1 Mukama aaghila Musa ati, 2 “Oghambile Alooni̱ na batabani̱ be ku̱hu̱ti̱ya bihonguwa bi̱hi̱ki̱li̱i̱ye ebi Banai̱saaleeli̱ bakuhaayo ewanje, niikuwo batahemula li̱i̱na lyanje li̱hi̱ki̱li̱i̱ye. Ni̱i̱si̱ye Mukama.

3 “Obaghile oti, ‘Mu mijo yaanu yoona eghi ekwisa, kaakuba omui mu baasukulu baanu oghu ateeli̱ye eebinga bihonguwa bi̱hi̱ki̱li̱i̱ye ebi Banai̱saaleeli̱ bakuhaayo ewaa Mukama, muntu oghu ali na kubhinguwa mu maaso ghanje. Ni̱i̱si̱ye Mukama.

4 “ ‘Kaakuba omui mu baasukulu baa Alooni̱ aba alwaye bulwaye bwa ntumbi kedha mahu̱nu̱ ngamutuwa mu busaasa, taali na kuliya haa bihonguwa bi̱hi̱ki̱li̱i̱ye ku̱hi̱ki̱ya aki̱li̱ye. Mu̱hongi̱ weena akufooka oghu ateeli̱ye kaakuba aku̱mʼo kintu kyona eki̱teeli̱ye kedha mu̱ku̱ kedha eelootelela. 5 Muntu weena akufooka oghu ateeli̱ye kaakuba aku̱mʼo kisolo kyona ekikwekuluulilagha hansi kedha muntu weena oghu akugubha kuleka naafooka ateeli̱ye kedha muntu wa mulingo ghwona oghu akumufoola oghu ateeli̱ye. 6 Muntu weena oghu aku̱ku̱mʼo kimui haa bintu ebi akufooka oghu ateeli̱ye ku̱hi̱ki̱ya lwagholo. Taali na kuliya haa bihonguwa bi̱hi̱ki̱li̱i̱ye ku̱hi̱ki̱ya anaabi̱ye maasi mubili ghwona. 7 Musana ghukaakukota, akuba eeli̱ye kandi akugubha kuliya haa bihonguwa bi̱hi̱ki̱li̱i̱ye, nanga ni byokuliya biye. 8 Muntu oghu taali na kuliya kintu kyona aasangi̱ye kyekwi̱li̱i̱ye kedha eki binyama bya mu kisaka byati̱ye kandi kileka afooka oghu ateeli̱ye. Ni̱i̱si̱ye Mukama.

9 “ ‘Bahongi̱ bali na kukwata ebi naabalaghiiye, niikuwo musango ghutabasi̱nga kandi baku̱wa haabwa kubighaya. Ni̱i̱si̱ye Mukama oghu akubafoolagha bahi̱ki̱li̱i̱ye.

10 “ ‘Taaliyo munamahanga nʼomui oghu atali wa mu ka ya mu̱hongi̱ oghu akugubha kuliya haa bihonguwa bi̱hi̱ki̱li̱i̱ye ebi, nankabha mu̱ghenu̱ wa mu̱hongi̱ oghu kedha mu̱koli̱ wee, ataliya haa bihonguwa bi̱hi̱ki̱li̱i̱ye ebi. 11 Kaakuba mu̱hongi̱ aghula mu̱syana na sente, kedha mu̱syana bamubyaliiye mu ka ya mu̱hongi̱ oghu, muntu oghu akugubha kuliya haa byokuliya ebi. 12 Kaakuba muhala wa mu̱hongi̱ asweluwa musaasa oghu atali mu̱hongi̱, mukali̱ oghu ataliya haa bihonguwa bi̱hi̱ki̱li̱i̱ye. 13 Kaakuba muhala wa mu̱hongi̱ aba ali mu̱kwi̱si̱ya kedha eba wee amu̱bhi̱ngi̱ye, bhaatu atali na baana kandi aasa kuukala mu ka ya ese wee, ngoku aakalaghayo anali mwana, akugubha kuliya haa byokuliya bya ese wee. Bhaatu muntu oghu atali wʼomu ka ya mu̱hongi̱ ataliya haa byokuliya ebi.

