1 Kaluulu kaakabili kaaba kaa ntu̱la ya Si̱mi̱yooni̱, kusighikila haa ntu̱la syabo. Kyalo baabahaaye nga bugwetuwa kikaba kili haagati ya kyalo eki baahaaye ntu̱la ya Yu̱da nga bugwetuwa. 2 Kyalo eki baabahaaye nga bugwetuwa kikaba kilimu: Bbeli̱seba, Sebba, Molada 3 Hajala-suwali̱, Bbaala, Ejemu, 4 Elitolaadi̱, Bbetu̱li̱, Holu̱ma, 5 Jikilagi̱, Bbeti̱-makabboti̱, Hajala-susa, 6 Bbeti̱-lebboyati̱ na Salu̱heni̱, byona bikaba bili bibugha eku̱mi̱ na bisatu na mi̱bhi̱li̱ yabiyo. 7 Kikaba kilimu dhee Ayi̱ni̱, Li̱mooni̱, Eteli̱ na Asani̱, byona bikaba bili bibugha bbinaa na mi̱bhi̱li̱ yabiyo. 8 Kikaba kilimu mi̱bhi̱li̱ yoona eghi yeeli̱ghi̱li̱li̱i̱ye bibugha ebi ku̱hi̱ka Bbalati̱-bbeeli̱, Laama mu kyalo kya Negeebbu. Obu niibuwo bugwetuwa obu baahaaye ntu̱la ya Si̱mi̱yooni̱ kusighikila haa ntu̱la syabo. 9 Kyalo eki baahaaye ntu̱la ya Yu̱da nga bugwetuwa kikaba kikaniiye kimui, nahabweki baayʼo ki̱twi̱ke kya kyalo eki, baakiha ntu̱la ya Si̱mi̱yooni̱. Nahabweki ntu̱la ya Si̱mi̱yooni̱ yaatunga kyalo nga bugwetuwa haagati ya kyalo kya ntu̱la ya Yu̱da.

10 Kaluulu kaakasatu kaaba kaa ntu̱la ya Jabbu̱looni̱, kusighikila haa ntu̱la syabo. Mutaano ghwa kyalo baabahaaye nga bugwetuwa ghwahi̱ka Sali̱di̱. 11 Mutaano ghwabo ghwaghenda bughuwa ejooba, ghwasaalila Malala, ghwahi̱ka Dabbeseeti̱ kandi ghwahi̱ka mu kighona kya bu̱lu̱gha ejooba bwa Yokinaamu. 12 Mutaano oghu ghwalu̱gha Sali̱di̱ ghwaghenda haa luhande lunji lwa bu̱lu̱gha ejooba, ghwahi̱ka haa mutaano ghwa Ki̱si̱looti̱-tabbola, ghwalu̱gha haala ghwaghenda Dabbelaati̱ ghwakoma kandi ghwahi̱ka Yafi̱ya. 13 Ku̱lu̱gha haala, ghwasaalila bu̱lu̱gha ejooba ghwahi̱ka Gati̱-hefeeli̱, ghwaghenda ghwahi̱ka Eti̱-kaji̱i̱ni̱, ghwahi̱ka Li̱mooni̱, ghwegaali̱ya ghwaghenda mu kibugha kya Neeya. 14 Mutaano ghwabo ghwa elughulu ghwasaalila haai na kibugha kya Hanatooni̱, ghwakuukila mu kighona kya I̱fu̱teeli̱. 15 Kyalo kyabo kikaba kilimu: Katati̱, Nahalaali̱, Si̱mu̱looni̱, I̱dala na Bbeteleheemu, byona bikaba bili bibugha eku̱mi̱ na bibili na mi̱bhi̱li̱ yabiyo. 16 Obu niibuwo bugwetuwa bwa nsi eghi ntu̱la ya Jabbu̱looni̱ yaatu̱ngi̱ye, kusighikila haa ntu̱la syabo, otaayemu bibugha ebi na mi̱bhi̱li̱ yabiyo.

17 Kaluulu kaakanaa kaaba kaa ntu̱la ya I̱sakaali, kusighikila haa ntu̱la syabo. 18 Kyalo kyabo kikaba kilimu: Yejeleeli̱, Kesu̱looti̱, Suneemu, 19 Hafalahi̱mu̱, Si̱yooni̱, Anakalaati̱, 20 Labbi̱ti̱, Ki̱si̱yooni̱, Ebbeeji̱, 21 Lemeti̱, Eni-gani̱i̱mu̱, Eni̱-hada, Bbeti̱-pajeji̱. 22 Mutaano ghwabo ghwahi̱ka Tabbola, Sahajumaali̱, Bbeti̱-semesi̱ kandi ghwakuukila haa maasi Yolodaani̱, byona bikaba bili bibugha eku̱mi̱ na mukaagha na mi̱bhi̱li̱ yabiyo. 23 Obu niibuwo bugwetuwa bwa nsi obu ntu̱la ya I̱sakaali yaatu̱ngi̱ye kusighikila haa ntu̱la syabo, otaayemu bibugha ebi na mi̱bhi̱li̱ yabiyo.

