakughendelagha haa ndogooi̱ sijelu,
enu̱we abakusitamagha haa kapeti̱ sisemeeye,
enu̱we abakulubhatangilagha mu luguudhe.
11 Mu̱u̱ghu̱we malaka ghaa bali̱mbi̱ abali mu bi̱i̱kalo ebili haai na maasi,
bakuukalagha mbabu̱ghʼo bu̱si̱ngu̱li̱ bu̱hi̱ki̱li̱i̱ye bwa Mukama,
bu̱si̱ngu̱li̱ bu̱hi̱ki̱li̱i̱ye bwa bantu be Banai̱saaleeli̱.
Bantu baa Mukama baaghenda
haa maageeti̱ ghaa maatau̱ni̱ ghaabo.
12 Osu̱su̱mu̱ke, osu̱su̱mu̱ke uwe Debbola!
Osu̱su̱mu̱ke, osu̱su̱mu̱ke, olimbe!
Uwe Bbalaka mutabani̱ wa Abbinowaamu,
oomuke ohikile banyankomo baawe.
13 Bantu abaati̱ghaayʼo baakota hambali beebembeli̱ baabo bali.
Bantu baa Mukama aba baasa nanje haa bulemo,
kulwana na ngi̱ghu̱ syabo syamaani̱.
14 Bantu baalu̱gha mu ntu̱la ya Efulahi̱mu̱ baakota mu kighona.
Baghenda bakweme uwe Bbenjami̱i̱ni̱ na bantu baa ntu̱la yaawe.
Bakulu baa mahe baalu̱gha mu ntu̱la ya Maki̱li̱,
bantu baalu̱gha mu ntu̱la ya Jabbu̱looni̱ abaakwatagha mwi̱gho ghwa mukulu wa mahe.
15 Beebembeli̱ bʼomu ntu̱la ya I̱sakaali baasa na Debbola
kandi bantu baabo baakwama Bbalaka haa bulemo mu kighona.
Bhaatu bantu bʼomu ntu̱la ya Leu̱bbeeni̱
bakaba bali na kughuluka-ghu̱lu̱ki̱ya kwamaani̱ haa mitima yabo,
nahabweki bataaghenda kukoonela baanakyabo.
16 Nkiki kyaleki̱ye baati̱ghala ku̱li̱i̱si̱ya ntaama syabo
kandi ku̱tegheeleli̱ya abakwete kuteela lwoha kubilikila ntaama syabo?
Bantu bʼomu ntu̱la ya Leu̱bbeeni̱
bakaba bali na kughuluka-ghu̱lu̱ki̱ya kwamaani̱ haa mitima yabo.
17 Bantu bʼomu kyalo kya Gi̱li̱yaadi̱ baati̱ghala bu̱lu̱gha ejooba bwa maasi Yolodaani̱.
Bantu baa ntu̱la ya Daani̱ nabo dhee baati̱ghala haai na maati̱ ghaabo.
Bantu baa ntu̱la ya Aseli̱ baati̱ghala mu maka ghaabo haa ki̱si̱yo kya nanja.
18 Bantu baa ntu̱la ya Jabbu̱looni̱ na Nafutaali,
baahaayo bwomi̱i̱li̱ bwabo ku̱kwi̱la haa ki̱i̱kalo kya kulwanilamu.
19 Bakama baa Kanaani̱ baasa kulwana naatu,
baalwanila e Tanaki̱ haai na maasi Mi̱gi̱do,
bhaatu tabali na siliva baatwete.
20 Nsooli̱ya syalu̱gha mu mwanya kandi syalwana.
Obu syalu̱ghagha mu bi̱i̱kalo byasiyo, syalwana na Si̱sela.
21 Maasi ghaa Ki̱sooni̱ ghaasula
kandi ghaabasendi̱ya boona.
Mwoyo ghwanje weeyongele kuguma.
22 Nkai̱na syasa nsi̱li̱gi̱ta,
si̱kpeeti̱ye haa etaka na bikaato byasiyo.
23 Malai̱ka wa Mukama aaghila ati, “Mukiine kibugha kya Meloji̱.
Mukiine kwonini bantu abaakaayemu,
nanga tabaasi̱ye kukoonela Mukama,
kumukoonela obu aalwani̱i̱si̱yagha balwani̱ baamaani̱.”
24 Yayeli̱ mukali̱ wa Hebbeli̱ Munakeeni̱ ali na mu̱gi̱sa,
kusaali̱ya bakali̱ banji abakuukalagha mu weema.
25 Si̱sela aasaba maasi, bhaatu Yayeli̱ aamuha mata,
aamuleetelagho mu bbaaku̱li̱ esemeeye.
26 Yayeli̱ aakwata nkondo ya weema
kandi aakwata nondo mu mukono ghuwe ghwabuliyo.
Aatu̱bhi̱ta Si̱sela nkondo eghi mu mutuwe,
aamwati̱ya kahanga kandi aamukpeetagula mutuwe na nondo eghi.
27 Maani̱ ghaamuhuwa eegenga mu maghulu ghaa Yayeli̱,
aakalʼo ataagubha ku̱lu̱ghʼo
hambali eegengi̱ye niiyo aakwi̱li̱i̱ye.
28 “Ni̱na wa Si̱sela aalola enja,
kusaalila mu di̱li̱sa.
Aaghila ati, ‘Kigaali̱ ani̱i̱ni̱ye kyakeesekeleeu̱we ku̱ki̱dha nangaaki?
Nkiki ki̱leki̱ye ntaaghu̱wa elaka lya bigaali̱ biye?’
29 Bakali̱ baa magheji baamukuukamu,
eki eenini eeli̱li̱kanagha bati,
30 ‘Bakugubha kuba mbatambulana bintu ebi baahu̱ngi̱ye haa bulemo.
Bu̱li̱ muusilikale kutwala mukali̱ omui kedha babili.
Si̱sela kutwala biigandulo bisemeeye
kandi si̱ye kundeetela ngoye sisemeeye kwonini.’ ”
31 “Ai̱ Mukama ngi̱ghu̱ syawe syona sihwelekeelele nga Si̱sela!
Bhaatu abaku̱ku̱ndi̱ye babe nga musana ghwamaani̱ oghukwete kutuwa.”
Nsi ya I̱saaleeli̱ yaatunga bu̱si̱nge haabwa myaka maku̱mi̱ anaa.