1 Obu bilo byasaayʼo, mu bwile obu bantu baakesagha ngano, Samu̱sooni̱ aaghenda kulola mukali̱ wee kandi aamutwalila mbu̱li̱ eghi enali ya bwana. Aabbalagha kulangaala na mukali̱ wee, bhaatu nkyame si̱ye aabhenga ati atataaha mu kisiika kya mukali̱ wee.

2 Aaghila Samu̱sooni̱ ati, “Nkakimanya ngoku woohi̱ye muhala wanje, du̱mbi̱ naamuha bhootu̱ syawe kumuswela. Buuye muto wee taasemeeye kumusaali̱ya? Gutu oswele oghu.”

3 Samu̱sooni̱ aaghila ati, “Bwile buni enu̱we Bafi̱li̱si̱ti̱ tamukunyegheelela nkaakubakolʼo kabhi.”

4 Samu̱sooni̱ aaghenda aakwata mbuwa syʼomu kisaka bi̱ku̱mi̱ bisatu. Aaboheesani̱ya ebili mikila, aaboha biitaabbu̱ bili nga toci̱ haa mikila eghi aaboheesani̱i̱ye. 5 Du̱mbi̱ aatu̱mi̱ka mulilo haa maatoci̱ haala kandi aasindika mbuwa esi syali̱gi̱ta mu misili ya ngano ya Bafi̱li̱si̱ti̱. Ooki̱ya bibha bya ngano yabo yoona eghi baali mbaakesi̱ye nʼeghi batakakesi̱ye. Aahwelekeeleli̱ya dhee misili yabo ya mi̱jaabbi̱i̱bbu̱ na biti oli̱va. 6 Niibuwo Bafi̱li̱si̱ti̱ baaghi̱li̱ye bati, “Ni ani̱ aakoli̱ye kini?” Baaghila bati, “Oghu ni Samu̱sooni̱ wʼomu kibugha kya Timuna, nanga nkyame siye akaha mukali̱ wa Samu̱sooni̱ bhootu̱ sya Samu̱sooni̱.” Du̱mbi̱ Bafi̱li̱si̱ti̱ aba baaghenda booki̱ya mukali̱ oghu na ka ya ese wee.

7 Samu̱sooni̱ aaghila ati, “Mukaakuba haaliikuwo mukukolagha, naalahila ngoku ntaakuhuumula, ku̱hi̱ki̱ya mbakoli̱ye kubhi ngoku mwankoli̱ye kubhi.” 8 Aabalu̱mba na maani̱ kandi aabaatamu bantu bakani̱ye, du̱mbi̱ aaghenda aakala mu ki̱i̱na kya kikuka kya Etamu.

9 Bafi̱li̱si̱ti̱ baasa kandi baaghoona mu nsi ya Yu̱da haai na kibugha kya Leehi̱. 10 Basaasa bʼomu ntu̱la ya Yu̱da baababu̱u̱li̱ya bati, “Mwasi̱ye kulwana naatu nangaaki?”

Baabakuukamu bati, “Twasi̱ye kuboha Samu̱sooni̱, kumukola ngoku aatu̱koli̱ye.”

11 Basaasa bi̱ku̱mi̱ bisatu bʼomu ntu̱la ya Yu̱da baaghenda mu ki̱i̱na kyʼomu kikuka kyʼomu Etamu, baaghila Samu̱sooni̱ bati, “Toomani̱ye ngoku Bafi̱li̱si̱ti̱ aaniibo batu̱lemi̱ye? Waatu̱koli̱ye eki nangaaki?”

Aabakuukamu ati, “Naakoli̱ye Bafi̱li̱si̱ti̱ eki bankoli̱ye.”

12 Baamughila bati, “Twasi̱ye kukuboha kandi tukukuhaayo mu Bafi̱li̱si̱ti̱.”

Samu̱sooni̱ aabaghila ati, “Mulahile ewanje ngoku mutaakunjita.”

13 Baaghila bati, “Tatukukwita, bhaatu tukukuboha, tukuheyo mu Bafi̱li̱si̱ti̱.” Du̱mbi̱ baamuboha na mighuwo ebili mpyaka kandi baamuuya mu kikuka eki.

14 Obu aahi̱ki̱ye haai na kibugha kya Leehi̱, Bafi̱li̱si̱ti̱ baasa kumusangaana mbagugangana. Mwoyo wa Mukama aamwisʼo kandi aamuha maani̱, mighuwo na mpi̱ngo bamu̱bohi̱ye haa mikono byalaghalika nga bi̱si̱ngo. 15 Aabona lusaya lubisi lwa ndogooi̱, aananula mukono ghuwe aalukwata, alu̱koleesi̱ya kwita basaasa lu̱ku̱mi̱. 16 Samu̱sooni̱ aaghila ati,

18 Samu̱sooni̱ eliyo lyamukwata. Aasaba Mukama ati, “Wankooneye naasi̱ngu̱la bulemo bwamaani̱. Buuye okuleka eliyo linjite kandi osi̱i̱mi̱lani̱ye bantu aba batasali̱ye kwisa kunkwata?” 19 Luhanga aaghulʼo ki̱i̱na haai na kibugha kya Leehi̱ kandi kyalu̱ghamu maasi. Samu̱sooni̱ aaghanuwa kandi aatodha aatunga maani̱. Maasi agha baaghaluka li̱i̱na Eni-hakole, ku̱hi̱ki̱ya endindi ghanali mu kibugha kya Leehi̱.

20 Samu̱sooni̱ aatwi̱la Banai̱saaleeli̱ misango haabwa myaka maku̱mi̱ abili, mu bwile obu Bafi̱li̱si̱ti̱ baabaagha balemi̱ye Banai̱saaleeli̱.