14 “ ‘Kaakuba muntu weena asobi̱ya kandi aliya haa kihonguwa ki̱hi̱ki̱li̱i̱ye, ali na kusasula mu̱hongi̱ haabwa kihonguwa eki kandi ongelʼo kimui kyakataano kya muhendo ghwa byokuliya ebi. 15 Mu̱hongi̱ taali na ku̱bhi̱i̱ya bintu bi̱hi̱ki̱li̱i̱ye ebi Banai̱saaleeli̱ bakuhaayo ewaa Mukama 16 haabwa ku̱si̱i̱mi̱lani̱ya bantu abatali mu ntu̱la ya bahongi̱ kuliya haa bihonguwa bi̱hi̱ki̱li̱i̱ye ebi, kileeteleja bantu aba kuuhibuwʼo musango kandi kusasula. Ni̱i̱si̱ye Mukama oghu akufoolagha bihonguwa ebi kuba bi̱hi̱ki̱li̱i̱ye.’ ”

17 Mukama aaghila Musa ati, 18 “Oghile Alooni̱, batabani̱ be na Banai̱saaleeli̱ boona oti, ‘Kaakuba Munai̱saaleeli̱ kedha munamahanga oghu aakaaye na Banai̱saaleeli̱, aleeta kisembo kuba kihonguwa kyona kyokeei̱ye kya Mukama, ku̱u̱su̱li̱i̱si̱ya eki aalahiiye kedha haabwa kubbala kuwe, 19 ali na kuleeta kisolo ekitali na kamogo ku̱lu̱gha mu nte, ntaama kedha mbu̱li̱ siye, niikuwo nki̱si̱i̱me. 20 Muntu ataleeta kisolo ekili na kamogo, nanga Mukama taaku̱ki̱si̱i̱ma. 21 Kaakuba muntu ahayo kihonguwa kya bu̱si̱nge ewaa Mukama ku̱lu̱gha mu nte, ntaama kedha mbu̱li̱ siye, ku̱u̱su̱li̱i̱si̱ya eki aalahiiye kedha haabwa kubbala kuwe, kikulaghiluwa kuba kisemeeye kandi ekitali na kamogo, niikuwo nki̱si̱i̱me. 22 Mutalihongela Mukama kisolo eki maaso ghaaghaaye, ekihutaaye, ekilamaaye, ekikweyagha-yagha kedha ekilwaye bibbodhe. Mutalihonga kimui haa bisolo ebi haa kyakuhongelʼo bihonguwa nga kihonguwa bookeei̱ye haa mulilo. 23 Muntu akugubha kuhaayo ntu̱u̱li̱ ya nte kedha ntaama eghi eli na kughulu ku̱di̱i̱di̱ye kedha kujambi̱ye kusaali̱ya ghanji nga kihonguwa haabwa kubbala kuwe, bhaatu Mukama taaku̱si̱i̱ma kisolo eki haabwa muntu ku̱u̱su̱li̱i̱si̱ya eki aalahiiye. 24 Kisolo kyona eki ki̱twi̱ke kyakiyo kya nsoni̱ kyati̱ki̱ye, ki̱kpeetu̱ki̱ye, kihutaaye kedha ki̱jombi̱yʼo, mutalikihongela Mukama kandi mutalikola kintu eki mu nsi yaanu. 25 Bisolo ngʼebi mutalibiiya mu banamahanga abaakaaye mu nsi yaanu kubihaayo nga bihonguwa bya byokuliya ewaa Luhanga. Taaku̱si̱i̱ma bisolo ebi haabwanu, nanga bili na kamogo kandi bilamaaye.’ ”

26 Mukama aaghila Musa ati, 27 “Kaakuba kyana kya nte, kyana kya ntaama kedha kyana kya mbu̱li̱ ki̱byaluwa, kili na kuukala na ni̱naakiyo haabwa bilo musanju̱. Kilo kyamunaanaa bakugubha kukihaayo ewaa Mukama nga kihonguwa bookeei̱ye haa mulilo. 28 Mutalisala nte na kyana kyayʼo, ntaama na kyana kyayo kandi mbu̱li̱ na kyana kyayo haa kilo kimui kubihonga.

29 “Kaakuba muhayo kihonguwa kya ku̱si̱i̱ma ewaa Mukama, mukihongaghe mu mulingo ghu̱hi̱ki̱ye, niikuwo aki̱si̱i̱me haabwanu. 30 Muli na kuliya nyama sya kisolo eki haa kilo eki kyonini, mutati̱ghʼo nyama nʼemui ku̱hi̱ki̱ya nkyambisi. Ni̱i̱si̱ye Mukama.

31 “Nahabweki mukwate bilaghilo byanje kandi mukolaghe ebi bilaghiiye. Ni̱i̱si̱ye Mukama. 32 Mutalihemula li̱i̱na lyanje li̱hi̱ki̱li̱i̱ye, niikuwo Banai̱saaleeli̱ bamanye ngoku ndi ahi̱ki̱li̱i̱ye. Ni̱i̱si̱ye Mukama oghu akufoolagha enu̱we kuba bahi̱ki̱li̱i̱ye 33 kandi oghu akabaaya mu nsi ya Mi̱si̱li̱ kuba Luhanga waanu. Ni̱i̱si̱ye Mukama.”