1 Mukama aaghila Musa ati, 2 “Oghile Alooni̱ oti, ‘Okaakubhaki̱ya taala musanju̱, osite haa kyakutʼo taala niikuwo siikale sibhaki̱i̱ye mu maaso ghaakiyo.’ ”

3 Alooni̱ aakola ngoku Musa aamughambiiye. Taala esi aasitʼo si̱loli̱ye mu maaso ghaa kyakutʼo taala, ngoku Mukama aalaghiiye Musa. 4 Baawiisa na nondo kyakutʼo taala kyona kya feeja, ku̱lu̱gha haa ncuba yakiyo ku̱hi̱ka haa bimole byaku̱ki̱semeli̱ya. Baakikola mu mulingo ghwonini oghu Mukama ooleki̱ye Musa.

5 Mukama aaghila Musa ati, 6 “Mu Banai̱saaleeli̱ boona okomemu Baleevi̱ kandi okole mukolo ghwa ku̱beeli̱ya. 7 Mukolo ghwa ku̱beeli̱ya oghukole mu mulingo ghuni: obamisangile maasi aghakweli̱yagha, babaghembe mubili ghwona na kaawembo, banaabi̱ye ngoye syabo. Du̱mbi̱ bakuba beeli̱ye ewaanu. 8 Batwale ntu̱u̱li̱ ya nte na kihonguwa kya bilimuwa kya nsyano esemeeye, eghi etabuuyemu mafu̱ta kandi ntu̱u̱li̱ ya nte yaakabili kuba kihonguwa haabwa kibhi. 9 Otwale Baleevi̱ aba mu maaso ghaa weema ya kusanga-sangaanamu kandi okumaani̱ye ki̱bbu̱la kyona kya Banai̱saaleeli̱. 10 Oleete Baleevi̱ aba mu maaso ghaa Mukama kandi Banai̱saaleeli̱ bate mikono yabo haa mituwe ya Baleevi̱ aba. 11 Alooni̱ ali na kuhaayo Baleevi̱ mu maaso ghaa Mukama nga kihonguwa baamu̱ki̱i̱ye kya Banai̱saaleeli̱ aba, niikuwo bakole mulimo ghwa ku̱heeleli̱ya Mukama.

12 “Du̱mbi̱ Baleevi̱ bate mikono yabo haa mituwe ya ntu̱u̱li̱ sya nte esi kandi mu̱hongi̱ ali na kuhonga ewaa Mukama ntu̱u̱li̱ ya nte emui nga kihonguwa haabwa kibhi kandi yaakabili nga kihonguwa kyona kyokeei̱ye, kya kukola mukolo ghwa kughaniluwa bibhi bya Baleevi̱. 13 Olaghile Baleevi̱ ku̱heeleli̱yagha Alooni̱ na batabani̱ be kandi obaheyo nga kihonguwa baamu̱ki̱i̱ye ewaa Mukama. 14 Mukolo oghu ghukwoleka ngoku Baleevi̱ bali baa mbaghani̱ja mu Banai̱saaleeli̱ banji kandi bakuba bantu banje.

15 “Okaakumala kukola mukolo ghwa kweli̱ya Baleevi̱ kandi kubahaayo nga kihonguwa baamu̱ki̱i̱ye ewaa Mukama, du̱mbi̱ bali na kwisa kandi kukola mulimo ghwabo haa weema ya kusanga-sangaanamu. 16 Baleevi̱ aba ni bantu banje baa mbaghani̱ja mu Banai̱saaleeli̱ banji boona kandi bakuba banje mu ki̱i̱kalo kya baana baabusaasa mi̱li̱ghaaso ya Banai̱saaleeli̱. 17 Mu̱li̱ghaaso ghwona ghwabusaasa mu I̱saaleeli̱ ni ghwanje. Mi̱li̱ghaaso yoona yabusaasa ya bisolo ni yanje. Kilo eki naati̱ye baana baabusaasa mi̱li̱ghaaso mu ehanga lya Mi̱si̱li̱, nkafoola mi̱li̱ghaaso ya Banai̱saaleeli̱ kuba banje. 18 Nahabweki naatwete Baleevi̱ kuba banje mu ki̱i̱kalo kya baana baabusaasa boona mi̱li̱ghaaso baa Banai̱saaleeli̱. 19 Mu Banai̱saaleeli̱ boona, naafooye Baleevi̱ kuba kisembo kya Alooni̱ na batabani̱ be. Baleevi̱ aba balakolagha mulimo haabwa Banai̱saaleeli̱ haa weema ya kusanga-sangaanamu. Balakolagha mukolo ghwa Banai̱saaleeli̱ kughaniluwa bibhi niikuwo Banai̱saaleeli̱ aba kaakuba beebinga weema ehi̱ki̱li̱i̱ye, batatunga kifubilo kya ndwala kubaata.”

20 Musa, Alooni̱ na ki̱bbu̱la kyona kya Banai̱saaleeli̱ baahaayo Baleevi̱ ngoku Mukama aalaghiiye Musa. 21 Baleevi̱ beeyeli̱ya kandi baanaabi̱ya ngoye syabo. Du̱mbi̱ Alooni̱ aabahaayo nga kihonguwa baamu̱ki̱i̱ye mu maaso ghaa Mukama kandi aakola mukolo ghwa Baleevi̱ aba kughaniluwa bibhi niikuwo bafooke abeeli̱ye. 22 Haanu̱ma yʼeki, Baleevi̱ baaghenda kukola mulimo ghwabo haa weema ya kusanga-sangaanamu, Alooni̱ na batabani̱ be niibo baabaloleelelagha haa mulimo oghu. Banai̱saaleeli̱ baakola byona ebikwetʼo Baleevi̱ ngoku Mukama aalaghiiye Musa.

23 Mukama aaghila Musa ati, 24 “Kini kikwetʼo Baleevi̱: Basaasa abali na myaka maku̱mi̱ abili nʼetaano na kusaalʼo bali na kwisa kandi kukola mulimo ghwa ku̱heeleli̱ya haa weema ya kusanga-sangaanamu. 25 Bhaatu basaasa abali na myaka maku̱mi̱ ataano ya bukulu bali na kuhuumula kandi baleke kukola mulimo ghwa ku̱heeleli̱ya oghu. 26 Bakugubha kukoonela baanakyabo kukola milimo yabo haa weema ya kusanga-sangaanamu, bhaatu ebo batakola mulimo oghu. Haaliikuwo waahaagha Baleevi̱ milimo ya kukola.”