Ku̱su̱u̱ku̱lu̱lu̱wa
oku Yohaana Aahandi̱i̱ki̱ye
Kwanjula
Mukwenda Yohaana akahandiika bbaluwa eni kukoonela Baki̱li̱si̱taayo bʼomu bi̱bbu̱la musanju̱ bya bahi̱ki̱li̱ja ebi aabaagha aloleleeye. Mu nsuula 2—3 ahandi̱i̱ki̱ye bbaluwa syambaghani̱ja haabwa bu̱li̱ ki̱bbu̱la kya bahi̱ki̱li̱ja. Aabahabula kwekuukamu bibhi byabo. Aabeekambi̱i̱si̱ya kuukala banali baheeleli̱ya baa Luhanga beesighibuwa nankabha baba bantu mbababona-boni̱ya.
Mu ki̱twi̱ke kyona ekilabhi̱yʼo, Yohaana abu̱ghi̱yʼo kwolekuwa oku oolekeeu̱we haa maani̱ na ki̱ti̱i̱ni̱sa kya Luhanga ebi aaboone. Mu kwolekuwa oku, Luhanga ooleki̱ye ki̱i̱ni̱gha kiye haa bubhi obuli munsi. Ooleki̱ye ngoku Ki̱li̱si̱to aku̱si̱ngu̱la bubhi kandi atwi̱le musango bantu boona ababhengi̱ye majima ghe. Haanu̱ma Luhanga akumalʼo nsi eni. Akukola nsi mpyaka hambali akuukala bilo nʼebilo hamui na bantu boona abamwesi̱ghi̱ye.
1
Kwanjula kitabo kini
1 Kuni niikuwo ku̱su̱u̱ku̱lu̱lu̱wa oku Luhanga aahaaye Yesu Ki̱li̱si̱to. Luhanga akamuha ku̱su̱u̱ku̱lu̱lu̱wa oku niikuwo baheeleli̱ya baa Yesu bamanye ebikughenda kubʼo. Yesu aatuma malai̱ka wee kughenda ewaa mu̱heeleli̱ya wee Yohaana. 2 Yohaana aahandiika ebi aaboone byonini. Aaha buukai̱so haa kighambo kya Luhanga kandi haa Yesu Ki̱li̱si̱to. 3 Ali na mu̱gi̱sa muntu oghu akusomela bahi̱ki̱li̱ja baa Yesu baanakiye butumuwa buni bwa bulangi̱ obwalu̱ghi̱ye ewaa Luhanga. Kandi bali na mu̱gi̱sa abaku̱tegheeleli̱yagha butumuwa obu kandi bakola ebi bulaghiiye. Nanga bwile bwa ebi byona kubʼo buli haai ku̱hi̱ka.
Yohaana naahandiikila bahi̱ki̱li̱ja
4 Si̱ye Yohaana, ni̱i̱si̱ye naahandiikila enu̱we bi̱bbu̱la bya bahi̱ki̱li̱ja abali mu maatau̱ni̱ musanju̱ mu kyalo kya Asi̱ya. Nkubasabilagha ngughuma na mpempa yonkaha ebi̱ku̱lu̱ghagha ewaa oghu aliyo, oghu akabʼo kandi oghu akwisa kubʼo, kandi ebi̱ku̱lu̱gha ewaa myoyo musanju̱ eghi ekuukalagha mu maaso ghaa ntebe ya bukama ya Luhanga. 5 Kandi ku̱lu̱gha ewaa Yesu Ki̱li̱si̱to oghu ali kai̱so mwesighibuwa, wʼoku̱du̱bha ku̱hu̱mbu̱u̱ka mu baku̱u̱ye, kandi mu̱lemi̱ wa bakama boona abali munsi muni. Yesu atu̱ku̱ndi̱ye, kandi akaseesa saghama yee kutucungula ku̱lu̱gha mu bibhi byatu. 6 Ti̱ eki niikiyo kikulekagha tufooka bantu bʼomu bu̱lemi̱ buwe kandi bahongi̱ baa Luhanga wee kandi Ese wee. Nahabweki aaheebuwe ki̱ti̱i̱ni̱sa kandi bu̱toki̱ bilo nʼebilo. Aami̱i̱na. 7 Nkubbala mumanye kini bahi̱ki̱li̱ja baanakyanje, Yesu aliisila mu bicu, kandi bantu boona balimubona bbeni̱-bbeni̱. Naabamubambi̱ye haa musalaba balimubona dhee. Ti̱ bantu bʼomu ntu̱la syona munsi balituntulila kimui. Niikuwo kiliba kitiyo. Aami̱i̱na. 8 Mukama aaghila ati, “Ni̱i̱si̱ye Ntandiko kandi Mpelo, oghu nkulekagha bintu byona bibʼo kandi bihuwʼo.*1:8 Mu Lu̱gi̱li̱ki̱ baghambi̱ye bati Alufa kandi Omega. Ni̱i̱si̱ye oghu aliyo, oghu akabʼo kandi oghu akwisa kubʼo. Ni̱i̱si̱ye Luhanga wa Bu̱toki̱ Bwona.”
