4
Yona naakwatuwa ki̱i̱ni̱gha haabwa kisa kya Mukama
1 Obu Mukama ataahwelekeleei̱ye bantu baa Ni̱neeva, kintu eki kyatamila kimui Yona, du̱mbi̱ aakwatuwa ki̱i̱ni̱gha. 2 Mu kusaba kuwe aaghila ati, “Buuye Mukama, tanaaki̱bu̱ghi̱ye ntakalu̱ghi̱ye e ka? Eki niikiyo kyali ki̱leki̱ye ni̱i̱lu̱ki̱ye ngendi̱ye Talasi̱i̱si̱! Nanga nkamanya ngoku oli Luhanga wa kisa kandi wa ngughuma. Tookusaaliluwagha bwangu-bwangu kandi kukunda kwawe takukuhuwaghʼo. Nkamanya ngoku okugubha kuhindula ntegheka yaawe kutahwelekeeleli̱ya bantu bani. 3 Mukama, si̱ye onjiye haa musana, hakili nku̱we kisaai̱ye kuukalʼo.”
4 Mukama aamukuukamu ati, “Ohi̱ki̱i̱ye kukwatuwa ki̱i̱ni̱gha otiyo?”
5 Niibuwo Yona aaghendi̱ye haakpengbu̱ ya bu̱lu̱gha ejooba bwa kibugha eki. Eekwelelayo kajalaja. Aakasitamamu kwehighama musana, analindiliiye ekilabʼo bantu baa Ni̱neeva. 6 Niibuwo Mukama Luhanga aateekani̱i̱ye kilandilo*4:6Kilandilo: Bantu banji bakukighilaghamu kilandila. kutuwʼo kuha Yona ki̱i̱ku̱dhu̱. Kyatuwʼo, kyalandila haa kajalaja aka, kyamuha ki̱i̱ku̱dhu̱ ku̱mu̱hu̱u̱mu̱li̱ya. Nahabweki Yona aadheedheluwa kimui haabwa kilandilo eki.
7 Bhaatu nkyambisi cu̱i̱-cu̱i̱, Luhanga aateekani̱ya kiisoko, kyasa kyasenga kilandilo eki, du̱mbi̱ kilandilo eki kyoma. 8 Obu musana ghwatooye, ghwababiilila Yona haa mutuwe eghulu. Niibuwo Luhanga aateekani̱i̱ye mwegha ghwalu̱gha bu̱lu̱gha ejooba kuleetela Yona kituumo kihingulaane, aabbala kusalika. Eekumbula mu mutima ghuwe ghwona ku̱ku̱wa. Aaghila ati, “Ku̱ku̱wa kusaai̱ye kuukalʼo.”
9 Bhaatu Luhanga aamu̱bu̱u̱li̱ya ati, “Ohi̱ki̱i̱ye kukwatuwa ki̱i̱ni̱gha haabwa kilandilo eki kwoma?” Yona aamukuukamu ati, “Ee, ni̱hi̱ki̱i̱ye kukwatuwa ki̱i̱ni̱gha kandi nkwekumbula hakili nku̱we!”
10 Du̱mbi̱ Mukama aaghila Yona ati, “Otegheeleli̱ye, uwe waafuuyʼo munu kilandilo eki. Taanuuwe waaki̱heli̱ye kandi toomani̱ye ngoku kyatooye. Kyatweleeye kilo kimui, kyakwi̱la kilo kimui. 11 Ololeeni, Ni̱neeva ni kibugha kiinamu̱li̱to kandi kilimu bantu basaaye mitwalo eku̱mi̱ nʼebili, hamui na bitunguwa byabo bikani̱ye. Bantu aba tabamani̱ye mbaghani̱ja ya kibhi na kilungi.†4:11 Mu Luhebbulaayo kihandi̱i̱ku̱u̱we ngu, Bantu aba tabamani̱ye mbaghani̱ja ya mukono ghwabo ghwabuliyo na ghwabumesu. Nanje, buuye tanibhonganuuwe kufuwʼo bantu baa Ni̱neeva aba?”