7
Bantu baa Luhanga mitwalo eku̱mi̱ neenaa na nku̱mi̱ enaa
1 Kintu kinji eki naaboone, ni baamalai̱ka bbanaa baamiliiye haa mpande enaa sya nsi, kutanga mpwegha ku̱lu̱gha haa mpande enaa sya nsi, niikuwo hatabʼo mwegha oghukuteela munsi, haa nanja kedha haa kiti kyona. 2 Naatodha naabona malai̱ka onji naakoma naalu̱gha bu̱lu̱gha ejooba, akwete kyaku̱teesi̱yʼo kabonelo kaa Luhanga mwomi̱i̱li̱. Aabilikila nʼelaka lyamaani̱ baamalai̱ka bbanaa bali̱, aba baabaagha bahaaye bu̱toki̱ kukola kubhi nsi hamui na nanja. 3 Aabaghila ati, “Mutakabhi̱i̱ya nsi, nanja, nankabha biti, ku̱hi̱ki̱ya obu tulamala kuta kabonelo kaa Luhanga haa bhu̱u̱su̱ ya baheeleli̱ya be.” 4 Du̱mbi̱ malai̱ka oghu na baamalai̱ka baanakiye baata kabonelo kaa Luhanga haa bhu̱u̱su̱ sya baheeleli̱ya be. Ti̱ bangambila ngu bwile obu muhendo ghwa bantu boona ghukaba mitwalo eku̱mi̱ neenaa na nku̱mi̱ enaa, ku̱lu̱gha mu bu̱li̱ ntu̱la ya Banai̱saaleeli̱:
5 mutwalo ghumui na nku̱mi̱ ebili ku̱lu̱gha mu ntu̱la ya Yu̱da,
mutwalo ghumui na nku̱mi̱ ebili ku̱lu̱gha mu ntu̱la ya Lehu̱bbeeni̱,
mutwalo ghumui na nku̱mi̱ ebili ku̱lu̱gha mu ntu̱la ya Gaadi̱,
6 mutwalo ghumui na nku̱mi̱ ebili ku̱lu̱gha mu ntu̱la ya Aseeli̱,
mutwalo ghumui na nku̱mi̱ ebili ku̱lu̱gha mu ntu̱la ya Nafutaali,
mutwalo ghumui na nku̱mi̱ ebili ku̱lu̱gha mu ntu̱la ya Manase,
7 mutwalo ghumui na nku̱mi̱ ebili ku̱lu̱gha mu ntu̱la ya Si̱mi̱yooni̱,
mutwalo ghumui na nku̱mi̱ ebili ku̱lu̱gha mu ntu̱la ya Leevi̱,
mutwalo ghumui na nku̱mi̱ ebili ku̱lu̱gha mu ntu̱la ya I̱sakaali,
8 mutwalo ghumui na nku̱mi̱ ebili ku̱lu̱gha mu ntu̱la ya Jabbu̱looni̱,
mutwalo ghumui na nku̱mi̱ ebili ku̱lu̱gha mu ntu̱la ya Yojeefu̱,
mutwalo ghumui na nku̱mi̱ ebili ku̱lu̱gha mu ntu̱la ya Bbenjami̱i̱ni̱.
Mbasinda Luhanga mu eghulu
9 Haanu̱ma yʼebi, naabona gbadha-gbadha ya bantu, aba muntu atangu̱gu̱bhi̱ye kubabala, bakaba balu̱ghi̱ye mu mahanga ghoona, mu ntu̱la syona, na mu bantu boona bʼomu mi̱bu̱ghe yoona. Bakaba beemiliiye mu maaso ghaa ntebe ya bukama na mu maaso ghaa Kyana kya Ntaama. Bakaba balu̱wete nkanji̱ sijelu, bakwete bi̱kongu̱bho mu ngalo syabo. 10 Baagolagha nʼelaka lyamaani̱ bati, “Uwe Luhanga waatu oghu ositami̱ye haa ntebe ya bukama, hamui na Kyana kya Ntaama, ni̱i̱nu̱we mwatu̱ju̱ni̱ye!” 11 Baamalai̱ka boona bakaba beeli̱ghi̱li̱i̱ye ntebe ya bukama ya Luhanga kandi beeli̱ghi̱li̱i̱ye na bakulu na bihanguwa bbinaa byomi̱i̱li̱ ebyabaagha mu maaso ghaa ntebe ya bukama. Baateeli̱ya, baatandika kulami̱ya Luhanga, 12 mbaghila bati, “Aami̱i̱na! Mi̱gi̱sa, ki̱ti̱i̱ni̱sa, magheji, ku̱si̱i̱ma, ku̱hu̱ta, maani̱ kandi bu̱toki̱ bibe bya Luhanga waatu wa bilo nʼebilo! Aami̱i̱na.”
13 Niibuwo omui mu bakulu abili na bbanaa ambu̱u̱i̱ye ati, “Bantu abalu̱wete nkanji̱ sijelu aba mbaki? Kandi omani̱ye hambali balu̱ghi̱ye?” 14 Naamukuukamu nti, “Wai̱tu̱, nuuwe omani̱ye.” Angila ati, “Aba ni abaagu̱mi̱si̱li̱i̱je kubona-bona kwamaani̱. Aba ni abaanaabi̱i̱ye nkanji̱ syabo syela dhiyo mu saghama ya Kyana kya Ntaama.
15 “Nahabweki niikiyo ki̱leki̱ye bali mu maaso ghaa ntebe ya bukama ya Luhanga,
mbamu̱heeleli̱ya mukilo na ntangaali̱ mu numba yee,
kandi oghu asitami̱ye haa ntebe ya bukama
akubalinda kusemeeye.
16 Tabakutodha njala kubakwata, nankabha eliyo kubakwata;
tabalihuuluwa musana, nankabha kutuuma kwaghuwo.
17 Nanga Kyana kya Ntaama
oghu ali haa ntebe ya bukama, niiye akuba mu̱li̱i̱si̱ya wabo,
kandi abatwale haa nsulo sya maasi aghakuhaagha bwomi̱i̱li̱.
Kandi Luhanga alibalaghali̱ya mali̱gha ghoona haali̱i̱so yabo.”