Yohaana naabona Ki̱li̱si̱to oghu akahu̱mbu̱u̱ka
9 Si̱ye Yohaana mu̱hi̱ki̱li̱ja wa Yesu muunakyanu kandi oghu ndi omui mu bu̱lemi̱ bwa Luhanga, niibuwo bambona-boni̱ya ngoku naanu bakwete kubabona-boni̱ya haabwa ku̱hi̱ki̱li̱ja Yesu. Ti̱ mbhonganuuwe ku̱gu̱mi̱si̱li̱ja kubona-bona kwona ngoku naanu mwagu̱mi̱si̱li̱i̱je. Nkaba ndi mu ki̱i̱kalo eki maasi gheeli̱ghi̱li̱i̱ye eki bakughilaghamu Pati̱mo, bankwete haabwa kulangilila kighambo kya Luhanga kandi kuha buukai̱so haa Yesu. 10 Kilo Kyasande kimui, Mwoyo Ahi̱ki̱li̱i̱ye anjisʼo mu mulingo ghwa mbaghani̱ja. Naaghu̱wa enu̱ma syanje elaka lyamaani̱ nga lya ki̱i̱di̱yo kiinamu̱li̱to. 11 Elaka eli lyangila liti, “Ebi oboone byona, obihandiike mu kitabo kandi obitumile bi̱bbu̱la bya bahi̱ki̱li̱ja musanju̱ abali mu maatau̱ni̱ ghani: Efeeso, Sumiluna, Pelugamo, Ti̱yati̱la, Saadi̱si̱, Filadofi̱ya, na Lehu̱di̱ki̱ya.”
12 Neegaali̱ya kulola oghu akwete ku̱bu̱gha nanje, obu neegaai̱ye, naabona bikondo bya taala musanju̱ bya feeja. 13 Naabona oghu asu̱si̱ye mwana wa muntu,*1:13 Dhaneeli̱ 7:13 eemiliiye haagati ya bikondo ebi, kandi alu̱wete kiigandulo kijambi̱ye, eebohi̱ye mu mi̱ghelu̱ muheeko ghwa feeja. 14 Mutuwe nʼesoke liye bikaba byeleeye kimui dhiyo nga byoha bya ntaama njelu, byeleeye kimui nga bilika. Maaso ghe ghaakagha nga bilimi bya mulilo. 15 Maghulu ghe ghakaba ghasu̱si̱ye nga kyoma kyamaani̱ kikubbyokeelela. Kandi elaka liye likaba lili lyamaani̱ nga lya ki̱ku̱ku̱mo kya maasi ghaasuuye. 16 Akaba akwete nsooli̱ya musanju̱ mu mukono ghuwe ghwabuliyo, mu kanu̱wa ke haalu̱ghamu kihiyo kya mooghi abili kyoghiiye, kandi haali̱i̱so yee hakaba hasu̱si̱ye nga musana ghwamaani̱ ghutooye.
17 Obu naamuboone, naamwegenga mu maghulu naasalikilʼo. Niibuwo Yesu anku̱mi̱yʼo na mukono ghuwe ghwabuliyo, angila ati, “Oleke kwobaha. Ni̱i̱si̱ye nkulekagha bintu byona bibʼo kandi bihuwʼo. 18 Nkaku̱wa kandi naahu̱mbu̱u̱ka, ti̱ endindi ndi mwomi̱i̱li̱ bilo nʼebilo. Ni̱i̱si̱ye ndi na bi̱su̱mu̱li̱jo bya Lu̱ku̱ kandi Eku̱li̱mu̱. 19 Nahabweki, okulaghiluwa kuhandiika bintu byona ebi oboone endindi, na byona ebi okubona haanu̱ma ya bini. 20 Ti̱ waaboone nsooli̱ya musanju̱ esi nkwete mu mukono ghwanje ghwabuliyo, kandi waabona na bikondo bya taala musanju̱ bya feeja. Nsooli̱ya musanju̱ esi niibo baamalai̱ka abaloleleeye bi̱bbu̱la musanju̱ bya bahi̱ki̱li̱ja. Ti̱ bikondo musanju̱ ebi niibiyo bi̱bbu̱la musanju̱ bya bahi̱ki̱li̱ja.”