24 Kaluulu kaakataano kaaba kaa ntu̱la ya Aseli̱, kusighikila haa ntu̱la syabo. 25 Kyalo kyabo kikaba kili na maatau̱ni̱ ghani: Helukaati̱, Hali̱, Bbeteeni̱ na Akisaafu, 26 Alameleeki̱, Amaadi̱ na Misaali̱. Mutaano ghwa bughuwa ejooba ghwahi̱ka Kalameeli̱ na Si̱hooli̱-li̱bbu̱nati̱. 27 Du̱mbi̱ ghwegaali̱ya bu̱lu̱gha ejooba, ghwaghenda Bbeti̱-dagooni̱, ghwahi̱ka haai na nsi ya Jabbu̱looni̱, ghwahi̱ka mu kighona kya I̱fu̱taheeli̱, ghwakoma elughulu mu kibugha kya Bbeti̱-emeki̱ ku̱hi̱ka Neyeli̱. Du̱mbi̱ ghweyongela kukoma elughulu ghwahi̱ka Kabu̱lu̱, 28 Hebbu̱looni̱, Lehobbu̱, Hamooni̱, Kana ku̱hi̱ka Si̱dooni̱ namu̱li̱to. 29 Du̱mbi̱ mutaano oghu ghwegaali̱ya kandi ghwaghenda Laama, ghwahi̱ka mu kibugha ekili na bigho bi̱gu̱mi̱ye kya Ti̱lo. Mutaano oghu ghwegaali̱ya kandi ghwaghenda Hosa, ghwahelela haa nanja. Kyalo eki kikaba kilimu dhee Mahalaabu̱, Aki̱ji̱bu̱, 30 U̱ma, Afeki̱ na Lehobbu̱, byona bikaba bili bibugha maku̱mi̱ abili na bibili na mi̱bhi̱li̱ yabiyo. 31 Obu niibuwo bugwetuwa bwa nsi obu ntu̱la ya Aseli̱ yaatu̱ngi̱ye, kusighikila haa ntu̱la syabo, otaayemu bibugha ebi na mi̱bhi̱li̱ yabiyo.

32 Kaluulu kaamukaagha kaaba kaa ntu̱la ya Nafutaali, kusighikila haa ntu̱la syabo. 33 Mutaano ghwabo ghwatandikila Helefu̱, haa Ki̱i̱looku̱ kyʼomu kyalo kya Jaanani̱i̱mu̱, ghwahi̱ka Adami̱-nekeebbu̱, Yabbu̱neeli̱, Laku̱mu̱ kandi ghwakuukila haa maasi Yolodaani̱. 34 Mutaano oghu ghwegaali̱ya bughuwa ejooba ghwahi̱ka Ajonoti̱-tabbola, ghwalu̱ghʼo kandi ghwahi̱ka Hu̱koki̱, ghwahi̱ka eku̱wa ya ntu̱la ya Jabbu̱looni̱ na Aseli̱, bughuwa ejooba bwa ntu̱la ya Yu̱da haa luhande lwa bu̱lu̱gha ejooba bwa Yolodaani̱. 35 Bibugha ebyabaaghamu na bigho bikangami̱ye ni: Ji̱di̱mu̱, Jeela, Hamati̱, Lakati̱, Ki̱neleti̱, 36 Adama, Laama, Hajooli̱, 37 Kedesi̱, Edeleeyi̱, Eni-hajooli̱, 38 Yi̱looni̱, Migidati̱-eeli̱, Holemu, Bbeti̱-anati̱ na Bbeti̱-semesi̱, byona bikaba bili bibugha eku̱mi̱ na mwenda na mi̱bhi̱li̱ yabiyo. 39 Obu niibuwo bugwetuwa bwa nsi eghi ntu̱la ya Nafutaali yaatu̱ngi̱ye, kusighikila haa ntu̱la syabo, otaayemu bibugha ebi na mi̱bhi̱li̱ yabiyo.

40 Kaluulu kaamusanju̱ kaaba kaa ntu̱la ya Daani̱, kusighikila haa ntu̱la syabo. 41 Kyalo kyabo kikaba kilimu: Joola, Esitawoli̱, I̱le-semeesi̱, 42 Saalabbi̱ni̱, Aiyalooni̱, I̱si̱la, 43 Elooni̱, Timuna, Eku̱looni̱, 44 Eli̱teke, Gi̱bbetooni̱, Bbaalati̱, 45 Jehu̱di̱, Bbene-bbelaaki̱, Gati̱-li̱mooni̱, 46 Meyalu̱kooni̱, Lakooni̱, na nsi eghi elolaane na kyalo ekilolaane na Yopa. 47 Obu bantu baa ntu̱la ya Daani̱ baasaaghu̱u̱we kuukala mu nsi yabo, baaghenda kulwana na bantu bʼomu kibugha kya Leseemu. Obu baamali̱ye kwita bantu bʼomu kibugha eki na kihiyo, baakitwala kandi baakalamu. Baakiluka li̱i̱na lya taata wabo Daani̱. 48 Obu niibuwo bugwetuwa bwa nsi obu ntu̱la ya Daani̱ yaatu̱ngi̱ye, kusighikila haa ntu̱la syabo, otaayemu bibugha ebi na mi̱bhi̱li̱ yabiyo.

49 Obu baamali̱ye kutambu̱li̱ya nsi eghi ntu̱la sya I̱saaleeli̱, baaha Yosuwa mutabani̱ waa Nu̱u̱ni̱ kyalo kukitwala. 50 Baaha Yosuwa eki aabasabi̱ye kusighikila ngoku Mukama aabalaghiiye. Baamuha kibugha kya Timunati̱-seela, kyʼomu kyalo kya bwena kya Efulahi̱mu̱. Aakwela buhyaka kibugha eki kandi aakiikalamu.

51 Mu̱hongi̱ Eli̱yeeja, Yosuwa mutabani̱ wa Nu̱u̱ni̱ na beebembeli̱ baa ntu̱la sya I̱saaleeli̱, baaha nsi eghi nga bugwetuwa ntu̱la sya I̱saaleeli̱ mbakoma buluulu hambali baghooneeye e Si̱i̱lo mu maaso ghaa Mukama, haa mulyango ghwa weema ya kusanga-sangaanamu. Bantu baa I̱saaleeli̱ niikuwo baamali̱ye batiyo kutambulana nsi eghi.